Nyamuwanga kaakusibhwa
19
1 Ejo jejire jaawa, ninuungwa obhuraka obhunene rwa bhwa echise echinene mu‑rwire eyo. Obhuraka obhwo bhwayikaga ati,“Nyamuwanga akusibhwe!
Obhuchungusi, rikusyo na amanaga ni bhya Nyamuwanga weeswe,
2 okubha indamu yaaye ni ya chimari na ya rirenga.
Aaramura omugasi omukuru urya eegusyaga okwibhonera ribhona
unu ꞉aanyamuuye echaaro ku‑bhusengani bhwaye.
Nyamuwanga aasubhya orusiima,
inguru ya isagama ya abhakosi bhanu omugasi oyo ꞉eetire.”
3 Nibhwayika rwa kabhiri ati,
“Nyamuwanga akusibhwe!
Ingesi okusooka mu‑musi gurya
eyiituuta okuja inguru akajaanende koone.”
4 Abhakaruka makumi gabhiri na bhana bharya, aamwi na ebhibhumbwa bhina bhirya, nibhagwa bhwifumbike, nibharamya Nyamuwanga unu aariga eenyanjire ku‑chitebhe cha ingʼoma, nibhaayikaga ati, “Jibhe kutyo! Nyamuwanga akusibhwe!”
5 Nejire neeya, ninuungwa obhuraka obhundi okusooka ku‑chitebhe cha ingʼoma nibhwayikaga ati,
“Mukusye Nyamuwanga weeswe, emwe abhakosi bhaaye bhoone.
Mumukusye emwe bhanu omumuramya,
abharera na abhakuru!”
6 Nejire neeya, ninuungwa obhuraka rwa obhwa echise echinene. Obhuraka obhwo bhworeraga rwa amanji amaafu ganu agooromoka. Ka wone, bhwariga bhuri rwa obhuraka bhunene bhwa ribharuka rinu eribharuka. Nibhwayika ati,
“Nyamuwanga akusibhwe!
Okubha Raatabhugenyi Nyamuwanga weeswe owa obhuturo bhwone niwe kaatunga.
7 Eswe wone, chikonderwe,
chimusandabhire na okumukusya.
Okubha obhuregesi bhwa Omwana wa Inaama bhwakinga,
na omwenga emariiriiye.
8 Omwene ayaaywe emyenda ja ekisi
ja okungʼarabhya na niinyeru muno.”
Emyenda ja ekisi ejo, obhugajuro bhwajo ni ebhikorwa bhya rirenga bhya abheeru.
9 Maraayika urya ˆnaambwira ati, “Kaama ati, bhari na ribhando bhanu bhakokerwe mu‑bhuregesi bhwa Omwana wa Inaama.” ˆNaambwira wone ati, “Ejo nijo emisango ja echimari ja Nyamuwanga.”
10 Niwo ningwa bhwifumbike ku‑maguru ga maraayika oyo, korereki nimuramye. Nawe omwene, ˆnaambwira ati, “Siga okukora kutyo! Anye niri omukosi weejaanyu aamwi na abhayiri bhaanyu mu‑riikirisya, bhanu abhasoosya obhubhambaasi bhwa emisango ja Yeesu. Ramya Nyamuwanga omwene era! Okubha okusoosya obhubhambaasi bhwa emisango ja Yeesu nibhwo obhwambiro bhwa obhuragi.”
Omuriinyi wa ku‑fwaraasi iinyeru
11 Nejire neeya, nindora orwire rwigukire. Ringira, ifwaraasi iinyeru na unu aariga ayiriinyire‑ko kaatogwa ati “Mwiyikanyibhwa” na “Owa Echimari.” Niwe kaaramura na okurwana riremo kwa obhurengeresi. 12 Ameeso gaaye gari rwa jimbeesi ja omuriro na afwaye jitengya nyafu ku‑mutwe gwaye. Omuunu oyo akaamirwe‑ko risiina rinu omuunu woonewoone atakumenya, tari ni mwene era. 13 Ka wone afwaye omwingiro gunu gwinirwe mu‑sagama. Risiina ryaye kaatogwa ati, “Omusango gwa Nyamuwanga.” 14 Ebhise bhya abhasirikare bha mu‑rwire abhamuruubha inyuma. Abhasirikare abho bhafwaye jibhafuta jiinyeru pee, wone bhariinyire ku‑fwaraasi jiinyeru. 15 Imbanda ya obhuugi eyisooka mu‑kanwa kaaye, korereki ku‑mbanda eyo ayige amaanga. Arigatunga kwa amanaga maafu. Aritajirira riswejisyo rya jijabhiibhu rinu eryeresya risungu rya Nyamuwanga owa obhuturo bhwone. 16 Ku‑mwingiro gwaye gunu guswikiiye ribhaajwa ryaye, rikaamirwe‑ko risiina rinu,
Omukama wa abhakama na Raatabhugenyi wa bharaatabhugenyi.
17 Nejire neeya, nindora maraayika umwi ꞉eemereeguuyu kw‑isuubha. Maraayika oyo, ˆnaamura obhuraka, ˆnaabhirikira jinyonyi joone jinu ejiguruka mu‑rutumba, ˆnaajibhwira ati, “Muuje, mwikofyanye ku‑bhugenyi obhunene bhunu Nyamuwanga abheeraabhiiye. 18 Muuje murye jinyama ja abhakama, ja abhakuru bha riremo, ja abhayaari, ja jifwaraasi na ja bhanu bhajiriinyire‑ko, ja abhaanu bhoone, bha obhwitaage na abhagaya, abharera na abhakuru.”
19 Mbe, nindora rityanyi rirya rya okwamba na abhakama bha echaaro na ebhise bhyebhwe bhya abhasirikare ꞉bheekofyanyiisye aamwi. Abho bhoone, bhaariga nibhakena okurwana riremo na unu aariga eenyanjire ku‑fwaraasi iinyeru, ari aamwi na ebhise bhyaye bhya abhasirikare. 20 Nawe rityanyi, aamwi na omuragi omubheeyi unu ꞉aakorere ebhibharikisyo ku‑songa ya rityanyi eryo, ꞉bhaagwatirwe ngwatwa. Ku‑njira ya ebhiruguusyo bhinu omuragi oyo ꞉aakorere, aariga ajigire abhaanu bhanu bhaariga bhateeywe‑ko orunabho rwa rityanyi eryo na okuramya risusano ryaryo. Bhoone ku‑bhubhiri bhwebhwe nibheeswa bhari bhaanga mu‑nyanja ya omuriro omururu gwa emisimu ja echibhiriiti. 21 Omuunu unu aariga ariinyire ku‑fwaraasi iinyeru, ꞉eetire abhaanu bhanu bhaariga bhasigaaye. ꞉Aabheetire ku‑mbanda yaaye inu yaariga nisooka mu‑kanwa kaaye. Jinyonyi ejo joone, nijirya jinyama ja abhaanu abho nijiiguta.