Abhagaraatiya 4

1 Mbe, omusango gunu eneenda okubhabhwira ni ati, omwana unu aryanjura obhuniibhi bhwa esemwene, atakutaasyanya na omugaya omwanya gwone gunu owubha achaari mwana omurera, noorwo kutyo obhuniibhi bhwone ni bhwaye. 2 Omwanya ogwo gwone, omwanjusi oyo, owubha achaari mu‑mabhoko ga abharesi na abhabhiiki bha obhuniibhi bhwaye, okukingira omwanya gunu esemwene aariga ateeye‑wo. 3 Nyabhuriko eswe wone, ni kutyokutyo, omwanya gunu Kirisito aariga achaari okuuja, chaariga chiri rwa abhaana abharera, chaariga chiri bhagaya bha obhutinge bhwa akatungiiywe bhwa echaaro chinu. 4 Nawe jisiku jinu jaariga jiteeywe‑wo jejire jaakuumira, Nyamuwanga ˆnaatuma Omwana waaye ku‑chaaro chinu. Omwana waaye oyo, ꞉eebhuuywe na omugasi rwa eswe, ˆnaatungwa na ebhiraagiro bhya Muusa. 5 ꞉Aatumirwe, korereki acheerure eswe bhanu chaariga chitungirwe na ebhiraagiro bhya Muusa. ꞉Aakorere kutyo, korereki eswe bhoone chikorwe abhaana bha Nyamuwanga.

6 Mbe, kwa okubha chiri bhaana bha Nyamuwanga, omwene ꞉aatumire Mwoyo wa Omwana waaye mu‑myoyo jeeswe. Mwoyo oyo, niwe kaakora chibhirikire Nyamuwanga ati “Abha,” obhugajuro bhwaryo “Raata.” 7 Kurwa ejo, woori emwe mutari bhagaya rindi, tari muri bhaana bha Nyamuwanga. Mukabha muri bhaana, mbe muriramira omwandu gunu Nyamuwanga atereeye‑wo abhaana bhaaye.

Pawuro kaakengya Abhagaraatiya

8 Emwe kara mwariga mutakumenya Nyamuwanga. Ku‑mwanya ogwo, mwariga muri bhagaya bha amasambwa ganu gatari Nyamuwanga. 9 Nawe woori, omumenya Nyamuwanga na omwene wone kaabhamenya muno. Woori ni kurwa ki omusubha okuramya obhutinge bhwa akatungiiywe bhwa echaaro chinu? Obhutinge obhwo, bhutari na obhuturo noorwo obhugajuro bhwonebhwone. Amwi omwenda rindi okubha abhagaya bhaabhwo? 10 Kurwa ki omufurubhenda na okukuumisya jitungwa ja Echiyawudi ja jisiku, ameesi, emyanya na emiguuga? Omwitogera ati ku‑njira eyo omuyaana Nyamuwanga echibharo? 11 Eniyaya muno inguru yeemwe. Eyiturikana ati omurimu gwani gwone gunu ꞉naakorere kw‑imwe, ni gwa okufwirwa‑mo era. 12 Abhayiri bhaani mu‑riikirisya, enisabhwa mubhe abheetaage rwa kutyo anye niri, kwa okubha anye niri mwitaage rwa kutyo emwe wone muri.

Omwanya gunu naariga niri aamwi na emwe, ꞉mutankoreye obhubhiibhi bhwonebhwone. 13 Mumenyere ati obhurwaye bhunu naariga nirwaye ku‑bhwambiro, nibhwo ꞉bhwakorere nimbona omwanya gwa okubharaasisya Emisango ja Ekisi. 14 Noorwo kutyo ꞉mwaregeejerwe okungaya na okundema ku‑songa ya obhurwaye bhwani, ꞉mutaakorere kutyo. Nawe omusango gunu ꞉mwakorere ni kunnyikirisya rwa kutyo mukeekirisiisye maraayika wa Nyamuwanga, amwi okwikirisya Kirisito Yeesu omwene. 15 Omwanya gurya mwariga muri na rikonderwa, nawe woori, okukonderwa kwemwe okwo kuri aaki? Enaayika echimari ati, ku‑mwanya gurya mwakaturire okwiya ameeso geemwe nimuganaana. 16 Angu, woori naabha omusoko weemwe kwa okubha enibhabhwira echimari?

