Inyarubha ya okwamba ya Pawuro
ku‑Bhakoriito
Obhutangati
Inyarubha inu, ꞉yaakaamirwe na Pawuro, itumwa ya Kirisito Yeesu. ꞉Aakaamiiye rikanisa rinu ryariga riri mu‑musi gwa Koriito. Pawuro niwe ꞉aambisiisye rikanisa eryo. ꞉Aakaamire inyarubha inu omwanya gunu aariga ari mu‑musi gwa Yefeeso.
Omusi gwa Koriito ꞉gwamenyekeene muno mu‑chaaro cha Ebhugiriiki na mu‑bhutungi bhwone bhwa Echiruumi. Omusi ogwo gwariga guri ku‑njekekera ya inyanja ya Mediteraneeya. Abhaanu bhaafu okusooka mbaara joone bhaariga nibhagusya na okugura ebhiinu bhyafu mu‑musi ogwo. Abhaanu abho bhaariga bhari na jitungwa ja mbaga nyafunyafu, ku‑chijekekanyo okusabhwa na okuramirisya amasusano ga amasambwa. Jitungwa ejo ꞉jaakorere abheekirisya nibhabha rwa abhasasi mu‑riikirisya ryebhwe na okubhuusya Pawuro inguru ya emisango myafumyafu jinu bhaayaajanaga najo (7:1).
Obhukarariiye bhwa Pawuro okukaama inyarubha inu, bhwariga bhuri kusoosya amaragiriro inguru ya emisango jinu aariga oonguuwe okusooka ku‑Bhakoriito. Ku‑songa eyo, kaabhakaamira bhabhe na obhumwi, bhasige okwawukana wuri. Keeresya ati omwene niwe itumwa ya Yeesu Kirisito na kaakora omurimu gwa okuraasya Emisango ja Ekisi. Ka wone keeyigisya kutyo jiiyire abheekirisya bheekare mu‑bhutwarwa bhwebhwe. Aamwi na ejo, kaabhakaamira inguru ya obhwisombooro bhwa risabhwa, ebhiyaanwa bhya Mwoyo Mweru na obhusuuruko bhwa abhafuuwe. Kaakaama ejo okusakira rikanisa Koriito eyo na okukora rirumatane, korereki ryasiga okunyarambuka.