Pawuro atakukorera emirimu obhwitaage bhwaye bhwa obhutumwa
9
1 Woori, anye nitari mwitaage? Anye nitari tumwa? Anye ꞉nitaarorere Raatabhugenyi weeswe Yeesu? Ka wone emirimu jinu anye ꞉naakorere jitari nijo jinu jikorere emwe mwikirisye Raatabhugenyi? 2 Noorwo araabha abhaanu abhandi abharora ati anye nitari tumwa, nawe kw‑imwe anye niri tumwa. Okubha eriikirisya ryemwe mu‑Kirisito nicho echibharikisyo chinu echeeresya ati anye niri tumwa ya Raatabhugenyi.3 Abhaanu bhanu abhabhuusirisya emirimu jaani ja obhutumwa, enibhabhwira ati, 4 eswe chiteeyire okuyaanwa ebhiryo na ebhya okunywa inguru ya omurimu gweswe gwa obhutumwa? 5 Woori, omwitogera ati eswe chitari na obhwitaage bhwa okugenda na abhagasi abheekirisya, mu‑rugendo rwa okuraasya emisango inguru ya Kirisito, rwa kutyo jitumwa ejindi, na abhamura bhaabho Raatabhugenyi Yeesu abhagenda nabho, noorwo Keefa? 6 Amwi naanye na Bharinaabha era bhanu echeendwa okukora emirimu korereki chibhone ebhiinu inguru ya obhurame bhweswe? 7 Ni musirikare ki unu kaagenda mw‑iremo kwa okwiriyira omwene? Ni murimi ki unu kaayamba emijabhiibhu mw‑isambu ryaye, ˆnaasiga okurya amatwasyo gaaryo? Ka wone ni mureefi ki unu kaareebha ebhitunganwa, ka ˆnaasiga okunywa amata ga ebhitunganwa ebhyo?
8 Emisango jinu enaayika, bhutari bhwiganirisya bhwa abhaanu, noorwo ebhiraagiro bhya Muusa wone ebhyayika kutyo. 9 Mu‑bhiraagiro bhya Muusa jikaamirwe ati, “Iingʼa ikabha niiwuura obhuro, waasiga okuyibhoya omunwa.”a Woori, nikwo okwayika ati ku‑misango ejo Nyamuwanga keeganirisya inguru ya iingʼa? 10 Tere aariga ˆnaayika inguru yeeswe? Nikwo kutyo jiri! Ebhikaame ebhyo ꞉bhyakaamirwe inguru yeeswe, okubha unu kaarima na unu kaagesa, bhoone abheendwa bheeyikanye ati bharibhona‑ko omugabho. 11 Eswe ꞉chaabharaasisiisye emisango inguru ya Kirisito, rwa omuunu unu kaabhibha jimbibho. Woori, ni musango ki omukomeeye kw‑imwe okuchiyaana ebhiinu bhya okurya na okunywa, korereki chibhone omuriiro, rwa omuunu unu kaagesa? 12 Araabha abhandi bheeyire okubhona ebhiinu rwa ebhyo okusooka kw‑imwe, woori eswe, chiteeyire muno okuyaanwa ebhiinu ebhyo?
Nawe eswe ꞉chitaatongere bhinu chiiyire okuyaanwa na emwe, tari cheegumiirisya mu‑joone, korereki chaasiga okuyingirira abhaanu okwikirisya Emisango ja Ekisi inguru ya Kirisito. 13 Angu, mutakumenya ati bhanu abhakora emirimu mw‑Iyekaru rya Nyamuwanga,b abhabhona ebhiryo bhyebhwe okusooka mw‑Iyekaru eryo? Ka wone, mutakumenya ati bhanu abhakora emirimu ja ku‑chigabhiro, abharamira omugabho gwebhwe, okusooka ku‑bhinu ebhisoosibhwa echoogo? 14 Ka wone Raatabhugenyi Yeesu aragiriiye kutyokutyo ati, bhanu abharaasya Emisango ja Ekisi, bhabhonega obhukene bhwebhwe okuruubhana na emirimu ejo.
