Abhatangasya bha rikanisa abheekirisya ameeyigisyo ga Pawuro
2
1 Jejire jaatura emiguuga ekumi na ena, nindiinya rindi okugenda Yerusareemu. Ningenda aamwi na Bharinaabha, ka wone, ningega Tiito nichigenda nage. 2 ꞉Naariinyire okugenda eyo ku‑mwanya ogwo, kwa okubha Nyamuwanga aariga answeruriiye ati nigende. Nichibhugana na abhatangasya bha rikanisa mu‑bhumbise. Nimbabhwira Emisango ja Ekisi jinu naariga nindaasya ku‑bhanu bhatari Bhayawudi. ꞉Naaramuuye okusangira aamwi nabho ejo, korereki emirimu jinu naariga ninkora na jinu enigenderera okukora jaasiga okubha ja okufwirwa‑mo. 3 Nibheekirisyanya aamwi na anye. Noorwo kutyo oweejaasu Tiito aariga atari Muyawudi,a ꞉ataasinyirisiibhwe okutendwa.b 4 Omusango gwa okutenda ogwo ꞉gwabhusiibhwe na abhaanu bhanu bhaariga nibheekora wuti ni bhayiri bheeswe. Abhaanu abho, ꞉bheeyingisiisye mu‑bhumbise okutatirisya obhwitaage bhweswe bhunu ꞉chaayaaywe na Kirisito Yeesu. Obhukarariiye bhwebhwe bhwariga bhuri kuchikora chibhe abhagaya bha ebhiraagiro bhya Muusa. 5 ꞉Chiteekirisyanyiisye nabho noorwo na akatyari, korereki echimari cha Emisango ja Ekisi chisigare chirumateene kw‑imwe.6 Nawe abhatangasya bharya bha rikanisa bhanu abhayaanwa echibharo muno na abhaanu, bhaariga bhatari na omusango gwonegwone omuyaaya gwa okumbwira. Ni chimari ꞉bhaayaaywe echibharo muno, nawe kw‑anye eryo chitari echiinu, kwa okubha Nyamuwanga atakuringira echibharo cha omuunu. 7 Abhatangasya abho, ꞉bhaasombookeeywe ati Nyamuwanga ꞉aantumire niraasye Emisango ja Ekisi inguru ya Yeesu ku‑bhanu bhatari Bhayawudi, rwa kutyo ꞉aatumire Peetero okujiraasya ku‑Bhayawudi. 8 Nyamuwanga unu ayaaye Peetero obhuturo bhwa okubha itumwa yaaye ku‑Bhayawudi, niwe oyooyo ꞉aanaaye obhuturo bhwa okubha itumwa yaaye ku‑bhanu bhatari Bhayawudi. 9 Mbe Yakobho, Peetero na Yowana, nibho bhaariga bhari abhatangasya abhakuru, nibhasombookerwa ati Nyamuwanga niwe ꞉aanaaye emirimu jinu ku‑bhwitiriranya bhwaye. Kurwa ejo, nibhachiyaana amabhoko, anye na Bharinaabha rwa echibharikisyo cha obhusangi. ꞉Cheekirisyanyiisye nabho ati eswe chigende okukora emirimu ku‑bhanu bhatari Bhayawudi, na abheene bhakore emirimu ku‑Bhayawudi. 10 Abhatangasya abho ꞉bhaachikomeeresiisye omusango gumwi ati, chibhe nichiichuka abhataka. Anye wone niikomeesiisye muno okukora omusango ogwo.
