Amaragiriro inguru ya obhutwarwa
7
1 Woori enija okwayika inguru ya emisango jinu ꞉mwankamiiye. Omwayika ati, “Ni kisi omurume asige okumaama na omugasi.”a 2 Nawe ku‑songa ya okwikenga ingʼanga ya okukora obhuromesi, bhuri murume abhe na omugasi waaye omwene, na bhuri mugasi abhe na omurume waaye omwene. 3 Omurume akorerega omugasi waaye rwa kutyo jeenderwe, omugasi wone akorerega omurume waaye rwa kutyo jeenderwe. 4 Omugasi atari na obhuturo inguru ya omubhiri gwaye, tari murume waaye. Omurume wone atari na obhuturo inguru ya omubhiri gwaye, tari mugasi waaye. 5 Mwasiga okwimana, tari araabha mweekirisyanya okukora kutyo katungu kafuyi era, korereki mubhone omwanya gwa ekisi gwa okusabhwa Nyamuwanga. Mukamara ogwo, musubhirane rindi, korereki Syetaani aasiga okubharegeeja mukore obhuromesi kwa okubha mutakutura okwiyingirira.6 Naabhabhwira emisango ejo okubheekirisisya era okusigana katungu kafuyi inguru ya okusabhwa, jitari ati enibhasinyiirisya. 7 Anye naakeendere abhaanu bhoone bhabhe rwa kutyo anye niri,b nawe jitari kutyo kwa okubha bhuri muunu Nyamuwanga amuyaaye echiyaanwa chaaye, owumwi echiyaanwa chinu, owundi chirya.
8 Woori, enibhabhwira bhanu bhachaari okutwara,c na abhatumbagasi agati yeemwe, ati ni kisi bheegumiirisye okurama bheenyere, rwa kutyo anye niri. 9 Nawe araabha bhatakutura okwiyingirira, ni kisi bhatware amwi bhatwarwe, kwa okubha ni akiri kukora kutyo okukira okunyaasibhwa na okurigira okubhiibhi kwa omubhiri.
10 Ku‑bhanu bhatwareene, enibharagirira. Riragiriro eryo ritari ryani, tari risookere ku‑Raatabhugenyi Yeesu, ati, omugasi aasiga okutaana na omurume waaye.d 11 Nawe araabha akataana nage, aasiga okutwarwa na omurume owundi, araabha jitari kutyo, oongwane na omurume waaye na okusubhirana nage. Omurume wone, aasiga okutaana na omugasi waaye.
12 Woori enija okwayika na abheekirisya abhandi. Emisango jinu eneenda okwayika ni bhwiganirisya bhwani gatari amaragiriro ga Raatabhugenyi Yeesu. Araabha omurume omwikirisya atwaye omugasi unu atari mwikirisya, na omugasi oyo eekirisiisye okugenderera okwikara nage, omurume oyo, aasiga okutaana nage. 13 Nyabhuriko, omugasi omwikirisya, araabha atwawe na omurume unu atari mwikirisya, na omurume oyo eekirisiisye okugenderera okwikara nage, omugasi oyo, aasiga okutaana nage. 14 Enaayika kutyo, kwa okubha Nyamuwanga keesya omurume unu atari mwikirisya, ku‑songa ya omugasi waaye. Omugasi wone unu atari mwikirisya, Nyamuwanga kaamwesya ku‑songa ya omurume waaye. Araabha jikabheeye jitari kutyo, abhaana bheemwe bhatakabheeye abhaana bha Nyamuwanga, tari woori ni bhaana bhaaye.
15 Nawe araabha unu atari mwikirisya keenda okutaana na oweejaabho omwikirisya, mumusige akore kutyo. Awo omwikirisya oyo atakubhoywa na obhutwarwa obhwo. Tari Nyamuwanga achibhirikiiye korereki chiikare kwa omurembe.e 16 Awe omugasi omwikirisya, utakutura okumenya! Amwi omurume waawo aritura okwikirisya Kirisito ku‑songa ya eriikirisya ryawo. Awe omurume omwikirisya, utakutura okumenya! Amwi omugasi waawo aritura okwikirisya Kirisito ku‑songa ya eriikirisya ryawo.
Bhuri mwikirisya eekare rwa kutyo aariga ari, omwanya gunu ꞉aabhirikiiywe na Nyamuwanga
17 Bhuri muunu eekare okuruubhana na obhutinge bhwa Raatabhugenyi, ka wone asigare rwa kutyo aariga ari, omwanya gunu Nyamuwanga ꞉aamubhirikiiye. Nikwo kutyo eniragirira mu‑makanisa goone. 18 Araabha omuunu ꞉aabhirikiiywe na Nyamuwanga omwanya gunu aariga atenderwe,f aasiga okwikora wuti ꞉ataatenderwe. Ka wone, araabha omuunu ꞉aabhirikiiywe na Nyamuwanga omwanya gunu aariga achaari okutendwa, aasiga okutendwa. 19 Okutendwa amwi okurema okutendwa kutari‑mo omuriiro. Echiinu chinu chiri na omuriiro ni kuruubha amaragiriro ga Nyamuwanga.