15 Nawe anye nichaariga okutonga noorwo echiinu chimwi ku‑bhinu niiyire okuyaanwa. Ka wone nitakukaama kutyo, korereki niyaanwe ebhyo. Kw‑anye ni akiri nifwe okukira okusakirwa ebhiinu okusooka kw‑imwe, kwa okubha nitakwenda omuunu woonewoone angaanye okwikuuya inguru ya okuraasya Emisango ja Ekisi, kwa okunaana ebhiinu. 16 Anye niteeyire okwikuuya ku‑songa ya okuraasya Emisango ja Ekisi, okubha ni bhusibhusi kw‑anye okuraasya omusango ogwo. Ka wone jirimbona araabha nitakuraasya Emisango ja Ekisi ejo. 17 Araabha naakabheeye ninkora omurimu gunu mu‑kwenda kwani omwene, nakeeyikanyiisye okubhona omuyeero. Nawe jitari kutyo kw‑anye, kwa okubha Nyamuwanga anaaye omurimu gunu mu‑kwenda kwaye, korereki nigukore. 18 Woori echiyaanwa chaani niki? Echiyaanwa chaani nicho okuraasya Emisango ja Ekisi okuriywa wuri, okutonga wuri, chinu niiyire okuyaanwa inguru ya okuraasya Emisango ejo.
Emisango jinu jitumwa ejikenwa okukora
19 Anye nitari mugaya wa omuunu woonewoone, niri mwitaage. Nawe niiteeye‑wo okubha omugaya wa abhaanu bhoone, korereki okusakira abhaanu bhaafu bheekirisye Kirisito. 20 Ku‑bhayawudi, naariga niri rwa Omuyawudi, korereki okubhasakira bheekirisye Kirisito. Anye omwene nitari emwaro ya ebhiraagiro bhya Muusa, nawe ꞉neeteeye emwaro ya ebhiraagiro ebhyo, inguru ya bhanu abharuubha ebhiraagiro ebhyo, korereki okubhasakira bheekirisye Kirisito. 21 Ku‑bhanu bhatari na ebhiraagiro bhya Muusa, naariga niri rwa omuunu unu atari na ebhiraagiro ebhyo, korereki okubhasakira bheekirisye Kirisito. Ogwo gutari na obhugajuro ati nitari na ebhiraagiro imbere ya Nyamuwanga. Tari niri nabhyo kwa okubha enitangasibhwa na ebhiraagiro bhya Kirisito. 22 Ku‑bhanu bhari bhajorobhoke, naariga niri mujorobhoke, korereki nibhasakire bheekirisye Kirisito. ꞉Naakorere joone ku‑bhaanu bhoone, korereki ku‑njira yooneyoone irya nichungure‑ko abhaanu abharebhe ku‑bheene. 23 Enikora ejo joone inguru ya Emisango ja Ekisi, korereki nisangire na abhandi mu‑mabhando gaajo.
24 Mutakumenya ati abhaanu bhanu abhayaajana mu‑kubhirima, abhabhirima bhoone, nawe unu kaaramira echiyaanwa ni umwi wenyere? Woori mubhe nimubhirima muno, korereki muramire echiyaanwa. 25 Abhaanu bhanu abhayaajana ku‑bhwenywa, abheeyingirira ku‑myafu inguru ya okuyaajana. Abhakora kutyo korereki bharamire orutengya rwa obhuyigi rwa akatungu kafuyi era. Nawe eswe echikora kutyo, korereki chiramire orutengya rwa obhuyigi runu orurama akajaanende koone. 26 Ku‑songa eyo anye nitakubhirima rwa omuunu unu kaabhirima atari na obhukarariiye, ka wone nitakurwana rwa omuunu unu kaarasa inguumi ˆnaatasya. 27 Tari eninyaasya na okunasya omubhiri gwani okwigumiirisya, korereki nikamara okuraasisya abhaanu Emisango ja Ekisi, anye omwene naasiga okuremwa imbere ya Nyamuwanga.