Obhusweruro bhwa Yowana
Ameeresyo ga echitabho chinu
1
1 Bhunu nibhwo obhusweruro bhwa Yeesu Kirisito. Nyamuwanga ꞉aamusweruriiye, korereki eeresye abhakosi bhaaye emisango jinu ni bhusibhusi jikorekane bhwangu. Yeesu wone ˆnaaragirira maraayikaa waaye okunnyeeresya emisango ejo anye omukosi waaye Yowana. 2 Anye Yowana enisoosya obhubhambaasi bhwa emisango joone jinu ꞉naarorere. Emisango ejo ni inguru ya echimari chinu Yeesu Kirisito ꞉aasweruuye na nigwo omusango gwa Nyamuwanga.3 Nyamuwanga ariyaana amabhando abhaanu bhoone bhanu bharisomera abheejaabho emisango ja obhuragi obhwo. Ka wone, ariyaana amabhando bhanu bharigutegeresya na okuruubha jinu jikaamirwe mu‑chitabho munu, okubha, omwanya gwa okukorekana emisango ejo guri yeeyi.
Obhukeesya
4 Inyarubha inu, niikaamire anye Yowana. Enikaamira emwe abharuubhirisya bha Yeesu bha mu‑makanisa gataanu na gabhiri ganu gari mu‑chaaro cha Asiya Inooto.b
Enibhasabhirwa bhwitiriranya na omurembe okusooka ku‑Nyamuwanga unu ari‑wo, unu aariga ari‑wo na unu aribha‑wo, okusooka ku‑myoyo etaanu na ebhiric jinu jiri imbere ya echitebhe cha ingʼoma 5 na okusooka ku‑Yeesu Kirisito. Omwene niwe omubhambaasi omwiyikanyibhwa. ꞉Aabheeye wa okwamba okusuururwa korereki abhe omukama wa abhakama bhoone mu‑chaaro.
Yeesu acheendere. Okutura ku‑sagama yaaye ꞉aachoosiisye ebhibhiibhi bhyeswe. 6 Achikorere okubha obhukama bhwa abhagabhisi korereki chikorere emirimu Nyamuwanga, Esemwene. Omwene ayaanwe rikusyo na obhuturo akajaanende koone! Jibhe kutyo.
7 Muringire! Ariija ari ku‑meere!d
Abhaanu bhoone bharimurora,
noorwo bhanu ꞉bhaamusomere, wone bharimurora.e
Jingʼanda joone mu‑chaaro jiririra inguru yaaye.
Chimari nikwo kutyo jiribha. Jibhe kutyo.
8 Raatabhugenyi Nyamuwanga kaayika ati, “Naanye Obhwambiro na Obhuteero.f Anye niri‑wo, naariga niri‑wo na niribha‑wo. Anye niri Nyamuwanga owa obhuturo bhwone.”
Yowana kaarora Kirisito mu‑chiroro
9 Anye Yowana niri omuyiri waanyu mu‑riikirisya. Echisangira aamwi mu‑bhwigumiirisya ebhinyaasyo inguru ya Yeesu na obhukama bhwaye. Naariga nisirirwe kw‑isinga rinu eritogwa ati Paatimo. ꞉Naasirirwe kw‑isinga eryo rwa omubhoywa ku‑songa ya okuraasya omusango gwa Nyamuwanga na okusoosya obhubhambaasi inguru ya Yeesu. 10 Rusuku rumwi, ruri rusuku rwa Raatabhugenyi Yeesu, Mwoyo Mweru ˆneeka inguru yaani. Awoawo ninuungwa obhuraka obhunene inyuma yaani, obhuraka rwa bhwa ingʼombi. 11 Obhuraka obhwo nibhumbwira ati, “Kaama mu‑chitabho emisango joone jinu owuja okurora. Ukamara usire echitabho echo mu‑makanisa ganu gari mu‑misi etaanu na ebhiri jinu jiri Yefeeso, Simuriina, Perigaamo, Tiyaatira, Sariidi, Firadeefiya, na Rawodeekiya.”
12 Mbe, niniikebhuukira okurora unu aariga ˆnaayika na anye, nindora emitereko etaanu na ebhiri ja inaaryo ja okutuura‑ko jidara. 13 Agatigati ya jidara ejo, nindora omuunu ˆnaasusana rwa Omwana wa Omuunu,g afwaye omwingiro omureera na omuchipi omugari gwa inaaryo mu‑chifubha. 14 Jifwiri jaaye jaariga jiri nyeru pee rwa amagaafu, ka wone, rwa amabhuyi ameeru muno ga ingʼubha. Ameeso gaaye gaariga nigangʼarabhyaga rwa jimbeesi ja omuriro. 15 Amaguru gaaye gaariga nigangʼarabhya muno rwa echuuma echitukurasi chinu choochiibhwe mu‑muriro gwa mu‑ruyiija. Obhuraka bhwaye bhwariga bhuri rwa echiwurumo cha amanji amaafu ganu agooromoka mu‑matoryongo. 16 Mu‑kubhoko kwaye kwa ebhuryo aariga ari na jinjota etaanu na ebhiri. Imbanda ya amoogi gabhiri yaariga nisooka mu‑kanwa kaaye. Obhusu bhwaye bhwariga nibhungʼarabhya rwa risuubha kutyo eriseekaana.
17 Nejire naamurora, ningwa ku‑maguru gaaye bhwifumbike wuti nifuuwe. Nawe, ˆnaankuunʼya‑ko na okubhoko kwaye kwa ebhuryo, ˆnaambwira ati, “Siga okuubhaya! Anye niri wa okwamba na owa obhuteero. 18 Naanye unu niri omuwanga! Naariga nifuuwe, nawe woori, rora, niri omuwanga rindi akajaanende koone! Ka wone, anye niri na jinyiguriro ja orufu na ja nyombe.h
19 “Woori kaama emisango jinu waarora, jinu ejikorekana woori kutya na jinu jirikorekana aribha ejo jaatura. 20 ꞉Waarorere jinjota etaanu na ebhiri mu‑kubhoko kwani kwa ebhuryo. ꞉Waarorere wone emitereko etaanu na ebhiri ja inaaryo ja okutuura‑ko jidara. Siga nikwiyigisye obhugajuro bhwa jimbisike ejo. Ebhituumo bhirya ni amakanisa garya agataanu na gabhiri, jinjota jirya etaanu na ebhiri ni bhamaraayika bha amakanisa ago.”i