Yuuda 1

Inyarubha ya

Yuuda

Obhukeesya

1 Inyarubha inu, niikaamire anye Yuuda. Anye, niri mukosi wa Yeesu Kirisito, ka wone, niri mumura waabho Yakobho. Enikaamira emwe abhaanu bhanu mubhirikiiywe na Raata Nyamuwanga. Omwene kaabheenda, na kaabhaangarira kisi okukingira anu Yeesu Kirisito ariijira.

2 Echigongo, omurembe na eryenda okusooka ku‑Nyamuwanga bhyongesibhwe kw‑imwe.

Indamu ku‑bheeyigisya bha orubheeyi

3 Abheendwa bhaani, neegombaga muno okubhakaamira inguru ya obhuchungusi bhunu echisangira aamwi bhoone. Nawe, woori enirora ati, ni bhusibhusi nibhakaamire inyarubha inu, korereki nibheerembeeresye ati, murwanirire echimari cha eriikirisya rinu Nyamuwanga ꞉aayaaye abheeru^a bhaaye rumwi era. 4 Enibhakaamira inyarubha inu, kwa okubha bhari‑wo abheeyigisya abharebhe bha orubheeyi bhanu bheeyingisiisye mw‑imwe bhumbise. Abhaanu abho, bhatakugayuka Nyamuwanga. Mu‑meeyigisyo gwebhwe, abhayindura obhwitiriranya bhwa Nyamuwanga weeswe, abhakora bhubhe rwa isonga ya okukora emisango ja orukubho. Ka wone, abheegaana Raatabhugenyi weeswe Yeesu Kirisito, omutangasya weeswe omukuru. Nawe okwambira kara jikaamirwe mu‑Bhikaame Ebhyeru ati, abhaanu abho, bhariramurwa rwa kutyo abhandi ꞉bhaaramuuywe.

5 Noorwo kutyo mumenyere kisi ejo joone, enikena okubheechukya kutyo Raatabhugenyi ꞉aawoniisye Abhayisirayeeri okusooka mu‑chaaro cha Miisiri munu bhaariga nibhanyaaka, nawe ejire aamara ˆnaasingaarisya abhaanu bhanu ꞉bhaaremere okumwikirisya.^b 6 Ka wone, mwichuke bhamaraayika bhanu ꞉bhateeyirwe na obhukuru bhwebhwe,^c nibhasiga obhwikaro bhwebhwe. Nyamuwanga abhateeye mu‑chisuute echirafuru, abhabhoyere na amaseega ga akajaanende. Eyo abharindirira orusuku orukuru rwa okuramurwa. 7 Mwichuke wone, jinu ꞉jaabhwene abhaanu bha emisi ja Sodoma na Gomoora na bha emisi jinu jaariga jisiijeene nabho. Abhaanu abho, ꞉bhaakorere emisango rwa jinu bhamaraayika abho, ꞉bhaakorere. Bhaakoraga obhuromesi na okuruubha okurigira okubhiibhi kwa emibhiri kunu kutari kwa obhusimukwa. Indamu yeebhwe, yaariga iri okwochiibhwa mu‑muriro. Kurwa ejo, indamu eyo yaabha echijekekanyo cha okuyaanwa ebhitiibha mu‑muriro gwa akajaanende koone.^d

8 Noorwo kutyo indamu ya Nyamuwanga iri kutyo, abheeyigisya bha orubheeyi bharya, abharoota ebhirooto bhinu ebhireterera bhajabhiyaasye emibhiri jeebhwe, abherema obhuturo bhwa Nyamuwanga na okufuma ebhibhumbwa ebhya rikusyo bhya mu‑rwire. 9 Noorwo Mikayeeri, maraayika omukuru,^e omwanya gunu aariga ˆnaabhusyanya na okubhambasyanya na Syetaani^f inguru ya omutumbi gwa Muusa, ꞉ataaregeejere okuramura Syetaani kwa okumufuma. Tari ꞉aamubhwiriiye ati, “Raatabhugenyi omwene akugonye!” 10 Nawe abhaanu abho, abhafuma emisango jinu bhatakusombookerwa. Ka wone, emisango jinu bhasimukire bhajisombookeeywe rwa jityanyi jinu jitari na obhwenge, ejo nijo ejibhasingaarisya.

