Okusakirana na okukora ja ekisi
6
1 Abhayiri bhaani mu‑riikirisya, araabha mukamenya ati oweejaanyu aakora echibhiibhi, emwe bhanu omutangasibhwa na Mwoyo Mweru, mumusubhye ku‑tungwa ja ekisi. Mukore kutyo mu‑mwoyo gwa obhworooro. Nawe mwiyangarire, mwasiga okusakwa na okubha na jitungwa rwa jaaye. 2 Musakiranega na okugegerana emigugu jeemwe emisito, niwo murikuumisya echiraagiro cha Kirisito.a 3 Mbe, omuunu woonewoone unu keerora ati ni wa obhugajuro okukira abheejaabho, oyo atari wa obhugajuro, keejiga omwene era. 4 Nawe bhuri muunu aringire jitungwa jaaye omwene. Araabha omuunu kaakora ja ekisi, niwo kaatura okwikuuya inguru ya emisango ja ekisi jinu akorere, noorwo aasiga okwiringʼaanya na emisango jinu omuunu owundi akorere. 5 Okubha bhuri muunu kaakenwa okwitwika omugugu gwaye omwene.6 Omuunu unu keeyigisibhwa omusango gwa Nyamuwanga, ribhona ryaye rinu kaabhona abhe ˆnaagabhira‑ko omwiyigisya waaye oyo. 7 Mwasiga okwijiga abheene, Nyamuwanga atakusiijaakwa. Echiinu chinu omuunu kaayamba, nicho arigesa. 8 Mbe, omuunu unu kaatangasibhwa na okurigira kwa omubhiri, niwe arigesa okusingaarisibhwa kwa okurigira okwo. Nawe unu kaatangasibhwa na Mwoyo Mweru, arigesa obhuwanga bhwa akajaanende koone okusooka ku‑Mwoyo oyo. 9 Kurwa ejo, chisige okuyigwa okukora ebhikorwa bhya ekisi! Araabha echiigumiirisya mu‑kukora ja ekisi, chirigesa ja ekisi omwanya gwa okugesa gukakinga. 10 Mbe, bhuri kutyo echibhona omwanya, chikorerega abhaanu bhoone ja ekisi, nawe munomuno abheekirisya abheejaasu.
Amaragiriro ga obhuteero
11 Murore kutyo nibhakaamiiye ku‑nyuguta jinene. Nibhakaamiiye kwa okubhoko kwani omwene. 12 Abhaanu bhanu abhabhasinyiirisya mutendwe, abheenda mukore kutyo, korereki Abhayawudi bhabhayaane echibharo. Abheenda bhasige okunyaasibhwa inguru ya okuraasya emisango ja omusarabha gwa Kirisito. 13 Noorwo abheene bhanu bhatenderwe, wone bhatakuruubha ebhiraagiro bhyone. Echiinu chinu abheenda ni ati emwe mutendwe, korereki bheekumangisye okutendwa kwemwe. 14 Nawe anye nitakwenda nibhe na omusango gwa okwikumangisya, tari musarabha gwa Raatabhugenyi weeswe Yeesu Kirisito. Okuruubhana na orufu rwaye, emisango joone ja echaaro chinu jitari na obhugajuro kw‑anye, na bhumuunu bhwani bhwa kara bhubhambirwe aamwi nage ku‑musarabha.b 15 Okutendwa amwi okurema okutendwa, kutari na obhugajuro bhwonebhwone bhurya. Omusango gwa bhusibhusi ni kubhumbwa bhuyaaya na Nyamuwanga.c 16 Omurembe na echigongo okusooka ku‑Nyamuwanga bhibhe na abhaanu bhoone bhanu abharuubha echimari echo, abho nibho abhaanu bha Nyamuwanga.d
17 Mbe, okwambira woori omuunu woonewoone asige okunnyaasya rindi, kwa okubha ku‑mubhiri gwani niri na jingʼofu, ꞉naabhwene jimbuma inguru ya okukorera Yeesu.
18 Abhayiri bhaani, obhwitiriranya bhwa Raatabhugenyi weeswe Yeesu Kirisito bhubhe aamwi na emwe. Jibhe kutyo.