Okukengya inguru ya okuramya amasusano
10
1 Abhayiri bhaani mu‑riikirisya, eneenda mumenye ati, omwanya gunu bhasaaja weeswe bhaasookaga Miisiri, bhoone bhaariga nibhatangasibhwa na eriire,a ka wone bhoone ꞉bhaaturire agatigati ya inyanja. 2 Jiri wuti ꞉bhaabhatiijiibhwe mu‑riire na mu‑nyanja okubha abharuubhirisya bha Muusa.b 3 Bhoone ꞉bhaariiye ebhiryo bhinu ꞉bhyasookere mu‑rwire.c 4 Ka wone bhoone ꞉bhaanyweye amanji ganu ꞉gaasookere ku‑Nyamuwanga. Amanji ago ꞉gaasookere ku‑rutared runu rwaribhataga aamwi nabho. Orutare orwo rwariga ruri Kirisito. 5 Nawe abhaafu mu‑bheene, bhaariga nibhakora jinu ꞉jitaakondeeye Nyamuwanga, kurwa ejo nibhasingaarisibhwa, emitumbi jeebhwe nijiswirana mw‑ibhara.6 Mbe, emisango ejo ni bhijekekanyo kw‑iswe, korereki chaasiga okwigomba amabhiibhi, rwa kutyo abheene ꞉bheegombere amabhiibhi. 7 Mwasiga okuramya amasusano, rwa kutyo abhandi mu‑bheene bhaariga nibhakora. Inguru yeebhwe jikaamirwe mu‑Bhikaame Ebhyeru ati, “Abhaanu ꞉bhaategere jinenda okurya na okunywa, na bhejire bhaamara nibheemereeguru okubhina.”e 8 Ka wone chaasiga okukora obhusengani, rwa kutyo abhandi mu‑bheene bhaariga nibhakora, okukingira ku‑rusuku rumwi nibhasingaarisibhwa abhaanu ebhiwumbi makumi gabhiri na bhisatu.f 9 Ka wone, chisige okuregeeja Raatabhugenyi,g rwa kutyo abhandi mu‑bheene ꞉bhaamuregeejere, nibharumwa na jinjoka, nibhafwa.h 10 Ka wone, mwasiga okujujuuma rwa kutyo abhandi mu‑bheene ꞉bhaajujuumire, nibheetwa na maraayika omusingaarisya.i
11 Mbe, emisango ejo joone ꞉jaabhabhwene, ꞉jaakaamirwe korereki bhibhe ebhijekekanyo bhya okuchikengya eswe bhanu chiri mu‑siku jinu ja obhuteero. 12 Kutyo, unu keerora ati eemereeguuyu tiritiri mu‑riikirisya, eeyangarire, aasiga okugwa. 13 Amaregeejo ganu gaabhabhona, gari rwa ganu abhaanu abhandi abhabhona bhuri rusuku. Nyamuwanga ni mwiyikanyibhwa, omwene atakuja okubhasiga muregeejibhwe okukira obhuturo bhwemwe. Omwanya gunu emwe omuregeejibhwa, Nyamuwanga kaja okubhayaana obhuturo bhwa okwigumiirisya na okubheeresya injira ya okusooka omwo.
14 Kutyo, abheendwa bhaani, mwikenge mwasiga okuramya amasusano! 15 Enaayika na emwe bhanu muri na obhwenge, kutyo muramure emwe abheene inguru ya jinu enaayika. 16 Omwanya gunu echisiima Nyamuwanga inguru ya omutawo gurya gwa amabhando ga ebhiryo bhya Raatabhugenyi, owubha chitakusangira aamwi isagama ya Yeesu Kirisito? Ka wone, omwanya gunu echibheganya omukaate, owubha chitakusangira aamwi omubhiri gwa Kirisito? 17 Omukaate gunu echisangira eswe bhoone ni gumwi. Kurwa ejo, eswe bhoone chiri mubhiri gumwi, noorwo kutyo chiri bhaafu.
