Ebhiryo bhinu bhisyengeeywe ku‑masusano
8
1 Woori enija okwayika inguru ya ebhiryo bhinu bhisyengeeywe ku‑masusano.a Rwa kutyo omwayika, chimenyere ati, “Eswe bhoone chiri na obhumenyi.” Nawe obhumenyi obhukora abhaanu okwikuuya. Tari eryenda niryo erikomeesya abhaanu mu‑riikirisya. 2 Araabha omuunu keerora ati kaamenya omusango omurebhe, oyo achaari okumenya gwonegwone rwa kutyo keendwa amenye. 3 Nawe omuunu unu keenda Nyamuwanga, oyo niwe kaamenyekana ku‑Nyamuwanga omwene.4 Woori inguru ya okurya ebhiryo bhinu bhisyengeeywe ku‑masusano, echimenya ati amasusano ganu agaramirisibhwa, gatari chiinu ku‑chaaro kunu. Ka wone echimenya ati ari‑wo Nyamuwanga umwi wenyere. 5 Ni chimari ati abhaanu abhandi abheetogera ati gari‑wo amasambwab mu‑rwire na noorwo mu‑chaaro. Chimari, bhiri‑wo ebhiinu bhyafu bhinu abhaanu abhabhirikira ati amasambwa amwi abhatungi. 6 Nawe kw‑iswe, ari‑wo Nyamuwanga umwi wenyere, niwe Raata, niwe ꞉aabhumbire ebhiinu bhyone. Eswe chiikaaye inguru yaaye. Ka wone ari‑wo Raatabhugenyi umwi wenyere, niwe Yeesu Kirisito, na ebhiinu bhyone ꞉bhyabhumbirwe okutura ku‑mwene, ka wone eswe chiri bhaanga okutura ku‑mwene.
7 Nawe jitari ati abhaanu bhoone bhari na obhumenyi obhwo, kwa okubha bhari‑wo abhandi bhanu bhaariga bhari na jitungwa ja okuramirisya amasusano. Noorwo woori, omwanya gunu abharya ebhiryo bhinu bhisyengeeywe ku‑masusano, ebhiryo ebhyo ebhibhakora okwiganirisya amasusano. Awo abheerora mu‑mitima jeebhwe ati abhakora echibhiibhi, kwa okubha bhachaari okurumatana mu‑riikirisya. 8 Woori, ebhiryo bhitakukora chibhe ayeeyi na Nyamuwanga, kwa okubha noorwo chikasiga okurya, chitakugerukirwa‑ko echiinu, ka wone noorwo chikarya, chitakwongesibhwa‑ko echiinu.
9 Nawe mwiyangarire kisi, obhwitaage bhwemwe bhwasiga okukora mubhe echiikuujuro ku‑bhanu bhachaari okurumatana mu‑riikirisya. 10 Enaayika kutyo, kwa okubha omuunu unu achaari okurumatana mu‑riikirisya, araabha aarora awe unu owumenya ati amasusano gatari na obhuwanga, nuurya ebhiryo mw‑iyekaru rya okuramirisya‑mo amasusano, angu, atariiganirisya mu‑mutima gwaye ati omwene wone eeyire okurya ebhiryo bhinu bhisyengeeywe ku‑masusano? 11 Ku‑njira eyo, omwikirisya oweejaanyu unu achaari kurumatana mu‑riikirisya, unu Kirisito ꞉aafwiriiye, kaatura okusingaarika okuruubhana na obhumenyi bhwawo.
12 Kutyo, araabha mukakayira abheekirisya abheejaanyu bhanu bhachaari kurumatana mu‑riikirisya, na okuwutaasya emitima jeebhwe, awo omubha nimukayira Kirisito omwene. 13 Kurwa ejo, araabha ebhiryo bhinu enirya, ebhiyabhya omwikirisya oweejaasu, nitarirya rindi inyama noorwo na akatyari, korereki naasiga okureterera omwikirisya oweejaasu akore echibhiibhi.