Obhusweruro 21

Echaaro echiyaaya

1 Nejire neeya nindora orutumba oruyaaya na echaaro echiyaaya, okubha orutumba rwa okwamba na echaaro cha okwamba bhyariga bhyasoosiibhwe‑wo, noorwo inyanja yaariga itari‑wo rindi. 2 Mbe, nindora omusi omweru, nigwo Yerusareemu inyaaya, nigwika okusooka mu‑rwire ku‑Nyamuwanga. Omusi ogwo gwariga gunojooribhwe rwa kutyo omwenga kaanojooribhwa inguru ya omurume waaye. 3 Ninuungwa obhuraka obhunene okusooka ku‑chitebhe chirya cha ingʼoma, nibhwayikaga ati, “Ringira! Obhwikaro bhwa Nyamuwanga nibhwo obhwikaro bhwa abhaanu wone. Ariikara aamwi na abhaanu, bharibha abhaana bhaaye, omwene wone aribha Nyamuwanga weebhwe. 4 Aryeya amasiga geebhwe goone. Abhaanu bhatarifwa rindi noorwo okusurumbara. Bhataririra noorwo bhatarirwara, okubha emisango ja kara ejo jaaturire.”

5 Neeya unu aariga eenyanjire ku‑chitebhe cha ingʼoma ˆnaayika ati, “Ringira, enikora bhuri chiinu okubha echiyaaya!” ˆNaambwira wone ati, “Kaama ati, ejo ni misango ja okwiyikanyibhwa na ja echimari.” 6 ˆNaambwira rindi ati, “Jakuumiiye! Anye naanye Obhwambiro na Obhuteero, anye naanye unu enaambisya emisango joone na okujikuumisya. Bhuri muunu unu ari na obhwiro bhwa amanji, nirimuyaana amanji ga okunywa okusooka mu‑mimiro ja amanji ganu agasoosya obhuwanga, atagurire wuri. 7 Omuunu woonewoone unu ariyiga, nirimuyaana amabhando ago goone. Anye niribha Nyamuwanga waaye, omwene aribha omwana waani. 8 Nawe abhoobha, abhaanu bhanu bhatakwikirisya Nyamuwanga, bhanu abhamufuruurusya, abheeti, abharomesi, abharosi na bhanu abharamya amasusano, aamwi na abhabheeyi, bhoone abho orubhaara rwebhwe ni mu‑nyanja ya omuriro omururu gwa emisimu ja echibhiriiti. Okwo nikwo okufwa kwa kabhiri.”

Yerusareemu inyaaya

9 Neeya owumwi wa bhamaraayika bhataanu na bhabhiri bharya, bhanu bhaariga bhari na amabhakuri gataanu na gabhiri ga jitambara etaanu na ebhiri ja obhuteero, ˆnaaja ˆnaambwira ati, “Iija enu, nikweresye omwenga, unu aribha omugasi wa Omwana wa Inaama.” 10 Niwo Mwoyo Mweru ˆneeka inguru yaani, maraayika oyo ˆnaansira ku‑chiima echinene echireera. ˆNaanyeeresya omusi omweru Yerusareemu, nigwikaga okusooka mu‑rwire ku‑Nyamuwanga. 11 Omusi ogwo, gwariga guri na rikusyo rya Nyamuwanga na gwangʼarabhyaga rwa ribhuyi rya obhugusi obhurambu rya yaasipi rinu ryabharangiryaga rwa rirore. 12 Wone, gwariga guri na indugu inene ireeyere, iri na emiryango ekumi na ebhiri. Bhuri omuryango gwarindwaga na maraayika, ka wone bhuri omuryango, gwariga gukaamirwe‑ko risiina rya oruganda rumwi ku‑ngʼanda ekumi na ebhiri jirya ja Yisirayeeri. 13 Bhuri orubhaara rwariga ruri na emiryango esatu; ebhuwuruka esuubha, ebhuwanga, ebhurimbe na ebhugwa esuubha. 14 Indugu eyo, yaariga yumbakirwe ku‑mabhuyi ekumi na gabhiri ga orufuka. Bhuri ribhuyi ryariga rikaamirwe‑ko risiina rya owumwi wa jitumwa ekumi na bhabhiri bha Omwana wa Inaama.