11 Jiribhabhona, kwa okubha bharuubhire orugere rwa Kayini na okukora ebhibhiibhi.^g Bheeyingisiisye mu‑chikayo, korereki bhabhone ribhona, rwa kutyo Bharaamu ꞉aakorere.^h Bharisingaarika inguru ya bhunyatagayuka bhwebhwe, rwa kutyo Koora ꞉aasingaarikire inguru ya bhunyatagayuka bhwaye.ⁱ 12 Abhaanu abho, omwanya gunu omurya ebhiryo aamwi nabho mu‑bhugenyi bhwemwe bhwa eryenda, abharya keenu nibheegana abheene era, bhatakwiswara wuri. Abhaanu abho, bhari rwa ebhyaji bhya mu‑nyanja bhinu bhitakubhonekana,^j ni ngʼanga kw‑imwe. Bhatari na omuriiro gwonegwone, bhari rwa ameere ganu gatari‑mo amanji, omuyaga ogugayemba na okugasira woonewoone. Bhari rwa amati ganu gawungurukire, gafuuwe kwiya kabhiri, nikwo okwayika ati gatari na amatwasyo, na geeyirwe chimwi. 13 Bhatakutura okwiyingirira, bhari rwa amakonjo amanene ga mu‑nyanja ganu agasaaruuma, na ebhikorwa bhyebhwe bhya jiswaro ebhiswirana rwa rifiro rya amakonjo kutyo erifukumba. Bhari rwa jinjota jinu ejiyengayenga na okubhura. Echisuute echirafuru ti chibhiikirwe inguru yeebhwe akajaanende koone.

14 Enooke, omuunu wa riyimbo rya kataanu na kabhiri okusookerera ku‑Adaamu,^k ꞉aasoosiisye obhuragi inguru ya abhaanu abho ati, “Ringira, Raatabhugenyi kaaja ari na bhamaraayika bhaaye abheeru ebhiwumbi na ebhiwumbi. 15 Kaaja korereki aramure abhaanu bhoone na okuyaana ebhitiibha bhanu bhatakugayuka Nyamuwanga inguru ya ebhikorwa bhyebhwe bhyone ebhibhiibhi, na inguru ya emisango emijabhi joone jinu abha ebhibhiibhi bhaayikire inguru yaaye.” 16 Abheeyigisya bha orubheeyi bharya abhajujuuma na okutongʼanira abhandi, keenu nibharuubha okurigira kwebhwe okubhiibhi. Abheekuuya muno na okwayika emisango ja okukondisya abhaanu, isonga iri ati, bheebhonere omuriiro.

Okukengya na okutongera

17 Nawe emwe abheendwa bhaani, mwichukega emisango jinu jitumwa^l ja Raatabhugenyi weeswe Yeesu Kirisito ꞉bhaayikire kara. 18 Bhaabhabhwiraga ati, “Mu‑siku ja obhuteero bhariibhuka abhaanu abha okusiijaaka, bhanu bhariruubhaga okurigira kwebhwe okubhiibhi.”^m 19 Abhaanu abho, nibho abhareterera okwawukana, abheeganirisya emisango ja ku‑chaaro era, bhatari na Mwoyo wa Nyamuwanga.

20 Nawe emwe abheendwa bhaani, mwimaririre mu‑chimari cha eriikirisya ryemwe rinu riri eryeru muno, musabhwega ku‑bhuturo bhwa Mwoyo Mweru. 21 Kwa okukora kutyo, mwiyangarirega mu‑ryenda rya Nyamuwanga, nimugenderera okurindirira obhuwanga bhwa akajaanende koone, bhunu muriyaanwa na Raatabhugenyi weeswe Yeesu Kirisito ku‑chigongo chaaye. 22 Mufwire echigongo abhaanu abhandi bhanu abheetimaata. 23 Abhaanu abhandi mubhawonʼyega kwa okubhasaakura okusooka mu‑muriro gwa indamu. Abhaanu abhandi mubhafwire echigongo, nawe wone mwiyangarire, na okwikenga obhubhiibhi bhwebhwe bhwone.

Risabhwa rya okukuuya

24 Nyamuwanga niwe owa obhuturo bhwa okubhaangarira, korereki mwasiga okwikuujura. Ka wone, kaatura okubheemereegusyu mw‑ikusyo ryaye, nimusandabhaga muno, mutaabha‑ko esoro. 25 Omwene niwe Nyamuwanga era, niwe Omuchungusi weeswe okutura ku‑Yeesu Kirisito Raatabhugenyi weeswe. Nyamuwanga akusibhwe muno, kwa okubha omwene ari na rikusyo, obhukuru, amanaga na obhuturo, okwambira kara, woori, noorwo akajaanende koone. Jibhe kutyo.