Omusi gwa Bhaabheeri ogugwa
18
1 Ejo jejire jaawa, nindora echiroro echindi. ꞉Naarorere maraayika owundi ˆneekaga okusooka mu‑rwire. Maraayika oyo, aariga ari na obhuturo bhwafu, na rikusyo ryaye niringʼarabhisya echaaro. 2 ˆNaamura obhuraka bhunene muno, ˆnaayika ati,“Gwasingaarika!
Omusi omukuru gwa Bhaabheeri gwasingaarika!
Woori gwabha obhwikaro bhwa okwiyibhisa‑mo
amasambwa ga bhuri mbaga.
Gwabha obhwigamo bhwa bhuri inyonyi joone jimbiibhi na jinu ejifuruurusya.
3 Gwagwa kwa okubha abhaanu bha amaanga goone
꞉bhaanyweye echifuufu chaagwo, ꞉bhaakorerwe obhurigire bhwafu bhwa obhuromesi bhwagwo,
abhakama bha echaaro ꞉bhaakorere obhuromesi nage.
Abhakaani bha ebhiinu ku‑chaaro
꞉bhaaniibhire ku‑songa ya ebhibhiibhi bhyaye bhinu bhitari na indengo.”
4 Niwo ninuungwa obhuraka obhundi okusooka mu‑rwire nibhwayika ati,
“Abhaanu bhaani, mumusooke‑ko,
korereki mwasiga okusangira aamwi nage ebhibhiibhi bhyaye,
ka wone korereki mwasiga okusangira aamwi nage jitambara jaaye.
5 Okubha ebhibhiibhi bhyaye bhigerekeene aamwi,
na bhyakingire mu‑rwire.
Nyamuwanga emariiriiye okumuyaana jitambara inguru ya ebhikorwa bhyaye ebhibhiibhi.
6 Mumukorere rwa kutyo omwene ꞉aakoreeye abhandi,
ka wone mumukorere kutyo kwiya kabhiri ya ebhibhiibhi bhinu ꞉aakoreeye abhandi.
Mugege omutawo gwaye,
mumusukire‑mo risungu kwiya kabhiri kutyo ꞉aabhasukiiye.
7 Mumubhume jimbuma na okumunyaasya okwingana na kutyo ꞉aakorere okwibhonera echibharo na obhuniibhi.
Okubha omwene keeyema mu‑mwoyo gwaye, ˆnaayika ati,
‘Niinyanjire okutunga rwa omugore, noorwo anye nitaribha omutumbagasi, kwa okubha nitari na omurume, nitarisurumbara wuri!’
8 Kurwa ejo, aribhona itambara yoone ku‑rusuku rumwi era,
itambara ya orufu, inyaako ya okurira na ya omweko.
Aryochibhwa chimwi mu‑muriro,
kwa okubha Raatabhugenyi Nyamuwanga unu arimuramura niwe owa obhuturo.”
Abhaanu abharirira omusi gwa Bhaabheeri
9 Abhakama bha echaaro bhanu ꞉bhaakorere obhuromesi nage na okusangira obhuniibhi bhwaye, bharirira na okusurumbarira omugasi urya omwanya gunu bharirora ingesi ya okusingaarisibhwa kwaye. 10 Abhakama abho bhariimereeguru kura na omusi ogwo kwa okuubhaya ebhinyaasyo bhyagwo bhinu bhirigubhona. Bharirira nibhaayikaga ati, “Jiribhona, jiribhona omusi omukuru, Bhaabheeri, omusi gwa amanaga! Indamu yaawo yakukingira bhwangu muno.”
11 Abhakaani bha ebhiinu ku‑chaaro bharimuririra na okumusurumbarira, kwa okubha bhataribha‑wo abhaanu bha okugura ebhiinu bhyebhwe. 12 Ataribha‑wo omuunu owundi wa okugura ebhiinu bhyebhwe bhya inaaryo, jipirya, iruuru noorwo amabhuyi ga obhugusi obhurambu. Ataribha‑wo omuunu wa okugura ibhafuta ya ekisi, omwenda gwa ekisi gwa ijambarawu na jitukurasi. Ka wone ataribha‑wo omuunu wa okugura ebhiinu bhya jimbawu ja omwotwa, noorwo ebhiinu bhinu bhikonjerwe kwa amayembe ga jinjofu bhya jimbawu ja obhugusi obhurambu, noorwo bhya isyabha, echuuma amwi amabhuyi ge ekisi. 13 Ataribha‑wo omuunu wa okugura omudarasiini, ebhinjari, omwotwa, ebhirange amwi obhubhaani, noorwo echifuufu, amafuta ga okuteekera, jisyano jiniiji na obhuro. Ka wone ataribha‑wo omuunu wa okugura jiingʼa, jinaama, jifwaraasi, jimootoka jinu ejikururwa na jifwaraasi, abhagaya na obhurame bhwa abhaanu.
