Ameeyigisyo ku‑bhaana na ku‑bheebhusi bheebhwe
6
1 Emwe abhaana, mugayukega abheebhusi bheemwe kwa okubha muri na obhumwi na Raatabhugenyi, ogwo nigwo gwiyire. 2 “Uyaane esomwana na nyokomwana echibharo,” echo nicho echiraagiro cha okwamba chinu chiri na omurago, na nigwo gunu, 3 “korereki ubhone amabhando na okurama siku nyafu ku‑chaaro kunu.”a4 Emwe bharaata wone, mwasiga okusoogorya abhaana bheemwe, nawe mubharere, nimubhatongeraga na okubheeyigisya amaragiriro ganu agasooka ku‑Raatabhugenyi.b
Ameeyigisyo ku‑bhagaya na ku‑bhaami bheebhwe
5 Emwe abhagaya, mugayukega abhaami bheemwe bha echinyamubhiri mu‑bhuubha na mu‑kuyarara. Mukorega kutyo, mu‑mutima omweru, rwa kutyo omukorera Kirisito. 6 Mubhagayukega, itari ku‑mwanya gunu abhabharora, muri rwa abhaanu bhanu abheekondya, tari mukuumisyega okwenda kwa Nyamuwanga kwa mwoyo gwone, rwa abhakosi bha Kirisito. 7 Mukorega emirimu jeemwe mu‑mutima gwa ekisi, nimukorera Raatabhugenyi bhatari bhaanu. 8 Mukore kutyo, kwa okubha mumenyere ati, Raatabhugenyi ariyaana bhuri muunu echiyaanwa ku‑bhuri musango gwa ekisi gunu kaakora, abhe ari mugaya amwi unu ari na obhwitaage.c
9 Emwe abhaami wone, mukorerega abhagaya bheemwe kutyokutyo. Mwasiga okubhakanga, okubha mumenyere ati, emwe na abheene muri na Raatabhugenyi umwi era mu‑rwire. Omwene oyo, atari na isoroore ku‑bhaanu.d
Ebhigwato bhyone bhya Nyamuwanga
10 Ku‑bhuteero, mubhega na amanaga ga echinyamwoyo mu‑Raatabhugenyi na mu‑bhuturo bhwa amanaga gaaye. 11 Mugege ebhigwato bhyone bhya Nyamuwanga, korereki muture okuyingirira obhurigerige bhwa Syetaani na okwimereeguru tiritiri. 12 Okubha riremo ryeswe, chitakurwana na omubhiri amwi isagama, nawe echirwana na obhutungi, obhuturo, abhakuru bha echisuute cha echinyamwoyo na amayijo ga amasambwae mu‑chaaro chinyatarorwa. 13 Kurwa ejo, mugege ebhigwato bhyone bhya Nyamuwanga, korereki mukomeere tiritiri ku‑rusuku orwa ebhibhiibhi. Aribhaga mwakuumisya ejo joone nimwimereeguru. 14 Mbe, mwimereeguru mwibhoyere echimari rwa rikebhete mu‑bhibhunu na okufwara obhurengeresi rwa ingubha ya echuuma ku‑bhifubha, 15 obhwira bhwemwe bhwa okuraasya Emisango ja Ekisi jinu ejireeta omurembe obhukenwa bhubhe rwa ebhiraato ku‑maguru geemwe. 16 Aamwi na ejo joone, mugege ingubha ya eriikirisya, inu irikora muture okusimya ebhisasi bhyone bhya omuriro gwa emisimu ja Omubhiibhi urya. 17 Mufware obhuchungusi rwa ingofiira ku‑mitwe, ka wone, muramire omusango gwa Nyamuwanga gunu guribha rwa imbanda ya Mwoyo waaye. 18 Musabhwe Nyamuwanga omwanya gwone nimutangasibhwaga na Mwoyo Mweru. Mumusabhwe na okumwirembeeresya bhunyatayigwa ku‑bhuri musango. Ka wone, mugenderere okusabhirwa abheeru bha Nyamuwanga bhoone.
19 Munsabhirwe anye wone, korereki Nyamuwanga anaane emisango ja okwayika, niraasye kwa ribhaasi obhutinge bhwa imbisike yaaye bhunu bhusweruriiywe mu‑Misango ja Ekisi. 20 Anye niri omuraasya wa Emisango ja Ekisi ejo, ka wone nijo jikorere nimboywa amaseega. Mbe munsabhirwe, korereki nijiraasye na ribhaasi, rwa kutyo eneendwa.
Obhukeesya bhwa obhuteero
21 Tukiiko, omuyiri weeswe omwendwa na omukosi omwiyikanyibhwa ku‑Raatabhugenyi, aribhabhwira bhuri musango, korereki emwe wone mumenye kutyo niri na kutyo emirimu ejigenderera. 22 Naamutuma kw‑imwe, korereki abhabhwire emisango jeeswe na okusimbiisya emyoyo jeemwe.