20 Woori, bhuri muunu asigare ari rwa kutyo aariga ari, omwanya gunu Nyamuwanga ꞉aamubhirikiiye. 21 Araabha Nyamuwanga ꞉aakubhirikiiye omwanya gunu waariga uri mugaya, ogwo gwasiga okukunyaasya. Nawe araabha waakabhona omwanya gwa okwituura mu‑bhwitaage, nuukorere emirimu omwanya ogwo. 22 Naayika ati ogwo gwasiga okukunyaasya, kwa okubha omuunu unu aariga ari mugaya omwanya gunu ꞉aabhirikiiywe na Raatabhugenyi, oyo ni mwitaage ku‑Raatabhugenyi. Ka unu aariga ari mwitaage omwanya gunu ꞉aabhirikiiywe, oyo ni mugaya wa Kirisito. 23 ꞉Mwagurirwe kwa obhugusi obhurambu. Kutyo, mwasiga okubha abhagaya bha abhaanu. 24 Abhayiri bhaani mu‑riikirisya, bhuri muunu asigare ari imbere ya Nyamuwanga rwa kutyo aariga ari, omwanya gunu ꞉aabhirikiiywe nage.
Amaragiriro ku‑bhanu bhachaari okutwarwa na ku‑bhatumbagasi
25 Woori, ku‑bhayarakaji bhanu bhachaari okutwarwa,g nitari na riragiriro okusooka ku‑Raatabhugenyi Yeesu. Nawe ku‑bhwiganirisya bhwani enibhatongera, anye unu niiyire okwiyikanyibhwa ku‑songa ya echigongo cha Nyamuwanga. 26 Mbe, kwa okubha jiri‑wo jinyaako nyafu mu‑siku jinu, eniiganirisya ati ni kisi omuunu abhe rwa kutyo ari. 27 Araabha utwaye, waasiga okwenda okutaana na omugasi waawo. Araabha uchaari okutwara, waasiga okwenda okutwara. 28 Nawe noorwo araabha ukatwara, owubha utakorere echibhiibhi. Omuyarakaji wone, araabha akatwarwa, kaabha atakorere echibhiibhi. Tari, bhanu bhatwareene bharibha na jinyaako mu‑bhurame bhunu. Anye naakeendere jinyaako rwa ejo jaasiga okubhabhona.
29 Abhayiri bhaani mu‑riikirisya, eneenda okwayika ati, akatungu kanu kasigaaye okukingira Kirisito okusubha, ni kafuyi. Kutyo, okusookerera woori bhanu bhatwaye bhasigega okwiganirisya abhagasi bheebhwe era, korereki bhakore emirimu ja Raatabhugenyi. 30 Abhaanu bhanu abharira, bhabhe rwa bhanu bhatakurira, bhanu abhakonderwa, bhabhe rwa bhanu bhatakukonderwa, bhanu abhagura ebhiinu, bhabhe rwa bhanu bhatari na echiinu, 31 na bhanu abhanyaakirira obhurame bhwa ku‑chaaro chinu, bhasige okunyaakirira muno emisango ejo, kwa okubha echaaro chinu echiyitingʼana rwa kutyo echichirora.
32 Eneenda mwasiga okubha na echiwerewere inguru ya emisango ja obhurame bhunu. Omuunu unu achaari okutwara, kaafurubhendera emirimu ja Raatabhugenyi, keeganirisya kutyo arikondisya Raatabhugenyi. 33 Nawe omuunu unu atwaye, kaanyaakiririra emisango ja obhurame bhunu, keeganirisya kutyo arikondisya omugasi waaye, 34 obhwiganirisya bhwaye bhuribha mbaara ebhiri. Wone omugasi unu atari na omurume, noorwo omuyarakaji kaafurubhendera emirimu ja Raatabhugenyi korereki eesoosye omubhiri na omwoyo ku‑Raatabhugenyi. Nawe omugasi unu atwawe, kaanyaakiririra emisango ja obhurame bhunu, keeganirisya kutyo arikondisya omurume waaye. 35 Enaayika emisango ejo ku‑songa ya omuriiro gwemwe, jitari ati eneenda okubhayingirira. Eneenda ati mwikarega rwa kutyo jiiyire, mukorerega emirimu Raatabhugenyi mu‑mutima gwone.
36 Omuunu woonewoone unu kaarora ati jitari ja kisi okusiga okutwara omuyarakaji unu ateeye‑ko obhuko, ka wone araabha okurigira kwaye okumuyiga,h na omuunu oyo kaarora ati jiiyire bhatwarane, akore rwa kutyo keenda, bhatwarane. Awo kaabha atakorere echibhiibhi. 37 Araabha omumura aaramura mu‑mwoyo gwaye omwene ati atakutwara omuyarakaji oyo, na chitari‑wo echiinu chinu echimusinyiirisya okutwara, ka wone kaatura okuyingirira okurigira kwaye, mbe, kaabha akorere kisi. 38 Kutyo, unu kaaramura okutwara omuyarakaji unu ateeye‑ko obhuko, kaakora kisi. Unu atakutwara, kaakora kisi muno.i
39 Omugasi unu atwawe, kaabhoywa na obhutwarwa omwanya gwone gunu omurume waaye ni muwanga. Nawe omurume waaye akeefurwa ˆnaafwa, awo kaabha mwitaage okutwarwa na omurume woonewoone unu keenda, nawe omurume oyo abhe ari muruubhirisya wa Raatabhugenyi. 40 Nawe ni akiri muno omutumbagasi oyo asigare atatwawe. Obhwo ni bhwiganirisya bhwani, na eniiganirisya ati anye wone Mwoyo wa Nyamuwanga kaantangasya okwayika emisango ejo.