2 Abhakoriito 11

Pawuro na jitumwa ja orubheeyi

1 Noorwo araabha enaayika rwa omumuumu, enisabhwa muntegeresye‑wo kutooto. Mbe woori, muntegeresye! 2 Anye enibhafuyira, rifuwa rinu erisooka ku‑Nyamuwanga, kwa okubha muri rwa omuyarajuma, unu ꞉naasandiiye obhuko omurume umwi, omurume oyo niwe Kirisito. 3 Nawe woori enuubhaya ati, rwa kutyo Aawa ꞉aajigirwe na injoka irya indigendige, na emwe wone mwasiga okujigwa, nimusiga okwenda Kirisito mu‑bhwiyikanyibhwa na omutima omweru. 4 Enaayika kutyo, kwa okubha emwe muri bhaangu okuramira omuunu unu kaaja okuraasya emisango inguru ya Yeesu, jinu jitaasyanyiisye na jinu eswe ꞉chaaraasiisye. Ka wone, omuramira omwoyo ogundi, amwi emisango ejindi bhwangubhwangu era, noorwo kutyo ejitaasyanya na jinu ꞉mwaramiiye okusooka kw‑iswe.

5 Anye nitakwirora ati niri mutooto okukira bhanu abheerora wuti nibho jitumwa jingʼuru. 6 Noorwo kutyo ejibhonekana ati anye nitakumenya okwayika kisi, obhumenyi bhwani ni bhunene. Ogwo ꞉chaagweresiisye kw‑imwe ku‑mwanya gwone na ku‑njira joone.

7 ꞉Neekeeyiisye ku‑njira ya okuraasya Emisango ja Ekisi ja Nyamuwanga kw‑imwe nitari na omuyeero, korereki nibhariinyagisye. Angu, ꞉naakorere echibhiibhi ku‑musango ogwo? 8 Omwanya gunu naakoraga emirimu kw‑imwe, naariga nindamira jipirya okusooka mu‑makanisa agandi. Jiri wuti naariga nimbateesya ebhiinu bhyebhwe, korereki nibhasakire emwe. 9 Omwanya gunu naariga niri aamwi na emwe, naariga nitari mugugu ku‑muunu woonewoone agati yeemwe, mu‑kugerukirwa kwani. Abheekirisya bhanu ꞉bhaasookere mu‑mukoowa gwa Makedooniya, ꞉bhaanaaye bhinu naariga ninkena. Naariga niniikenga, naasiga okubha omugugu kw‑imwe noorwo na akatyari, ka wone enigenderera okukora kutyo. 10 Rwa kutyo echimari cha Kirisito chiri mu‑mwoyo gwani, atari‑wo omuunu noorwo umwi mu‑mukoowa gwone gwa Akaaya, unu kaatura okunyingirira okwikuuya inguru ya emisango ejo. 11 Nitakwayika kutyo kwa okubha nitakubheenda. Nyamuwanga kaamenya ati enibheenda.

12 Nirigenderera okukora emirimu rwa kutyo enikora woori, korereki bhanu abheerora wuti nibho jitumwa jingʼuru, bhaasiga okubhona omwanya gwa okwikuuya ati, abhakora emirimu rwa eswe. 13 Enaayika kutyo, kwa okubha abhaanu rwa abho, nibho jitumwa ja orubheeyi, abhakora emirimu mu‑bhurigerige, abheekora wuti, nibho jitumwa ja Kirisito. 14 Omusango ogwo, gutari gwa okuruguusya, kwa okubha noorwo Syetaani omwene, keekora wuti ni maraayika wa obhweru. 15 Kurwa ejo, gutari musango gwa okuruguusya, araabha abhakosi bhaaye wone abheekora wuti ni bhakosi bha obhurengeresi. Ku‑bhuteero bhwebhwe, bhariramira jinu ejiingana na ebhikorwa bhyebhwe.

