Obhusweruro bhwa Yowana
Obhutangati
Omukaami wa echitabho chinu keemenyesya ati ni Yowana, omwene ni mukosi wa Nyamuwanga (1:1, 9). Abheengeeso bhaafu abheetogera ati, Yowana oyo aariga ari omwiyigisibhwa wa Yeesu (Mataayo 10:2; Maariko 3:17). ꞉Aakaamire wone Emisango ja Ekisi jinu ejibhirikirwa kw‑isiina ryaye aamwi na jinyarubha esatu ja Yowana.
Echitabho chinu, ꞉chaakaamirwe omwanya gunu omukama Domitiyaani aariga ˆnaatunga Ruumi eyo. Aariga ari murakoko na aariga ˆnaanyaasya muno abheekirisya. Abhaanu bhanu Yowana ꞉aakaamiiye echitabho chinu ni bheekirisya bha mu‑makanisa gataanu na gabhiri ga mu‑chaaro cha Asiya Inooto chinu siku jinu echitogwa ati Ebhuturuuki. Abheekirisya abho, bhaariga bhari na ebhinyaasyo bhyafu muno bhinu Domitiyaani oyo ꞉aambisiisye. ꞉Bhaanyaasiibhwe ku‑songa ya okwikirisya omusango gwa Nyamuwanga na ku‑songa ya okuruubha Yeesu Kirisito.
Yowana ꞉aabhakaamiiye korereki abhasimbiisye. ꞉Aabhabhwiriiye ati bheegumiirisye mu‑bhinyaasyo okukingira ku‑bhuteero (2:7, 11, 17, 26, 3:5, 12, 21). ꞉Aabhabhwiriiye bheegumiirisye kwa okubha ebhinyaasyo ebhyo ni bhya mwanya mufuyi era. Ka wone, bhasombookerwe obhutinge bhwa Nyamuwanga inguru ya obhuteero bhwa echaaro. Yeesu arisubha ku‑chaaro kunu, obhujabhi bhwone bhurisingaarisibhwa, na abheekirisya bharirama aamwi na Yeesu akajaanende koone.
Emisango emyafu mu‑chitabho chinu ejaayikwa mu‑bhibharikisyo. Yowana ꞉aarorere emisango ejo mu‑bhiroro abhwerubhweru. Ku‑chijekekanyo, mu‑muryango gwa okwamba (1:12) Yowana kaarora ebhituumo bhitaanu na bhibhiri bhya inaaryo bhya okwikasya‑mo jidara. Nichiiya nichibhwirwa ati, obhugajuro bhwa ebhituumo ebhyo ni ati, bhuri chimwi echiimereeguru inguru ya rikanisa rimwi.