Omugasi omukuru unu eegusyaga na rityanyi ritukurasi
17
1 Neeya, owumwi wa bhamaraayika bhataanu na bhabhiri bhanu bhaariga bhari na amabhakuri garya ga risungu rya Nyamuwanga ˆnaanyiija‑ko, ˆnaambwira ati, “Iija enu, nikweresye kutyo Nyamuwanga ariramura omugasi urya omukuru unu eegusyaga okwibhonera ribhona, eenyanjire ku‑misima myafu.a 2 Abhakama bha echaaro ꞉bhaakorere obhuromesi nage, na abhaanu bhanu bheekaaye ku‑chaaro wone, bhakorerwe obhuromesi bhwaye rwa omuunu unu akorerwe echifuufu.”3 Mbe, Mwoyo wa Nyamuwanga ˆneeka inguru yaani. Maraayika oyo ˆnaankingya mw‑ibhara. Nejire naakinga eyo, nindora omugasi ariinyire kw‑ityanyi rirya rya okwamba. Rityanyi eryo ryariga riri ritukurasi, riri na emitwe etaanu na ebhiri na ameyembe ekumi. Ka wone, ryariga riswirire amasiina ga okufumirisya Nyamuwanga. 4 Omugasi oyo aariga afwaye emyenda ja echigore ja irangi ya ijambarawu na itukurasi. Ka wone aariga enojooriisye kwa inaaryo, amabhuyi ga obhugusi obhurambu na iruuru. Mu‑kubhoko kwaye, aariga agwatire omutawo gwa inaaryo gunu gwariga gwijuuye amafuruurusyo na ebhiinu ebhijabhi bhya obhuromesi bhwaye. 5 Ku‑chisuusu chaaye, ryariga rikaamirwe‑ko risiina rinu obhugajuro bhwaryo bhwariga bhuri mbisike. Risiina eryene ni rinu,
Omusi Omukuru gwa Bhaabheeri,
Nyiramwene Abhagasi Bhanu Abheegusya Okwibhonera Ribhona
na Owa Amafuruurusyo ga Echaaro.
6 ꞉Naaruguurire muno, nejire naarora omugasi oyo akorerwe isagama ya abheeru bha Nyamuwanga, bhanu ꞉bheetirwe ku‑songa ya okubha abhabhambaasi bha Yeesu.
7 Nawe maraayika urya ˆnaambusya ati, “Kurwa ki owuruguura? Siga nikubhwire obhugajuro bhwa imbisike ya omugasi oyo na obhwa rityanyi rinu ariinyire‑ko erya emitwe etaanu na ebhiri na amayembe ekumi. 8 Rityanyi rinu ꞉waarorere, ryariga riri aanga nawe woori ryafuuwe. Rityanyi eryo, riri yeeyi okusooka mu‑ryobho rinu ritari na obhuteero, korereki Nyamuwanga arisingaarisye. Abhaanu bhoone ku‑chaaro bhanu amasiina geebhwe ꞉gataakaamirwe mu‑chitabho cha obhuwanga echaaro chichaari okubhumbwa, bhariruguura aribha bhaarora rityanyi eryo ryariga riri‑wo, woori ritari‑wo na riribha‑wo rindi.”
9 Maraayika oyo ˆnaagenderera okwayika ati, “Omusango gunu ogukena obhwengeeso. Emitwe etaanu na ebhiri jinu ꞉waarorere ni bhiima bhitaanu na bhibhiri bhinu omugasi oyo aariga eenyanjire‑ko.b 10 Ka wone emitwe etaanu na ebhiri ejo ni bhakama bhataanu na bhabhiri. Abhakama abhataanu bharafuuwe, owundi niwe atungire woori, owundi achaari okuuja. Aribha aaja, aritunga omwanya mufuyi era. 11 Rityanyi eryo ryariga riri iwanga, nawe nirifwa, oyo niwe omukama wa kataanu na kasatu. Omukama oyo, ni owumwi wa bhakama bhataanu na bhabhiri bharya, nawe Nyamuwanga arimusingaarisya wone.
12 “Amayembe ekumi ganu ꞉waarorere ni bhakama ekumi bhanu bhachaari okutunga. Abho bhoone bhariyaanwa obhuturo bhwa okutunga aamwi na rityanyi eryo, nawe bharitunga omwanya gwa esaa rimwi era. 13 Abhakama ekumi abho bharibha na obhukarariiye bhumwi, bhariyaana rityanyi eryo obhuturo na amanaga geebhwe goone. 14 Bharigwatana na rityanyi eryo, okukora riremo na Omwana wa Inaama. Nawe Omwana wa Inaama aribhayiga, kwa okubha omwene niwe Raatabhugenyi wa bharaatabhugenyi na Omukama wa abhakama. Bhanu bhari aamwi nage nibho bhabhirikiiywe na okusorwa na Nyamuwanga, abheene ni bheeyikanyibhwa.”
15 Maraayika oyo ˆnaagenderera okwayika ati, “Amanji ganu omugasi urya eegusyaga eenyanjire‑ko, nibho abhaanu bha jinyaayika joone, jinyaami joone na bha ebhyaro bhyone. 16 Amayembe ekumi garya na rityanyi eryo, bhirisoka omugasi urya eegusyaga. Bharimuteesya ebhiinu bhyaye bhyone na okumusiga tuyu. Bharirya inyama yaaye na inu irisigara bhariisingaarisya mu‑muriro. 17 Nyamuwanga omwene niwe ꞉aabhakorere bhabhe na obhukarariiye bhumwi bhwa okuyaana rityanyi obhuturo bhwebhwe bhwa okutunga. Abho bharikora kutyo okukingira anu obhutinge bhwa Nyamuwanga bhurikuumira. 18 Omugasi unu ꞉waarorere ni musi omukuru gunu gutungire abhakama bhoone bha ku‑chaaro.”