Pawuro keekuuya inguru ya ebhinyaasyo bhyaye

16 Enibhabhwira rindi ati, omuunu woonewoone asige okwitogera ati anye niri mumuumu! Nawe noorwo kutyo omwitogera ati anye niri mumuumu, enibhasabhwa muntegeresye, korereki anye wone niikuuye kutooto. 17 Emisango ja okwikuuya jinu enaayika woori, jitakusooka ku‑Raatabhugenyi, tari enaayika rwa omuunu omumuumu. 18 Abhaanu bhaafu abheekuuya inguru ya emisango ja mu‑chaaro munu, kurwa ejo, musige anye wone niikuuye. 19 Emwe omwirora wuti muri bheengeeso, nikwo okukora omwigumiirisya abhaanu abhamuumu kwa okukondererwa. 20 Omwigumiirisya noorwo omuunu unu kaabhatuura mu‑bhugaya, unu kaabheebhira na okubhasaakura ebhiinu bhyemwe, ka wone unu keekora okubha omukuru inguru yeemwe na unu kaabhabhuma mu‑bhusu. 21 Enirora jiswaro okwayika ati, eswe ꞉chitaabhakoreeye ejo, kwa okubha eswe chiri bhajorobhoke muno!

Woori naayika rwa omumuumu ati, araabha ari‑wo omuunu unu ari na ribhaasi rya okwikuuya inguru ya gwonegwone, anye wone niri na ribhaasi rya okwikuuya inguru ya omusango ogwo. 22 Araabha abheene ni Bhayebhuraniya, anye wone niri Muyebhuraniya. Araabha abheene ni Bhayisirayeeri, anye wone niri Muyisirayeeri. Araabha abheene ni bha mu‑ruganda rwa Bhurayimu, anye wone niri wa mu‑ruganda rwa Bhurayimu. 23 Siga woori naayike rwa omusasi ati, araabha abheene ni bhakosi bha Kirisito, anye niri mukosi wa Kirisito okubhakira. Anye niikomeesiisye okukora emirimu muno, nibhoyerwe mw‑ibhoyero kwiya kaafu muno, nibhumirwe kwiya kaafu muno, ka wone naariga niri mu‑ngʼanga ya okufwa kwiya kaafu. 24 ꞉Naabhumirwe na Abhayawudi kwiya kataanu, jijaridi makumi gasatu na etaanu na ena. 25 ꞉Naabhumirwe jisimbo na Abharuumi kwiya kasatu, ꞉naabhumirwe rumwi kwa amabhuyi, ꞉naatikiiywe ingarabha mu‑nyanja kwiya kasatu, nibhucha, ndigwa niri mu‑bhusibha. 26 Kwiya kaafu mu‑ngʼendo jaani, naariga niri mu‑ngʼanga ya okugegwa na emisima, mu‑ngʼanga ya okugwatwa na abhasaakusi, mu‑ngʼanga ya okusooka ku‑Bhayawudi bheejaasu na okusooka ku‑bhaanu bhanu bhatari Bhayawudi. Naariga niri mu‑ngʼanga mu‑misi, mu‑ngʼanga mw‑ibhara, na mu‑nyanja. Naariga niri mu‑ngʼanga ya okunyaasibhwa na bhanu abheekora wuti ni bheekirisya abheejaasu. 27 Nikorere emirimu misito na okunyaaka, kwiya kaafu nitawongeeye, nisaraariiye na okuungwa obhwiro bhwa amanji, kwiya kaafu nibhurirwe ebhiryo, nuunguuwe imbewo keenu nitari na emyenda. 28 Aamwi na ejo joone, bhuri rusuku enisitoyerwa na emirimu jaani ku‑makanisa goone. 29 Araabha omuunu woonewoone ni mujorobhoke, anye wone eniiyungwa okubha omujorobhoke. Araabha abhaanu bharetereeye omuunu woonewoone okukora ebhibhiibhi, anye wone enirumwa.

30 Araabha neenderwe okwikuuya, enija okwikuuya inguru ya obhujorobhoke bhwani. 31 Nyamuwanga Esemwene Raatabhugenyi Yeesu, unu eeyire okukusibhwa akajaanende koone, amenyere ati nitakwayika orubheeyi. 32 Omwanya omurebhe naariga niri mu‑musi gwa Damaasiko. Eyo niyo omutangasya wa omukoowa unu aariga ari emwaro ya omukama Areeta, ꞉aateeye abhariisi ku‑miryango ja omusi ogwo, korereki bhangwate. 33 Nawe abhaanu abharebhe nibhantuura mw‑itukuru rinene nibhooromosya ritukuru eryo mw‑iwundu rinene ku‑ndugu ya omusi, niiwona okugwatwa.