Abhagaraatiya 3

Abheekirisya ꞉bhaaramiiye Mwoyo Mweru kwa eriikirisya era

1 Emwe Abhagaraatiya, abhataamutaamu! Niga unu abharogere? ꞉Naabhabhwiriiye abhwerubhweru inguru ya Yeesu Kirisito okubhambwa ku‑musarabha. 2 Woori, siga nibhabhuusye ribhuusyo rimwi. Angu, ꞉mwaramiiye Mwoyo Mweru kwa okubha ꞉mwaruubhire ebhiraagiro bhya Muusa, amwi kwa okubha ꞉mwategeresiisye na okwikirisya Emisango ja Ekisi inguru ya Yeesu? 3 Ni kurwa ki muri bhataamutaamu kutyo? Emwe ꞉mwaambire emisango joone ku‑managa ga Mwoyo Mweru, ni kurwa ki woori omwenda okujikuumisya ku‑managa geemwe? 4 Angu, jinyaako joone jinu ꞉jaabhabhwene, omwitogera ati jaariga jiri ja okufwirwa‑mo? Jaariga jitari ja okufwirwa‑mo! 5 Mumbwire, Nyamuwanga kaabhayaana Mwoyo Mweru na okukora ebhiruguusyo agati yeemwe kwa okubha ꞉mwaruubhire ebhiraagiro bhya Muusa, amwi kwa okubha ꞉mwategeresiisye na okwikirisya Emisango ja Ekisi inguru ya Yeesu?

6 Mwiganirisye inguru ya Bhurayimu. Ebhikaame Ebhyeru ebhyayika ati, “꞉Eekirisiisye Nyamuwanga, kurwa ejo Nyamuwanga ˆnaamubhara okubha omuunu omurengeresi imbere yaaye.” 7 Mbe woori, mumenye ati abhaanu bhanu abheekirisya Nyamuwanga, nibho abhaana bha echimari bha Bhurayimu! 8 Ebhikaame Ebhyeru ꞉bhyaragire ati Nyamuwanga akabharire abhaanu bhanu bhatari Bhayawudi okubha abharengeresi imbere yaaye kwa eriikirisya ryebhwe. Nyamuwanga ꞉aatangatire okuraasisya Bhurayimu emisango ja ekisi ejo ati, “Okutura kw‑awe, abhaanu bha amaanga goone bharibhona amabhando.” 9 Mbe, abhaanu bhanu abheekirisya Nyamuwanga, abhabhona amabhando, rwa kutyo Bhurayimu ꞉aabhwene amabhando kwa okubha ꞉eekirisiisye.

Abheekirisya bhaachungukire okusooka mu‑chiyiimo cha ebhiraagiro bhya Muusa

10 Nawe abhaanu bhoone bhanu abheeyikanya okuchunguka kwa okukora jinu ebhiraagiro bhya Muusa ebhikena, abho bheeyiimirwe. Okubha Ebhikaame Ebhyeru ebhyayika ati, “Woonewoone unu atakuruubha na okukora joone jinu jikaamirwe mu‑chitabho cha ebhiraagiro, eeyiimirwe.” 11 Chimari atari‑wo omuunu unu kaabharwa ati ni murengeresi imbere ya Nyamuwanga kwa okuruubha ebhiraagiro bhya Muusa, kwa okubha Ebhikaame Ebhyeru ebhyayika ati, “Omuunu unu aribha na obhuwanga, ni unu Nyamuwanga kaabhara ati ni murengeresi ku‑njira ya eriikirisya ryaye.” 12 Ebhiraagiro bhya Muusa bhitakwiyikanya eriikirisya, tari bhiiyikanya ebhikorwa bhinu omuunu kaakora. Ni rwa kutyo Ebhikaame Ebhyeru ebhyayika ati, “Omuunu unu kaakora jinu ejikenwa na ebhiraagiro, aribha na obhuwanga kwa okuruubha ebhiraagiro ebhyo.”

13 Kirisito ꞉aacheeruuye okusooka mu‑chiyiimo cha ebhiraagiro kwa okugega echiyiimo echo, inguru yeeswe. Ebhikaame Ebhyeru ebhyayika ati, “Woonewoone unu abhambirwe ku‑musarabha, eeyiimirwe.” 14 ꞉Aachichunguuye, korereki amabhando ganu ꞉aayaaywe Bhurayimu, gakinge ku‑bhanu bhatari Bhayawudi okutura ku‑Kirisito Yeesu. Mbe woori, eswe bhoone, echitura okuramira Mwoyo Mweru unu Nyamuwanga ꞉aaragire okuchiyaana, ku‑njira ya okwikirisya Kirisito Yeesu.