14 Mbe, abhakaani bha ebhiinu bharyayikaga ati, “Ebhiinu bhya ekisi bhinu waarigiraga bhiraweeye‑wo. Ebhiinu bhyone bhya obhunanamba na ebhya echibharo bhyaweeye‑wo. Bhitari‑wo noorwo utaribhibhona akajaanende.” 15 Abhakaani bha ebhiinu bhanu ꞉bhaaniibhire okuruubhana na omusi ogwo bhariimereeguru kura kwa okuubhaya ebhinyaasyo ebhyo, nibhasurumbaraga na okurira. 16 Bharyayikaga ati, “Jiribhona, jiribhona omusi omukuru. Awe wafwaraga emyenda ja ekisi muno ja jibhafuta, ja ijambarawu na jitukurasi. Wenojooryaga kwa inaaryo, amabhuyi ga obhugusi obhurambu na iruuru. 17 Nawe obhuniibhi obhwo bhwone bhwasingaarika ku‑mwanya mufuyi era.”
Abhakaru bhoone bha jingarabha na abhagendi bheebhwe, abhawugi na abhakosi bhoone bha emirimu ja mu‑ngarabha, wone bhariimereeguru kura. 18 Omwanya gunu bharirora ingesi ya okwochiibhwa kwago, bharyamura obhuraka nibharira, nibhaayikaga ati, “Gutari‑wo omusi ogundi omukuru rwa omusi ogwo!” 19 Bharitutumurira oruteeri ku‑mitwe jeebhwe, okweresya ati bhasurumbara. Bharirira nibhaayikaga ati, “Jiribhona, jiribhona omusi omukuru. Omusi ogwo ꞉gwachiniibhiisye eswe abha jingarabha bhoone inguru ya obhuniibhi bhwagwo. Nawe omusi gwone gwasingaarika ku‑mwanya mufuyi era.”
20 Mukonderwe emwe bhanu mwikaaye mu‑rwire. Mukonderwe, emwe abheeru bha Nyamuwanga, jitumwa na abharagi, kwa okubha Nyamuwanga aasoosya indamu ku‑musi ogwo ku‑jinu ꞉gwabhakoreeye.
21 Mbe, maraayika owumwi owa amanaga, ˆnaabhatura ribhuyi risito rwa orubhuyi rwa okuseera‑ko, ˆnaaryesa mu‑nyanja, ˆnaayika ati,
“Ku‑managa maafu rwa kutya,
omusi omukuru gwa Bhaabheeri guryeswa na okusingaarika chimwi.
22 Mu‑musi omwo, bhutaringwibhwa‑mo chimwi obhuraka bhwa abhaanu bhanu abheemba,
nibhabhuma jindono, jikuri noorwo ingʼombi.
Ataribha‑wo omukonji wa echiinu choonechoone,
noorwo bhutaringwibhwa‑mo obhuraka bhwa orubhuyi rwa okuseera‑ko nirusya rindi wuri!
23 Idara itaryaka rindi.
Noorwo bhutaribha‑wo obhuregesi bhwa omutwasi noorwo bhwa omwenga.
Omusi gwa Bhaabheeri gurikorwa kutyo
kwa okubha abhakaani bha ebhiinu bhyagwo
bhaariga bhari abhaanu abhakuru bha echaaro.
Ku‑bhurosi bhwa omusi ogwo, amaanga goone gajigirwe.
24 Mu‑musi omwo, ꞉gaabhonekeene‑mo isagama ya abharagi na eya abheeru bha Nyamuwanga,
aamwi na isagama ya abhaanu bhoone bhanu ꞉bheetirwe ku‑chaaro anu.”