Pawuro kaagonya Peetero
11 Mbe, Peetero ejire aaja Atiyookiya, rusuku rumwi ꞉naamugonyere abhwerubhweru imbere ya abheekirisya, kwa okubha aariga akayire. 12 Peetero aaryaga ebhiryo aamwi na abheekirisya bhanu bhatari Bhayawudi ataabha na echiitimaato choonechoone. Nawe bhejire bhaaja abhaanu abharebhe okusooka ku‑Yakobho, Peetero ˆneeyawura okusooka ku‑bheekirisya bhanu bhatari Bhayawudi abho, ˆnaasiga okurya ebhiryo aamwi nabho. ꞉Aakorere kutyo, kwa okubha aariga ˆnoobhaya abhaanu bhanu bhaariga nibhakomeeresya ati abheekirisya bhoone ni bhusibhusi bhabhega nibhatendwa okwamba. 13 Ka wone, abheekirisya abhandi bha Echiyawudi nibhaamba okukora rwa kutyo Peetero aariga ˆnaakora, keenu bhamenyere ati ni bhwirimaanya. Noorwo Bharinaabha wone ˆneengira mu‑bhwirimaanya obhwo. 14 Nejire naarora ati bhatakukora rwa kutyo echimari cha Emisango ja Ekisi chiri, nimbwira Peetero abhwerubhweru imbere ya abheekirisya bhoone ati, “Awe uri Muyawudi, nawe owukoraga rwa kutyo abhaanu bhanu bhatari Bhayawudi abhakora. Ni kurwa ki woori usinyiirisye abhaanu abho okuruubha jitungwa ja Echiyawudi?”
Abhaanu abhachungurwa kwa okwikirisya Yeesu Kirisito
15 Chimari, obhusimukwa bhweswe chiri Bhayawudi, chitari rwa bhanu bhatari Bhayawudi bhanu echitoga ati, “abhakosi bha ebhibhiibhi.” 16 Nawe eswe echimenya ati, omuunu atakutura okubharwa ati ni murengeresi imbere ya Nyamuwanga kwa okuruubha ebhiraagiro bhya Muusa, tari ni kwa okwikirisya Yeesu Kirisito omwene era. Nikwo kutyo eswe wone chiikirisiisye Kirisito Yeesu korereki chibharwe ati chiri abharengeresi imbere ya Nyamuwanga kwa okwikirisya Kirisito, kutari kwa okuruubha ebhiraagiro bhya Muusa. Chimari atari‑wo omuunu unu kaatura okubharwa ati ni murengeresi imbere ya Nyamuwanga kwa okuruubha ebhiraagiro bhya Muusa.c 17 Eswe echiyenjeresya okubharwa ati chiri abharengeresi imbere ya Nyamuwanga mu‑kubha na obhumwi na Kirisito, nawe abhaanu abhandi abhaayika ati eswe wone chaabha abhakosi bha ebhibhiibhi. Angu, ni chimari ati Kirisito kaachikora okubha abhakosi bha ebhibhiibhi? Wuri, noorwo na akatyari! 18 Nawe araabha enisubhira okwikirisya obhutinge bhwa kara bhwa okuruubha ebhiraagiro, obhutinge bhunu ꞉naaremere, niwo enibha omukayi rindi. 19 Okubha naariga ninduubha ebhiraagiro bhya Muusa, nawe ebhiraagiro ebhyo nibhyo ꞉bhyandamuuwe. Woori nitakubhigwata rindi, kwa okubha Nyamuwanga ansoosiisye mu‑bhugaya obhwo, korereki niikare rwa kutyo keenda omwene. 20 Bhumuunu bhwani bhwa kara bhwa ebhibhiibhi, ꞉bhwabhambirwe aamwi na Kirisito ku‑musarabha. Woori niri muwanga, nawe nitari anye unu niri muwanga, tari Kirisito niwe ari muwanga mu‑mwoyo gwani. Obhuwanga bhunu niri nabhwo omwanya gunu, niri nabhwo mu‑kwikirisya Omwana wa Nyamuwanga. Omwene ꞉aanyendere na okusoosya obhurame bhwaye inguru yaani, korereki nichunguke. 21 Nitakutura okurema obhwitiriranya bhwa Nyamuwanga. Araabha omuunu kaatura okubharwa ati ni murengeresi imbere ya Nyamuwanga kwa okuruubha ebhiraagiro bhya Muusa, mbe bhwariga bhutari‑wo obhukene bhwa Kirisito okufwa!