17 Abhaanu abhandi bharya, abheekomeesya okubhanyaakirira, nawe omusango gunu ogukora bhabharuubhirire gutari gwa ekisi. Abheenda okubhataaganya na anye, korereki emwe mwikomeesye okubhanyaakirira. 18 Ni musango gwa ekisi okwikomeesya, nawe kubhe mu‑kukora ebhikorwa bhya ekisi. Mukore kutyo omwanya gwone, noorwo omwanya gunu nitari aamwi na emwe. 19 Abhaana bhaani mu‑riikirisya, anye enirumwa obhusungu rindi inguru yeemwe, rwa kutyo omugasi unu afugaaye kaarumwa obhusungu omwanya gwa okwibhura. Eniiyungwa kutyokutyo, okukingira anu itungwa ya Kirisito iribhonekana mu‑tungwa jeemwe. 20 Naakeendere muno okubha aamwi na emwe omwanya gunu, amwi naakaromere na emwe mu‑bhworooro. Eniyaya muno inguru yeemwe!

Echijekekanyo cha Ajiri na Saara

21 Woori mumbwire, emwe bhanu omwenda okubha abhagaya kwa okuruubha ebhiraagiro bhya Muusa. Angu, mutakumenya kutyo ebhiraagiro ebhyayika? 22 Jikaamirwe mu‑Bhikaame Ebhyeru ati, Bhurayimu aariga ari na abhaana bhabhiri. Owumwi ꞉eebhuuywe na Ajiri omugayagasi, na owundi ꞉eebhuuywe na Saara unu aariga ari mwitaage. 23 Omwana wa omugayagasi ꞉eebhuuywe okuruubhana na obhutinge bhwa abhaanu. Nawe omwana wa omugasi omwitaage, ꞉eebhuuywe okuruubhana na omurago gwa Nyamuwanga. 24 Abhagasi bhabhiri abho, abhatura okususanywa na jindagano ebhiri. Ajiri ni chijekekanyo cha indagano ya okwamba inu ꞉yaakorekeene ku‑chiima cha Sinaayi. Abhaana bhaaye ꞉bheebhuuywe rwa abhagaya nibharuubhaga ebhiraagiro bhya Muusa. 25 Abhaanu bha Yerusareemu ya woori ni bhagaya bhanu abharuubha ebhiraagiro bhya Muusa. Abho ni bhagaya rwa abhaana bha Ajiri, kwa okubha omwene ari rwa echiima cha Sinaayi mu‑chaaro cha Ebhwarabhu. 26 Nawe Yerusareemu ya mu‑rwire ni musi gunu guri na obhwitaage, ogwo nigwo maayi unu achiibhuuye. 27 Mu‑Bhikaame Ebhyeru, jikaamirwe inguru yaaye ati,

“Konderwa awe omugumba nyateebhura,

yaamura obhuraka awe unu uchaariga okurumwa obhusungu bhwa okwibhura omwana,

kwa okubha abhaana bha unu aariga asigirwe omwene ni bhaafu,

okukira unu ari na omurume waaye.”

28 Mbe woori bhayiri bhaani mu‑riikirisya, emwe muri bhaana okuruubhana na omurago gwa Nyamuwanga, rwa Isaaka kutyo aariga ari. 29 Nawe mu‑siku jirya, omwana unu ꞉eebhuuywe okuruubhana na obhutinge bhwa omuunu, ꞉aanyaasisye omwana unu ꞉eebhuuywe ku‑bhuturo bhwa Mwoyo Mweru. Noorwo reero inu, abhaanu bhanu abharuubha ebhiraagiro abhabhanyaasya emwe bhanu muri bheetaage. 30 Nawe mu‑Bhikaame Ebhyeru jikaamirwe kutiki? Jikaamirwe ati, “Bhirimya omugayagasi aamwi na omwana waaye, kwa okubha omwana wa omugaya, ataryanjura omwandu aamwi na omwana wa omugasi omwitaage.” 31 Kurwa ejo, abhayiri bhaani, eswe chitari bhaana bha omugayagasi, tari chiri bhaana bha omugasi omwitaage.