Omusima gwa amanji ga obhuwanga
22
1 Neeya maraayika urya ˆnaanyeeresya omusima gwa amanji ganu agasoosya obhuwanga. Omusima ogwo gwariga nigubharangirya rwa rirore na gwariga niguwurura okusooka mw‑ifuufu rya echitebhe cha ingʼoma cha Nyamuwanga na Omwana wa Inaama. 2 Amanji ga omusima ogwo, gaawururaga nigatura agatigati ya riparapara rikuru rya omusi ogwo. Mbaara joone ja omusima ogwo, ryariga riri‑wo riiti rinu erisoosya obhuwanga bhwa akajaanende koone. Riiti eryo, ryatwasyaga amatwasyo kwiya rumwi ku‑kwesi na kwiya ekumi na ebhiri ku‑muguuga. Amasya ga riiti eryo ni muti gwa okuwosya amaanga.3 Omusi ogwo, gutaribha‑mo echiinu choonechoone chinu chiiyiimirwe na Nyamuwanga. Echitebhe chirya cha ingʼoma cha Nyamuwanga na Omwana wa Inaama chiribha mu‑musi omwo. Abhakosi bhaaye wone, bhariramya Nyamuwanga. 4 Bharirora obhusu bhwaye na bhuri muunu risiina rya Nyamuwanga ririkaamwa ku‑chisuusu chaaye. 5 Ingeta itaribha‑mo rindi mu‑musi omwo. Abhaanu bhatarikena idara noorwo risuubha, okubha Raatabhugenyi Nyamuwanga aribha obhweru bhwebhwe. Abhaanu abho bharitunga akajaanende koone.
Emisango ja obhuteero
6 Neeya maraayika oyo, ˆnaambwira ati, “Emisango jinu ni ja okwiyikanyibhwa na ja echimari. Raatabhugenyi Nyamuwanga unu kaayaana abharagi Mwoyo Mweru waaye, ꞉aatumire maraayika waaye okweresya abhakosi bhaaye emisango jinu ni bhusibhusi jikorekane bhwangu.”
7 Yeesu kaayika ati, “Tegeresya! Eniija bhwangu. Bharibhona amabhando bhanu abhagayuka na okuruubha emisango ja obhuragi bhwa echitabho chinu.”
8 Anye Yowana, naanye ꞉noonguuwe na okurora emisango ejo. Nejire naajuungwa na okujirora, ꞉naaguuwe bhwifumbike ku‑maguru ga maraayika unu ꞉aanyeresiisye emisango ejo, korereki nimuramye. 9 Nawe omwene, ˆnaambwira ati, “Siga okukora kutyo! Anye niri omukosi weejaanyu aamwi na abharagi bhanu bhari abhayiri bheejaanyu mu‑riikirisya na bhoone bhanu abhagayuka emisango ja echitabho chinu. Ramya Nyamuwanga omwene era!”
10 Neeya maraayika oyo, ˆnaambwira ati, “Waasiga okusereka emisango ja obhuragi bhwa echitabho chinu, okubha joone jinu jaayikirwe omwo ejija okukorekana bhwangu. 11 Mbe, omuunu unu kaakora ebhibhiibhi, agenderere okubhikora na omujabhi echinyamwoyo agenderere okujabhiyara. Omuunu unu kaakora obhurengeresi, agenderere okukora ja obhurengeresi na omweru agenderere okubha omweru.”
12 Yeesu kaayika ati, “Tegeresya! Eniija bhwangu! Eniija okuriya bhuri muunu okuruubhana na ebhikorwa bhyaye. 13 Anye naanye Obhwambiro na Obhuteero,a anye naanye unu enaambisya emisango joone na okujikuumisya.”
14 Bharibhona amabhando, abhaanu bhanu abhafura emingiro jeebhwe mu‑sagama ya Omwana wa Inaama, korereki bheekirisibhwe okwingira mu‑musi omuyaaya ogwo okutura ku‑marango gaagwo na okurya amatwasyo ga riiti rinu erisoosya obhuwanga bhwa akajaanende koone. 15 Nawe, abharosi bhoone, abharomesi, abheeti, abhaanu bhanu abharamya amasusano na abhaanu bhoone bhanu abheenda okwayika orubheeyi, bharibha anja ya omusi ogwo rwa jimbwa.
16 “Anye Yeesu, naanye orwibhuro orukuru rwa omukama Dawudi, naanye eniseekaana rwa inyamaananga. Anye, naanye unu ꞉naatumire maraayika waani mu‑makanisa, korereki abhwire emwe abharuubhirisya bhaani emisango jinu.”
17 Mwoyo wa Nyamuwanga na omwenga wa Omwana wa Inaama abhabhirikira Raatabhugenyi Yeesu, nibhaayika ati, “Iija!” Abhaanu bhoone wone bhanu bharyungwa emisango ejo bhaayike ati, “Iija!” Woonewoone unu ari na obhwiro, aaje anywe amanji ganu agasoosya obhuwanga, atagurire wuri.
Emisango ja okukengya
18 Enikengya bhuri unu aryungwa emisango ja obhuragi bhwa echitabho chinu, ati, omuunu akoongesya‑ko emisango, Nyamuwanga wone arimwongesisya‑ko jitambara jinu ejitogorwa mu‑chitabho chinu. 19 Omuunu woonewoone akasoosya‑mo omusango gwonegwone okusooka ku‑misango ja obhuragi bhwa echitabho chinu, Nyamuwanga wone atariikirisya omuunu oyo okurya amatwasyo ga riiti rinu erisoosya obhuwanga bhwa akajaanende koone noorwo okwikara mu‑musi omweru gunu emisango jaagwo jikaamirwe mu‑chitabho chinu.
20 Omwene unu kaasoosya obhubhambaasi bhwa emisango jinu kaayika ati, “Chimari, eniija bhwangu.”
Jibhe kutyo. Iija Raatabhugenyi Yeesu!
21 Obhwitiriranya bhwa Raatabhugenyi Yeesu bhubhe aamwi na emwe bhoone. Jibhe kutyo.