15 Mbe, maraayika unu aariga ˆnaayika naanye, aariga ari na risekeyanda rya inaaryo rya okurengera. ꞉Aagegere risekeyanda eryo, korereki arenge omusi ogwo, emiryango jaagwo na indugu yaagwo. 16 Mbe, ˆnaarenga omusi gurya, obhureera, obhugari na obhwina bhwagwo. Indengo yaabhyo yaariga iringʼene mbaara joone. ꞉Aabhwene ati indengo eyo, yaariga iri kiromeeta bhiwumbi bhibhiri na magana gana (2,400). 17 ˆNaarenga obhugari bhwa indugu eyo, nibhubha mabhoko egana na makumi gana na ena (144). Indengo inu aarengeraga, niyo indengo inu abhaanu bhanarire okurengera.

18 Indugu eyo, yaariga yumbakiiywe amabhuyi ga obhugusi obhurambu ga yaasipi. Omusi ogwene wone gwariga guumbakiiywe inaaryo ya ekisi ya okubharangirya rwa rirore. 19 Orufuka rwa indugu ya omusi ogwo, rwariga runojooribhwe kwa amabhuyi ga bhuri mbaga ga obhugusi obhurambu. Ribhuyi rya okwamba, ryariga riri yaasipi, rya kabhiri, ryariga riri yakuuti ya obhururu, rya kasatu, ryariga riri karikedooni. Ribhuyi rya kana, ryariga riri sumaradi, 20 rya kataanu, ryariga riri saridooniki, rya kataanu na rimwi, ryariga riri yakiki. Ribhuyi rya kataanu na kabhiri, ryariga riri kirisoorito, rya kataanu na kasatu, ryariga riri jabharajaadi, rya kataanu na kana, ryariga riri yakuuti ya echiwondo, rya ekumi, ryariga riri kurisopuraso, rya ekumi na rimwi, ryariga riri yaakito, rya ekumi na ebhiri, ryariga riri ameetisito. 21 Amarango ekumi na ebhiri ago goone, gaariga gakonjerwe kwa iruuru. Bhuri rango, ryariga rikonjerwe kwa iruuru imwi era! Riparapara rinene rya omusi ogwo, ryariga rikonjerwe kwa inaaryo ya ekisi, inu yaariga nibharangirya rwa rirore.

22 Mu‑musi omwo, ꞉nitaarorere‑mo Riyekaru rya Nyamuwanga, kwa okubha Nyamuwanga, Raatabhugenyi owa obhuturo bhwone, aamwi na Omwana wa Inaama nibho Riyekaru ryagwo. 23 Omusi ogwo gutakukena esuubha ryake‑mo amwi okwesi kwake‑mo okubha rikusyo rya Nyamuwanga niryo erimirika‑mo, na Omwana wa Inaama niwe idara yeende‑mo. 24 Abhaanu bha amaanga goone bhariikara mu‑bhweru bhwa omusi ogwo na abhakama bha echaaro bhariingira omwo okusira‑mo ebhiinu bhyebhwe bhya obhugusi obhurambu. 25 Amarango goone ga omusi ogwo garibhaga geguuywe omwanya gwone, okubha ingeta itaribha‑wo. 26 Abhaanu bha amaanga goone ku‑chaaro, bharireeta obhuniibhi bhwebhwe na ebhiinu bhyebhwe bhya obhugusi obhurambu mu‑musi omwo. 27 Nawe echiinu choonechoone chinu chiri echijabhi chitariingira mu‑musi omwo noorwo na akatyari, noorwo omuunu woonewoone unu kaakora emisango jinu ejifuruurusya amwi ja orubheeyi. Tari bhanu bhariingira mu‑musi omwo ni bharya era bhanu amasiina geebhwe gakaamirwe mu‑chitabho cha obhuwanga cha Omwana wa Inaama.