Syetaani kaabhoywa emiguuga echiwumbi chimwi
20
1 Nejire neeya, nindora maraayika ˆneekaga okusooka mu‑rwire. Maraayika oyo, aariga ari na orwiguriro rwa okwigurira eryobho rinu ritari na obhuteero na aariga agwatiriiye riseega rinene mu‑kubhoko kwaye. 2-3 ˆNaagwata riyoka rirya, injoka irya ya kara inu eyitogwa ati Mubheeyeresya amwi Syetaani,a ˆnaaribhoya kwa riseega eryo na okuryesa mu‑ryobho rinu ritari na obhuteero. ˆNeegara orwigi rwa eryobho eryo na okurutuura‑ko orunabho. Omubheeyeresya oyo, ni bhusibhusi ariikara mu‑ryobho eryo emiguuga chiwumbi chimwi. Ku‑mwanya ogwo ataribha na obhuturo bhwa okujiga abhaanu ku‑chaaro anu. Aribha emiguuga chiwumbi chimwi jaawa, ariigurirwa kwa omwanya mufuyi era.4 Nejire neeya, nindora ebhitebhe bhya obhutungi bhinyanjirwe‑ko bhanu bhaariga bhayaaywe obhuturo bhwa okusoosya indamu. Abho, jaariga jiri emitima ja abhaanu bhanu ꞉bheetirwe isonga iri ati, ꞉bhaasoosiisye obhubhambaasi inguru ya Yeesu na okuraasya emisango ja Nyamuwanga. ꞉Bhataaramiisye rityanyi rirya noorwo risusano ryaryo. ꞉Bhateekirisiisye okutuurwa‑ko orunabho rwa rityanyi eryo ku‑bhisuusu bhyebhwe noorwo ku‑mabhoko geebhwe. Mbe abhaanu abho nibhasuuruka, nibhatunga aamwi na Kirisito emiguuga chiwumbi chimwi. 5 Abhafuuwe abhandi bhatarisuuruka okukingira emiguuga chiwumbi chimwi jikuumire. 6 Obhusuuruko bhurya bhwa abhaana bha Nyamuwanga nibhwo obhusuuruko bhwa okwamba. Bhari na amabhando bhanu bharisuuruka mu‑bhusuuruko obhwo, ka wone nibho abheeru bha Nyamuwanga. Okubha okufwa kwa kabhiri kutaribha na amanaga inguru yeebhwe. Abho bharibha abhagabhisi bha Nyamuwanga na Kirisito, bharitunga aamwi nage ku‑mwanya ogwo gwa emiguuga chiwumbi chimwi.
Syetaani kaasingaarisibhwa
7 Aribha emiguuga chiwumbi chimwi jaawa, Syetaani ariigurirwa okusooka mw‑ibhoyero ryaye. 8 Mbe, omwanya gunu ariigurirwa, arigenda okujiga amaanga mbaara joone ja echaaro, ganu agatogwa Googu na Amagogi. Syetaani aribhakofya korereki bharwane riremo, wone bharibha abharuubhirisya bhaafu rwa omusenyi gwa inyanja. 9 Abho bhariribhata mbaara joone ja echaaro na okusingira omusi gunu Nyamuwanga keenda. Omwo nimwo bheekaaye abheeru bha Nyamuwanga. Nawe omwanya gunu bharisingira omusi ogwo, omuriro guriika okusooka mu‑rwire na okubhasingaarisya. 10 Syetaani unu aabhajigaga, aryeswa mu‑nyanja ya omuriro omururu gwa emisimu ja echibhiriiti. Omwo nimwo ꞉ryeeserwe rityanyi rirya na omuragi omubheeyi urya. Abho bhoone bharinyaasibhwa omwo mu‑ngeta na mu‑mwisi, akajaanende koone.
Indamu ya obhuteero
11 Nejire neeya, nindora Nyamuwanga eenyanjire ku‑chitebhe echeeru echinene cha ingʼoma. Orutumba na echaaro nibhiiruka okusooka imbere yaaye na ꞉bhitaabhonekeene rindi. 12 Nindora abhafuuwe bhoone, abharera na abhakuru, bheemereeguuyu imbere ya echitebhe cha ingʼoma. Niwo ebhitabho bhinu bhyariga bhikaamirwe‑mo ebhikorwa bhya abhaanu bhoone nibhifumburwa. Echitabho echindi nichifumburwa, echo nicho echitabho cha obhuwanga. Abhafuuwe abho nibharamurwa okuruubhana na ebhikorwa bhyebhwe bhinu bhyariga bhikaamirwe mu‑bhitabho omwo. 13 Inyanja nisoosya abhafuuwe bhanu bhaariga bhari‑mo. Orufu na nyombe wone nibhisoosya abhafuuwe bhanu bhaariga bhari‑mo. Bhuri umwi weebhwe ˆnaaramurwa okuruubhana na ebhikorwa bhyaye. 14 Ejo jejire jaawa, orufu na nyombe nibhyeswa mu‑nyanja ya omuriro omururu. Inyanja ya omuriro eyo, nirwo orufu rwa kabhiri. 15 Omuunu woonewoone unu risiina ryaye ryariga ritakaamirwe mu‑chitabho cha obhuwanga, oyo wone ꞉eeserwe mu‑nyanja ya omuriro.