Inyarubha ya Pawuro
ku‑Bhagaraatiya
Obhukeesya
1
1 Inyarubha inu, niikaamire anye Pawuro. Anye ꞉nitaatumirwe na abhaanu amwi okuragirirwa na omuunu omurebhe, tari ꞉naatumirwe na Yeesu Kirisito omwene na Raata Nyamuwanga unu ꞉aasuuruuye Yeesu okusooka mu‑bhafuuwe. 2 Anye na abhayiri bhoone bhanu bhari aamwi na anye anu, echibhakeesya emwe bhanu muri mu‑makanisa ga Nyamuwanga mu‑mukoowa gwa Garaatiya.3 Obhwitiriranya na omurembe okusooka ku‑Nyamuwanga Raata weeswe na ku‑Raatabhugenyi weeswe Yeesu Kirisito, bhibhe aamwi na emwe. 4 Kirisito ꞉aasoosiisye obhurame bhwaye, inguru ya okusoosya‑wo ebhibhiibhi bhyeswe, korereki achichungure okusooka mu‑bhibhiibhi bhyone bhya echaaro chinu cha woori. ꞉Aakorere kutyo, okuruubhana na okwenda kwa Nyamuwanga Raata weeswe.
5 Nyamuwanga akusibhwe akajaanende koone. Jibhe kutyo.
Jitari‑wo Emisango ja Ekisi ejindi jinu jiri ja echimari
6 Anye enibharuguura muno! Ni mwanya mufuyi era gunu guturire, kasi omusiga Nyamuwanga unu ꞉aabhabhirikiiye mu‑bhwitiriranya bhwa Kirisito. Ka wone, omuruubha ameeyigisyo agandi ganu abhaanu abhandi abhagatoga ati ni Misango ja Ekisi. 7 Chimari ni ati jitari‑wo Emisango ja Ekisi ejindi. Nawe bhari‑wo abhaanu bhanu abhabhajiga na abhakena okuyindura Emisango ja Ekisi inguru ya Kirisito. 8 Araabha omuunu woonewoone, noorwo araabha ni eswe abheene amwi bhamaraayikaa okusooka mu‑rwire, akabharaasisya emisango jinu jitaasyanyiisye na jinu anye ꞉naabharaasisiisye, Nyamuwanga eeyiime omuunu oyo! 9 Enibhabhwira rindi, rwa kutyo ꞉naabhabhwiriiye omwanya gurya ati, araabha omuunu akabharaasisya emisango ejindi jinu jitaasyanyiisye na jinu ꞉naabharaasisiisye, Nyamuwanga eeyiime omuunu oyo!
10 Woori, omwitogera ati, eniyenjeresya okwikirisibhwa na abhaanu? Wuri, anye eniyenjeresya okwikirisibhwa na Nyamuwanga era. Amwi omwitogera ati eniyenjeresya okukondisya abhaanu? Araabha naakabheeye niyenjeresya okukondisya abhaanu, nitaakabheeye omukosi wa Kirisito.
Pawuro kaatumwa na Nyamuwanga okuraasya Emisango ja Ekisi inguru ya Yeesu
11 Abhayiri bhaani, eneenda mumenye ati, Emisango ja Ekisi jinu ꞉naabharaasisiisye ꞉jitasookere ku‑bhaanu. 12 Okubha ꞉nitaajiyaaywe na omuunu woonewoone, noorwo ꞉nitaajiyigisiibhwe na omuunu woonewoone. Nawe Yeesu Kirisito omwene niwe ꞉ajinsweruriiye.
13 Ni chimari ati mwonguuwe kutyo jitungwa jaani jaariga jiri mwanya gunu naariga nindwanirira idiini yaani ya Echiyawudi. Mumenyere wone kutyo ꞉naanyaasiisye muno rikanisa rya Nyamuwanga, keenu ninkenaga okurisingaarisya chimwi. 14 ꞉Naayigire abheejaasu bhaafu bha rikura ryani kwa okurwanirira idiini yeeswe ya Echiyawudi. ꞉Neekomeesiisye muno okugwata obhusimukwa bhwa bhasaaja weeswe. 15 Nawe Nyamuwanga, ꞉aansorere nichaari kwibhurwa, ˆnambirikira ku‑bhwitiriranya bhwaye, ˆnaaramura 16 okunswerurira Omwana waayeb kutyo ari. ꞉Aaramuuye okukora kutyo, korereki niraasye Emisango ja Ekisi inguru ya Omwana waaye ku‑bhaanu bhanu bhatari Bhayawudi. Anye ꞉nitaayenjere abhaanu bha okuntongera jinu nirikora. 17 ꞉Nitaayikire ati, “Siga nigende Yerusareemu ku‑bhanu ꞉bhaatangatire okubha jitumwa.”c Tari chinu ꞉naakorere awoawo, ꞉naagendere mu‑chaaro cha Ebhwarabhu. Omwanya omutooto okutura, niwo ninsubha rindi mu‑musi gwa Damaasiko.
18 Jejire jaatura emiguuga esatu, ningenda Yerusareemu korereki nibhugane na Peeterod eyo. ꞉Neekaaye ewaaye siku ekumi na etaanu era. 19 Nawe ꞉nitaarorere jitumwa ejindi, tari Yakobho, omumura waabho Raatabhugenyi Yeesu. 20 Nyamuwanga kaamenya ati emisango jinu enibhakaamira ni ja echimari, jitari ja orubheeyi!
21 Mbe, niniiya ningenda mu‑mukoowa gwa Siiriya na gwa Kiriikiya. 22 Omwanya ogwo, anye naariga nitakumenyekana ku‑bhaanu bhanu ꞉bheekirisiisye Kirisito, mu‑makanisa ganu gari mu‑mukoowa gwa Yuudeya. 23 Echiinu chinu bhaariga nibhamenya era inguru yaani ni misango jinu ꞉bhoonguuwe ati, “Omuunu unu aariga ˆnaachinyaasya ku‑bhwambiro awo, jisiku jinu kaaraasya eriikirisya riryarirya rinu eendaga okusingaarisya!” 24 Mbe, nibhakusya Nyamuwanga inguru ya jinu aariga ankoreeye.