18 Muringire Abhayisirayeeri. Abhaanu bhanu abharya bhinu ꞉bhyasoosiibhwe echoogo ku‑chigabhiro, abhasangira okuramya Nyamuwanga.j 19 Woori, eneenda okwayika ki? Angu, ebhiryo bhinu bhisyengeeywe ku‑masusano bhiri na omuriiro gwonegwone? Amwi ati amasusano wone gari na omuriiro ki? 20 Wuri! Omusango gunu enaayika ni ati ebhyogo bhinu abhasoosya abhanyamanga, bhatakubhisoosisya Nyamuwanga, tari abhabhisoosisya amasambwa. Ka anye nitakwenda emwe musangire aamwi na amasambwa. 21 Mutakutura okunywera omutawo gwa Raatabhugenyi na ogwa amasambwa. Mutakutura okusangira ebhiryo bhya Raatabhugenyi na ebhya amasambwa. 22 Tere, echeenda okukora Raatabhugenyi abhe na rifuwa? Omwitogera ati chiri na amanaga okumukira?
Jinu abheekirisya abhakora jikusye Nyamuwanga
23 Abhaanu abhandi agati yeemwe abhaayika ati, “Chiikirisiibhwe okukora bhuri chiinu chinu echeenda.” Nawe anye enaayika ati, jitari ati emisango joone jiri na omuriiro. Ka wone abhaayika ati, “Chiikirisiibhwe okukora bhuri chiinu chinu echeenda.” Nawe anye enaayika ati, jitari ati emisango joone ejisakira eriikirisya ryeswe rirumatane. 24 Omuunu aasiga okwigana jinu ejisakira omwene era, tari eegane jinu ejisakira abheejaabho.
25 Murye inyama yooneyoone inu eyigusibhwa mw‑iguriro kubhusirisyabhusirisya wuri, korereki mwasiga okunyaaka mu‑mitima jeemwe, 26 kwa okubha jikaamirwe mu‑Bhikaame Ebhyeru ati, “Echaaro aamwi na ebhiinu bhyone bhinu bhiri‑mo ni bhya Raatabhugenyi.”k
27 Araabha omuunu unu atari mwikirisya aabhakuma okurya, na emwe mweekirisya okugenda, murye inyama yooneyoone inu abheeraabhiiye kubhusirisyabhusirisya wuri, korereki mwasiga okunyaaka mu‑mitima jeemwe. 28 Nawe araabha omuunu akabhabhwira ati, “Ebhiryo bhinu bhisyengeeywe ku‑masusano,” awo mwasiga okurya ebhiryo ebhyo, inguru ya omuunu unu aabhabhwira, ka wone inguru ya omutima. 29 Omwanya gunu enaayika, “Inguru ya omutima,” nitakwayika inguru ya emitima jeemwe, tari inguru ya omutima gwa omuunu unu aabhabhwira. Nawe kurwa ki okubhuurwa mu‑mutima gwa owundi, kuyingirire obhwitaage bhwani? 30 Araabha anye enirya ebhiryo ebhyo mu‑kusiima Nyamuwanga, kurwa ki nifumwe ku‑songa ya ebhiryo bhinu naasiima Nyamuwanga?
31 Mbe woori, gwonegwone gunu omukora, kubhe ni kurya, kubhe ni kunywa, amwi noorwo omusango ogundi, mugukorega inguru ya okukusya Nyamuwanga. 32 Mwasiga okubha echiikuujuro ku‑Bhayawudi, ku‑bhaanu bhanu bhatari Bhayawudi, noorwo mw‑ikanisa rya Nyamuwanga. 33 Mubhe rwa kutyo anye niri. Eniikomeesya okukondisya abhaanu bhoone ku‑misango joone jinu enikora. Jitari ati enikora kutyo, korereki anye omwene niibhonere omuriiro, tari enikora kutyo, korereki abhaanu bhaafu bheebhonere omuriiro korereki bhachungurwe.