Obhwitaage bhwa omwikirisya
5
1 Kirisito achiyaaye obhwitaage, korereki chiikare mu‑bhwitaage obhwo. Kurwa ejo, mwimereeguru murumateene, mwasiga okwikirisya okusubha rindi mu‑bhugaya bhwa ebhiraagiro. 2 Mutegeresye chinu anye Pawuro enibhabhwira! Araabha mukeekirisya okutendwa rindi inguru ya okuruubha ebhiraagiro bhya Muusa, awo Kirisito ataribha na obhugajuro bhwonebhwone kw‑imwe. 3 Enibhabhwira abhwerubhweru rindi ati, omurume woonewoone unu keekirisya okutendwa, kaakenwa okuruubha ebhiraagiro bhyone bhya Muusa. 4 Araabha omwiyikanya okubha abharengeresi imbere ya Nyamuwanga mu‑kuruubha ebhiraagiro, mbe mumenye ati mwikindikire okusooka ku‑Kirisito, na muri kura na obhwitiriranya bhwa Nyamuwanga. 5 Nawe eswe, echiiyikanya ku‑bhuturo bhwa Mwoyo Mweru ati, Nyamuwanga arichibhara ati chiri bharengeresi, kwa okwikirisya Yeesu. 6 Mbe araabha chiri na obhumwi na Kirisito Yeesu, okutendwa amwi okurema okutendwa kutari na obhugajuro bhwonebhwone. Echiinu cha bhusibhusi ni riikirisya ryeswe rinu erikora emirimu mu‑ryenda.7 Ku‑bhwambiro, mwariga nimukora kisi! Woori niga unu abhayingiriiye ati musige okugayuka ameeyigisyo ga echimari? 8 Obhukongya obhwo, bhutakusooka ku‑Nyamuwanga unu abhabhirikiiye. 9 Nawe mumenye ati, ameeyigisyo ga orubheeyi ago, gari rwa kutyo abhaanu abhaayika ati, “Echifwimbya chitooto era echisangʼarasya echirengo choone!”a 10 Enimenya kisi ati emwe muri na obhumwi na Raatabhugenyi Yeesu, kurwa ejo, mutariikirisya okujigwa. Nawe omuunu woonewoone unu aribhajiga, noorwo abhega, ariyaanwa ebhitiibha.
11 Abhayiri bhaani, abhaanu abhandi abhaayika ati, anye nichaaraasya ati abharume bhoone abhakenwa bhatendwe. Araabha jikabheeye echimari ati nichaaraasya kutyo, ni kurwa ki woori Abhayawudi abhannyaasya? Araabha naakabheeye nindaasya kutyo, okuraasya kwani inguru ya emisango ja omusarabha gwa Yeesu, jitaakaretereeye Abhayawudi bhaansoke. 12 Eniigomba ati abhaanu bhanu abhabhanyamura ku‑misango ja okutenda, bhaakeekonere abheene!
Okwikara kwa obhuturo bhwa Mwoyo Mweru
13 Abhayiri bhaani, Nyamuwanga abhabhirikiiye, korereki mubhe abhaanu bhanu muri na obhwitaage. Nawe mwasiga okukorera obhwitaage bhwemwe wuti omwanya gwa okuruubha okurigira kwa omubhiri, tari musakirane mu‑ryenda. 14 Ebhiraagiro bhyone bhya Muusa ebhikuumisibhwa mu‑chiraagiro chimwi chinu echaayika ati, “Wendega oweejaanyu rwa kutyo owiyenda omwene.”b 15 Nawe mukarumana na okuwutaasyanya rwa jityanyi ja ibhara, mwiyangarire korereki mwasiga okusingaarisyanya.
16 Mbe echiinu chinu enibhabhwira ni ati, mutangasibhwega na Mwoyo Mweru. Mukakora kutyo, mutariruubha rindi okurigira kwa omubhiri. 17 Enibhabhwira kutyo, kwa okubha okurigira kwa omubhiri kwisigombera jinu Mwoyo Mweru atakwenda, na Mwoyo Mweru wone, keesigombera jinu okurigira kwa omubhiri kutakwenda. Mwoyo Mweru na okurigira kwa omubhiri ni bhasoko, ebhiyaajana, okukingira emwe okubhurwa obhwitaage bhwa okukora jinu omwenda. 18 Araabha omutangasibhwa na Mwoyo Mweru, mutaritungwa na ebhiraagiro rwa abhagaya.
19 Mbe, ebhikorwa bhinu ebhikorwa na okurigira kwa omubhiri bhiri bhweru, nibhyo bhinu, obhuromesi, obhujabhi, orukubho, 20 okuramya amasusano, obhurosi, obhusoko, inyombo, okwigomba bhya abhandi, risungu, orwango, isoroore, okwitemyako, 21 orwiso, obhukorwa, obhunanamba na jinu jiri rwa ejo. Enibhabhwira rindi rwa kutyo naariga naabhabhwiriiye ati, abhaanu bhanu abhakora emisango ejo, bhataribha na omwandu gwonegwone mu‑bhukama bhwa Nyamuwanga.c 22 Nawe araabha chikatangasibhwa na Mwoyo Mweru, chiribha na ritwasyo ryaye. Ritwasyo eryo ni eryenda, rikonderwa, omurembe, okwigumiirisya, obhwa ekisi, obhufura, okwiyikanyibhwa, 23 obhworooro na okwiyingirira. Chitari‑wo echiraagiro chinu echiyingirira omuunu asige okukora emisango ejo. 24 Abhaanu bhanu bhari na obhumwi na Kirisito Yeesu, bhatakutungwa na okurigira kwebhwe kwa omubhiri aamwi na obhwiganirisya bhwebhwe obhubhiibhi. Bhaabhambire okurigira okwo, ku‑musarabha gwa Yeesu. 25 Mwoyo Mweru achiyaaye obhuwanga obhuyaaya, mbe chiruubhe obhutangasya bhwaye. 26 Chisigega okwikumangya kutyo era, nichisoogorana na okujiranira orwiso.