Obhukengya bhwa obhuteero
13
1 Runu oruja okubha rwa kasatu anye okuuja kw‑imwe eyo. Jikaamirwe mu‑Bhikaame Ebhyeru ati, “Bhuri chikayo, chiramurwe kwa obhubhambaasi bhwa abhaanu bhabhiri amwi bhasatu.”a 2 Omwanya gunu ꞉neejire kw‑imwe rwa kabhiri, ꞉naabhwiriiye bhanu bhaariga bhakorere ebhibhiibhi ati, omwanya gunu niriija rindi, nitaribhafwira echigongo. Noorwo kutyo anye nitari na emwe eyo, enibhwira abhaanu abhandi bhoone ati, omwanya gunu niriija rindi kw‑imwe, nitaribhafwira echigongo. 3 Nirikora kutyo, kwa okubha omuyenja echibharikisyo cha okumenya ati Kirisito kaayika okutura kw‑anye. Kirisito atari mujorobhoke kw‑imwe, tari ari na amanaga, na niwe kaakora emirimu agati yeemwe. 4 Ni chimari ati Kirisito ꞉aabhambirwe ku‑musarabha rwa omuunu omujorobhoke, nawe woori, ni muwanga ku‑bhuturo bhwa Nyamuwanga. Nyabhuriko eswe wone chiri bhajorobhoke rwa kutyo Kirisito aariga ari, nawe omuja okuchirora chiri bhaanga aamwi na omwene ku‑bhuturo bhwa Nyamuwanga.5 Woori mwirenge emwe abheene, korereki mumenye araabha muri na eriikirisya. Mwitatirisye emwe abheene, angu, mutakumenya ati Yeesu Kirisito ari mu‑myoyo jeemwe? Araabha jitari kutyo, awo niwo omumenya ati, obhutatirisi bhwemwe, bhwataamibhwa okukingira indengo ya eriikirisya. 6 Nawe eniiyikanya ati, omuja okusombookerwa ati, eswe chitataamiibhwe okukingira indengo. 7 Echisabhwa Nyamuwanga ati, mwasiga okukora omusango omubhiibhi gwonegwone, jitari ati, kwa okubha eswe echeenda chibhonekane ati chaakuumisiisye indengo eyo. Tari echeenda emwe mukore ja ekisi, noorwo kutyo ejibhonekana ati eswe chaataamibhwa. 8 Enaayika kutyo, kwa okubha chitakutura okurema echimari, tari echitura era okubhagira echimari. 9 Eswe echikonderwa kwa okubha chiri bhajorobhoke, nawe emwe muri na amanaga. Echisabhwa Nyamuwanga abhasakire mubhega mukuumiiye mu‑riikirisya. 10 Enibhakaamira emisango jinu nichaari okubhaaja‑ko eyo, korereki omwanya gunu niribhaaja‑ko, naasiga okusongʼana emisango jinu jirireterera nibhe omururu kabhukabhu kw‑imwe noorwo okukingira okukorera emirimu obhuturo bhunu Raatabhugenyi ꞉aanaaye. Obhuturo obhwo, bhutari bhwa okubhanyamura, tari ni bhwa okubharumatanya mu‑riikirisya.
Emisango ja okuragana
11 Woori, abhayiri bhaani mu‑riikirisya, enimariisya kwa okubhabhwira ati mukonderwega! Mubhega mukuumiiye mu‑riikirisya, musimbiisyanyega, mubhega na obhumwi, mwikarega kwa omurembe na Nyamuwanga wa eryenda na omurembe, kaja okubha aamwi na emwe. 12 Mukeesyanye mu‑ryenda rya Kirisito. Abheekirisya bhoone bhanu bhari anu, abhabhakeesya. 13 Obhwitiriranya bhwa Raatabhugenyi Yeesu Kirisito, na eryenda rya Nyamuwanga, na obhusangisi bhwa Mwoyo Mweru, bhibhe aamwi na emwe bhoone.