Ebhiroro bhya Pawuro na obhujorobhoke bhwaye
12
1 Neenderwe niikuuye, noorwo kutyo kutakusakira choonechoone. Nawe woori eneenda okwikuuya inguru ya ebhiroro na emisango ejindi jinu Raatabhugenyi answeruriiye. 2 Enisombookerwa omwikirisya umwi, unu emiguuga ekumi na ena jinu ꞉jaaturire, ꞉aagegerwe ˆnaasirwa mu‑rwire rwa inguru muno.a Nitakumenya ati ꞉aagegerwe ari mu‑mubhiri gunu, amwi ati aariga atari mu‑mubhiri gunu. Nyamuwanga wenyere niwe amenyere. 3 Ka wone, anye nitakumenya ati omuunu oyo ꞉aagegerwe ari mu‑mubhiri, amwi ati aariga atari mu‑mubhiri. Nyamuwanga wenyere niwe amenyere. Nawe, chinu nimenyere ni ati, omuunu oyo 4 ꞉aagegerwe ˆnaasirwa mu‑Paradiiso.b Eyo niyo ꞉oonguuwe emisango ja okuruguusya muno jinu omuunu atakutura okwayika, ka wone ateeyire okujaayika. 5 Woori inguru ya omuunu rwa oyo, enija okwikuuya. Nawe nitariikuuya inguru yaani omwene, tari inguru ya obhujorobhoke bhwani era. 6 Noorwo araabha naakeendere okwikuuya, nitaakabheeye omutaamutaamu, kwa okubha naakabheeye ninaayika echimari. Nawe eniyingirira okwikuuya, korereki omuunu woonewoone aasiga okundora ati, niri wa ngʼoryo muno okukira jinu abharora na okuungwa okusooka kw‑anye.7 Nawe ꞉naayaaywe ebhinyaasyo mu‑mubhiri gwani bhinu bhiri rwa riiwa rinu erinsoma. Ebhinyaasyo ebhyo ni tumwa wa Syetaani unu ꞉aatumirwe annyaasye, korereki naasiga okwikuuya muno inguru ya emisango myafu ja okuruguusya jinu Raatabhugenyi answeruriiye. 8 ꞉Neerembeeresiisye Raatabhugenyi kasatu ansoosisye‑wo ebhinyaasyo ebhyo. 9 Nawe omwene ˆnaambwira ati, “Obhwitiriranya bhwani bhukwiyire, kwa okubha amanaga gaani agabhuurisibhwa mu‑bhujorobhoke.” Kurwa ejo, niribhaga niniikuuya kw‑ikonderwa enene inguru ya obhujorobhoke bhwani, korereki amanaga ga Kirisito gabhe aamwi na anye. 10 Enikondererwa obhujorobhoke bhwani, ka wone enikondererwa amafumo, jimbuma, jinyaako, na ebhinyaasyo, bhinu ebhimbona inguru ya Kirisito. Enikondererwa, kwa okubha omwanya gunu enibha niri mujorobhoke, niwo enibha niri na amanaga.
Echiitimaato cha Pawuro inguru ya Abhakoriito
11 Naayika rwa omumuumu, nawe emwe neemwe mwareterera naayike kutyo. Emwe mwariga nimwendwa munkuuye. Noorwo araabha enibhonekana ati, niteeyire, anye nitari mutooto okukira bhanu abheerora wuti nibho jitumwa jingʼuru. 12 Omwanya gunu naariga niri kw‑imwe, ꞉neebhurisiisye okubha itumwa, kwa okubha ꞉naakorere ebhibharikisyo, ebhiruguusyo na ebhikorwa bhya amanaga kwa obhwigumiirisya bhwone. 13 Gutari‑wo omusango gwonegwone gunu ꞉naakorere mu‑makanisa agandi, gunu nitakorere kw‑imwe. ꞉Naataamiibhwe okukora omusango gumwi era, anye nitaabheeye omugugu kw‑imwe. Araabha obhwo nibhwo obhubhiibhi bhwani, munfwire echigongo!
14 Woori enitengeeja niije kw‑imwe eyo rwa kasatu, nawe nitaribha omugugu kw‑imwe. Nitakwenda ebhiinu bhyemwe, tari eneenda emwe abheene. Enaayika kutyo kwa okubha abhaana bhateeyire nibho bhabhiike ebhiinu inguru ya bheebhusi bheebhwe, tari abheebhusi nibho abheendwa bhabhiike ebhiinu inguru ya abhaana. 15 Anye enikondererwa okusoosya ebhiinu bhyani noorwo okwisoosya anye omwene, korereki nibhasakire. Nawe ejibhonekana ati, omwanya gunu anye enigenderera okubheenda muno, niwo emwe omugerura eryenda ryemwe kw‑anye.
16 Omwikirisya ati naariga nitari mugugu kw‑imwe, nawe noorwo kutyo, abhandi agati yeemwe abhaayika ati, anye niri mwenge, naabhakongyaga kwa obhurigerige. 17 Angu, ꞉naabhateesiisye echiinu choonechoone okutura ku‑bhaanu bhanu ꞉naatumire kw‑imwe? 18 ꞉Neerembeeresiisye Tiito aaje kw‑imwe, aamwi na omuyiri weeswe owundi mu‑riikirisya. Woori, Tiito ꞉aabhateesiisye echiinu choonechoone? Angu, mutakurora ati anye na omwene chiri chiinu chimwi ku‑mirimu, ka wone noorwo akatungiiywe keeswe ni kamwi?
19 Amwi omwitogera ati omwanya gunu gwone cheebhagira imbere yeemwe. Nawe echaayika emisango jinu imbere ya Nyamuwanga, chiri na obhumwi na Kirisito. Abheendwa bhaani, joone jinu echikora, ni inguru ya okubhasakira murumatane mu‑riikirisya. 20 Enuubhaya ati, omwanya gunu niribhaaja‑ko, amwi niribhasongʼana muri na akatungiiywe kanu katakunkondisya. Eryo ririreterera nikore jinu jitaribhakondera emwe. Enuubhaya ati enitura okubhasongʼana muri na inyombo, orwiso, risungu, orwango, okuromana, okwitemeeka, orwikuuya na injogere. 21 Enuubhaya ati, omwanya gunu niribhaaja‑ko rindi, Nyamuwanga waani arikora nirore jiswaro imbere yeemwe. Nirisurumbara okurora abhaanu bhaafu agati yeemwe bhanu ꞉bhaakorere ebhibhiibhi, bhachaari okubhita. Bhachaari na akatungiiywe karyakarya akabhiibhi ka obhujabhi, obhuromesi, na orukubho.