Omurago gwa Nyamuwanga ku‑Bhurayimu

15 Abhayiri bhaani mu‑riikirisya nibhabhwire echijekekanyo cha obhurame bhwa bhuri rusuku. Chaayike ati abhaanu bhabhiri, bheekirisyanya inguru ya omusango omurebhe. Araabha indagano ikorekeene na okurumatanywa, atari‑wo omuunu wa okuyirema amwi wa okwongesya‑ko omusango omurebhe mu‑kwikirisyanya kwebhwe. 16 Mbe Nyamuwanga ꞉aasoosiisye emirago ku‑Bhurayimu saaja weeswe, aamwi na ku‑mwibhurwa waaye. Ebhikaame Ebhyeru bhitakwayika ati, “Na ku‑bheebhurwa bhaaye,” obhugajuro bhwabhyo ni ati bhatari bhaafu, tari bhyayika ati, “Na omwibhurwa waaye,” obhugajuro bhwabhyo ni ati ni umwi, niwe Kirisito. 17 Omusango gunu eneenda okwayika ni gunu, Nyamuwanga ꞉aakorere indagano yaaye na okuyirumatanya emiguuga magana gana na makumi gasatu (430) ebhiraagiro bhya Muusa bhichaari okubha‑wo. Kurwa ejo, ebhiraagiro ebhyo, bhitakutura okunyamura indagano eyo, noorwo okuyindura omurago gwaye. 18 Araabha omwandu gwa Nyamuwanga gukabheeye ni gwiyikanya ebhiraagiro, mbe omwandu ogwoogwo gutaakaturire rindi okwiyikanya omurago gwa Nyamuwanga. Nawe kwa obhwitiriranya, Bhurayimu ꞉aabhwene omwandu kwa okubha Nyamuwanga ꞉aamuragire era.

19 Woori, ebhiraagiro bhiri na emirimu ki? Ebhiraagiro ꞉bhyateeywe‑wo inguru ya bhunyatagayuka bhwa abhaanu. ꞉Bhyateeywe‑wo okukingira anu ariija omwibhurwa wa Bhurayimu, unu Nyamuwanga ꞉aaragire ati ariija. Ebhiraagiro ebhyo, Nyamuwanga ꞉aayaaye Muusa okutura ku‑bhamaraayika, na Muusa ˆnaabha omugwatanya agati ya Nyamuwanga na abhaanu bhaaye. 20 Omugwatanya kaakenwa omwanya gunu mbaara ebhiri ejikora indagano. Nawe Nyamuwanga ni umwi, omwene ꞉aakorere indagano na Bhurayimu omugwatanya ataabha‑wo.

21 Woori angu, jitari ati ebhiraagiro ebhiyaajana na emirago jinu Nyamuwanga ꞉aaragire? Wuri, noorwo na akatyari! Araabha bhwakabheye‑wo obhuturo bhwa ebhiraagiro okuyaana abhaanu obhuwanga, mbe chaakaturire okubharwa ati chiri bharengeresi imbere ya Nyamuwanga kwa okuruubha ebhiraagiro. 22 Nawe jitari kutyo. Ebhikaame Ebhyeru ebhyayika ati abhaanu bhoone bhari mw‑ibhoyero rya obhutungi bhwa ebhibhiibhi. Kurwa ejo, Nyamuwanga ꞉aaragire okusoosya echiinu chinu ꞉aaragire ku‑bhoone bhanu abheekirisya Yeesu Kirisito.

23 Omwanya gunu abhaanu bhaariga bhachaari kubha na eriikirisya mu‑Yeesu Kirisito, ebhiraagiro bhya Muusa ꞉bhyachangariiye na okuchikora okubha abhagaya bhaabhyo. Chaarindiriraga omwanya gunu eriikirisya mu‑Yeesu Kirisito ryakasweruriiywe. 24 Ebhiraagiro bhya Muusa bhyariga nibhichitangasya rwa omuresi weeswe, okukingira omwanya gunu Kirisito ꞉eejire. Kurwa ejo woori, ni ku‑njira ya okwikirisya Kirisito era echitura okubharwa ati chiri bharengeresi imbere ya Nyamuwanga. 25 Woori, kwa okubha eriikirisya mu‑Yeesu Kirisito ryakingire, chitari rindi emwaro ya ebhiraagiro, omuresi weeswe. 26 Woori, emwe bhoone muri bhaana bha Nyamuwanga kwa eriikirisya ryemwe, kwa okubha muri na obhumwi na Kirisito Yeesu. 27 Emwe bhoone bhanu ꞉mwabhatiijiibhwe, muri na obhumwi na Kirisito, muri wuti mufwaye Kirisito. 28 Kurwa ejo, bhutari‑wo obhutaasyanya agati ya Omuyawudi na Omuyunaani, amwi omugaya na omuunu omwitaage, amwi omurume na omugasi. Bhoone muri chiinu chimwi, kwa okubha muri na obhumwi na Kirisito Yeesu. 29 Araabha emwe muri ku‑Kirisito, kurwa ejo woori, emwe muri rwibhuro rwa Bhurayimu, na muriramira omwandu gunu Nyamuwanga ꞉aaragire.