Amabhakuri gataanu na gabhiri aga risungu rya Nyamuwanga
16
1 Nejire neeya, ninuungwa obhuraka bhunene okusooka mw‑Iyekaru rya Nyamuwanga omwo, nibhubhwiraga bhamaraayika bhataanu na bhabhiri bharya ati, “Mugende musuke ku‑chaaro risungu rya Nyamuwanga rinu riri mu‑mabhakuri gataanu na gabhiri garya.” 2 Mbe, maraayika wa okwamba ˆnaagenda, ˆnaasuka ku‑chaaro risungu rya Nyamuwanga rinu ryariga riri mw‑ibhakuri ryaye. Awoawo, abhaanu bhoone bhanu bhaariga bhari na orunabho rwa rityanyi rirya na bhanu bhaaramyaga risusano ryaryo, nibheemukirwa ebhironda ebhibhiibhi nibhiruma muno.3 Niwo, maraayika wa kabhiri wone ˆnaasuka mu‑nyanja risungu rya Nyamuwanga rinu ryariga riri mw‑ibhakuri ryaye. Amanji nigayiinduka nigabha isagama rwa ya omufuuwe. Ebhibhumbwa ebhiwanga bhyone bhya mu‑nyanja nibhifwa.
4 Niwo, maraayika wa kasatu ˆnaasuka mu‑misima na mu‑mimiro ja manji, risungu rya Nyamuwanga rinu ryariga riri mw‑ibhakuri ryaye. Amanji ago goone nigayiinduka nigabha isagama. 5 Nejire neeya, ninuungwa obhuraka bhwa maraayika owa obhuturo ku‑manji, nibhwayikaga ati,
“Awe Nyamuwanga Omweru unu waariga uri‑wo na unu uri‑wo woori,
naawe omurengeresi na indamu yaawo ni ya obhurengeresi.
6 Okubha abhaanu abhabhiibhi ꞉bheetire isagama ya abheeru bhaawo na abharagi bhaawo,
Raatabhugenyi awe, wabhayaana isagama, bhanywe.
Bheeyire jimbuma ejo!”
7 Niwo ninuungwa obhuraka okusooka ku‑chigabhiro, nibhwayikaga ati,
“Awe, Raatabhugenyi Nyamuwanga owa obhuturo bhwone,
indamu yaawo ni ya echimari na ya obhurengeresi.”
8 Niwo, maraayika wa kana ˆnaasuka kw‑isuubha risungu rya Nyamuwanga rinu ryariga riri mw‑ibhakuri ryaye. Risuubha niriyaanwa obhuturo bhwa okwocha abhaanu kwa omuumwi gwaryo omururu. 9 Abhaanu nibhoochiibhwa kubhiibhi muno. Nibhafuma risiina rya Nyamuwanga kwa okubha omwene aariga ari na obhuturo ku‑tambara ejo, nawe ꞉bhataataaye ebhibhiibhi bhyebhwe ku‑mwene noorwo ꞉bhataamukusiisye.
10 Niwo maraayika wa kataanu ˆnaasuka ku‑chitebhe cha obhutungi cha rityanyi rirya, risungu rya Nyamuwanga rinu ryariga riri mw‑ibhakuri ryaye. Awoawo echisuute nichiswikira obhukama bhwaryo na abhaanu nibheerumaruma jindimi jeebhwe inguru ya obhwasye bhwa ebhironda. 11 Nibhafuma Nyamuwanga wa mu‑rwire ku‑songa ya obhwasye bhwafu na ebhironda bhyebhwe ebhibhiibhi. Noorwo ꞉bhataasigire okukora ebhikorwa bhyebhwe ebhibhiibhi.
12 Niwo maraayika wa kataanu na umwi wone ˆnaasuka mu‑musima omukuru Efuraati, risungu rya Nyamuwanga rinu ryariga riri mw‑ibhakuri ryaye. Amanji gaagwo nigomiira korereki injira ichumachumibhwe, inguru ya abhakama bhanu abhasookerera ebhuwuruka esuubha okutura‑ko.
13 Niwo nindora amasambwa amajabhi gasatu ganu gaasusanaga na gawarukerwe. Erimwi nirisooka mu‑kanwa ka riyoka rirya, erindi nirisooka mu‑kanwa ka rityanyi rirya na erindi nirisooka mu‑kanwa ka omuragi omubheeyi urya.a 14 Amasambwa ago, gaariga gari na obhuturo bhwa okukora ebhibharikisyo na emirimu jaago ni kugenda ku‑bhakama bhoone ku‑chaaro na okubhakumanya, korereki bhakore riremo ku‑rusuku rurya orukuru rwa risungu rya Nyamuwanga owa obhuturo bhwone.
15 Raatabhugenyi Yeesu kaayika ati, “Muringire! Niriija rwa kutyo omwifi kaaja abhaanu bhataamenya. Ari na ribhando unu atengeejere na okwiraabha emyenda jaaye korereki asige kuyenga tuyu na okwiswasya imbere ya abhaanu.”
16 Mbe, amasambwa ago, nigakumanya abhakama bhoone na bhasirikare bheebhwe orubhaara runu mu‑Chiyebhuraniya orutogwa ati, Arimagidooni.
17 Niwo, maraayika wa kataanu na kabhiri ˆnaasuka ku‑rutumba risungu rya Nyamuwanga rinu ryariga riri mw‑ibhakuri ryaye. Ninuungwa obhuraka obhunene nibhusooka ku‑chitebhe cha ingʼoma mw‑Iyekaru rya Nyamuwanga, nibhwayika ati, “Joone jaakorekeene!” 18 Nijibha‑wo jindabhyo, amagingirimo, amabharuka na rinyamutikima rya echaaro. Rinyamutikima eryo, ryariga riri enene muno okukira goone okwambira abhaanu bhabhumbwe ku‑chaaro anu. 19 Kutyo nirireterera omusi omukuru gwa Bhaabheeri nigutaana‑mo mabhaara gasatu na emisi emikuru ja amaanga nijisingaarisibhwa joone. Nawe Nyamuwanga ꞉ataarabhiiywe omusi omukuru gwa Bhaabheeri. ˆNaagusinyiirisya gunywe echifuufu echiruru okusooka mu‑mutawo gwa risungu ryaye eryafu. 20 Rinyamutikima eryo ꞉ryakorere amasinga goone nigasika na ebhiima bhyone wone ꞉bhitaabhonekeene rindi. 21 Ingʼubha nyafu muno ya amabhuyi niigwa. Amabhuyi ago, obhusito bhwago bhwariga wuti kiro makumi gataanu bhuri rimwi, ꞉gaasookere mu‑rutumba nigagwira abhaanu. Abhaanu nibhafuma Nyamuwanga ku‑songa ya itambara inu ꞉yaareeterwe na ingʼubha ya amabhuyi eyo, okubha itambara eyo yaariga iri mbiibhi muno.