Inyarubha ya Pawuro
ku‑Bhagaraatiya
Obhutangati
Inyarubha inu, ꞉yaakaamirwe na Pawuro, itumwa ya Yeesu Kirisito, inguru ya abheekirisya bha Garaatiya. Garaatiya ni mukoowa gunu gwariga guri gatigati ya echaaro chinu ku‑mwanya gunu echitogwa ati Ebhuturuuki. Pawuro na Bharinaabha ꞉bhaaraasiisye Emisango ja Ekisi inguru ya Yeesu mu‑misi emirebhe jinu jaariga jiri mu‑mukoowa gwa Garaatiya. Abhaanu bhaafu ꞉bheekirisiisye Emisango ja Ekisi ja Yeesu, nibhabha abheekirisya. Nawe omwanya gwejire gwatura, abhaanu abharebhe nibheeyigisya abheekirisya abho ati bhabhe nibharuubha ebhiraagiro na jitungwa ja Abhayawudi, ka wone, bhabhe nibhatendwa.
Ku‑nyarubha inu, Pawuro keechukya abheekirisya bha Garaatiya ati, Nyamuwanga kaachungura abhaanu bhoone bhanu abheekirisya Kirisito, itari ati ni bharya abharuubha ebhiraagiro amwi jitungwa jindebhe. Pawuro keeresya kisi ati, chitakutura okubha abhaanu abha obhurengeresi imbere ya Nyamuwanga mu‑kuruubha ebhiraagiro bhyaye, tari ni kwa eriikirisya ryeswe era. Ka wone, kaagenderera okweresya ati, obhurame bhweswe abheekirisya, bhutangasibhwe na Myoyo Mweru, korereki chigayuke echiraagiro echikuru cha Nyamuwanga cha okwenda abhaanu abhandi.