1 Abhakoriito 11

1 Kutyo mubhega nimunduubha, rwa kutyo anye wone eniruubha Kirisito.

Obhwisombooro bhwa okusabhwa

2 Enibhakuuya kwa okubha omunyichuka ku‑misango joone, na omuruubha ameeyigisyo ganu ꞉naabheeyigisiisye. 3 Nawe woori eneenda mumenye ati omutwe gwa omurume woonewoone omwikirisya ni Kirisito, omutwe gwa omugasi ni murume waaye, na omutwe gwa Kirisito ni Nyamuwanga. 4 Kutyo, omurume woonewoone omwikirisya unu kaaswikira omutwe gwaye omwanya gunu kaasabhwa, amwi omwanya gunu kaasoosya obhuragi, oyo kaaswasya Kirisito, unu ari mutwe gwaye. 5 Tari bhuri mugasi omwikirisya unu atakuswikira omutwe gwaye omwanya gunu kaasabhwa, amwi omwanya gunu kaasoosya obhuragi, oyo kaaswasya omutwe gwaye, nikwo okwayika ati omurume waaye. Ejibha kutyo, kwa okubha kaabha rwa omugasi unu amwegere orutuubhwi. 6 Araabha omugasi atakuswikira omutwe gwaye, amwege jifwiri jaaye! Nawe ni swaro ku‑mugasi okumwega jifwiri, kutyo, ni akiri aswikire omutwe gwaye. 7 Jiteeyire ku‑murume okuswikira omutwe, kwa okubha omwene ni chijekekanyo cha Nyamuwanga, ka wone keeresya rikusyo rya Nyamuwanga. Nawe omugasi keeresya rikusyo rya omurume waaye. 8 Enaayika kutyo kwa okubha Nyamuwanga ꞉ataabhumbire omurume okusooka ku‑mugasi, tari ꞉aabhumbire omugasi okusooka ku‑murume. 9 Ka wone Nyamuwanga ꞉ataabhumbire omurume inguru ya omugasi, tari ꞉aabhumbire omugasi inguru ya omurume. 10 Inguru ya ogwo, ka wone inguru ya bhamaraayika, omugasi keendwa aswikire omutwe gwaye, okweresya ati, ari emwaro ya obhuturo bhwa omurume waaye.

11 Nawe mu‑kubha na obhumwi na Raatabhugenyi, omugasi keeyikanya omurume, omurume wone keeyikanya omugasi. 12 Enaayika kutyo, kwa okubha rwa kutyo omugasi ꞉aabhumbirwe okusooka ku‑murume, nyabhuriko omurume keebhurwa na omugasi. Nawe ebhiinu bhyone ebhisooka ku‑Nyamuwanga. 13 Woori muramure abheene, jiiyire omugasi okusabhwa Nyamuwanga ataswikiiye wuri omutwe gwaye? 14 Mbawo noorwo emibhiri ejeene ejeeresya ati ni swaro ku‑murume okubha na jifwiri jindeera! 15 Nawe ku‑mugasi okubha na jifwiri jindeera okukora ayaanwe echibharo, kwa okubha ayaaywe jifwiri jindeera korereki jibhe rwa emyenda ja okuswikira omutwe. 16 Nawe araabha omuunu keenda okubhambaara inguru ya emisango ejo, amenye ati eswe chitari na akatungiiywe akandi okukira ako, noorwo mu‑makanisa ga Nyamuwanga katari‑mo akatungiiywe akandi.

Abhakoriito bhatakurya ebhiryo bhya Raatabhugenyi rwa kutyo jeenderwe

17 Inguru ya jinu eneenda okubharagirira woori, nitakubhakuuya, kwa okubha omwanya gunu omwikofyanya mutakukora ogwa omuriiro, tari omukora gunu gutari na omuriiro. 18 Enuungwa ati, bhunu omwikofyanyaga mw‑ikanisa, omwawukana‑mo makijumakiju. Omwanya ogundi, anye wone eniikirisya ati nikwo kutyo jiri. 19 Okwawukana ni bhusibhusi kubhe‑wo agati yeemwe, korereki bhanu bhari bha echimari bhamenyekane. 20 Nawe woori, omwanya gunu omwikofyanya mutakurya ebhiryo bhya Raatabhugenyi rwa kutyo jeenderwe, 21 okubha bhuri muunu kw‑imwe kaarya ebhiryo bhyaye omwene okurindirira wundi wuri. Kurwa ejo, abhandi abhasigara nibharumwaga omweko, na abhandi bhakorerwega. 22 Woori, mutari na jinju munu omutura okuriira na okunywera? Kurwa ki omugaya rikanisa rya Nyamuwanga na okuswasya bhanu bhatari na echiinu? Nibhabhwire ki? Nibhakuuye? Wuri! Nitakubhakuuya wuri inguru ya emisango ejo.

Okurya ebhiryo bhya Raatabhugenyi rwa kutyo jeenderwe

23 Ameeyigisyo ganu ꞉naaramiiye okusooka ku‑Raatabhugenyi Yeesu, nigo ganu ꞉naabhayaaye ati, ingeta inu ꞉aateeywe mu‑mabhoko ga abhasoko, ꞉aagegere omukaate, 24 ˆnaasiima Nyamuwanga, ˆnaagubheganya, ˆnaayika ati, “Gunu nigwo omubhiri gwani gunu oguja okusoosibhwa inguru yeemwe. Mubhega nimukora kutyo, mu‑kunyichuka!” 25 Nyabhuriko, bhejire bhaamara okurya, ˆnaagega omutawo gunu gwariga guri‑mo echifuufu, ˆnaayika ati, “Echifuufu chinu mu‑mutawo munu echimereegururu indagano inyaaya inu Nyamuwanga arikora okutura isagama yaani. Bhuri mwanya gunu muranywerega mu‑mutawo ogwo, mubhega nimukora kutyo, mu‑kunyichuka!” 26 Kutyo, omwanya gunu omurya omukaate ogwo na okunywera omutawo ogwo, omubha nimuraasya okufwa kwa Raatabhugenyi okukingira omwanya gunu ariija.

27 Omuunu woonewoone unu kaarya omukaate ogwo amwi okunywera mu‑mutawo ogwo kutyo jitakwendwa, kaabha akorere echibhiibhi, okubha aagaya omubhiri na isagama ya Raatabhugenyi. 28 Kutyo, bhuri muunu eetatirisye omwene, niwo arye omukaate na okunywera omutawo ogwo. 29 Enaayika kutyo, kwa okubha omuunu unu kaarya omukaate na okunywera omutawo atasombookeeywe ati ari na obhumwi na omubhiri gwa Raatabhugenyi, omuunu oyo kaabha eeteeye omwene mu‑ndamu ya Nyamuwanga. 30 Eyo niyo isonga agati yeemwe bhari‑mo abhajorobhoke na abharwaye bhaafu, ka wone abhandi bhafuuwe. 31 Araabha chikeetatirisiisye eswe abheene, Nyamuwanga atakachiramuuye. 32 Nawe woori, omwanya gunu echiramurwa na Raatabhugenyi, awo niwo echibha nichitongerwa, korereki Nyamuwanga aasiga okuchiramura rwa kutyo ariramura abhaanu bhanu bhatakumumenya. 33 Kutyo, abhayiri bhaani mu‑riikirisya, omwanya gunu omwikofyanya okurya ebhiryo bhya Raatabhugenyi, murindanega. 34 Araabha omuunu ari na omweko, aryega iika ewaaye, korereki okwikumanya kwemwe aamwi, kwasiga okukora muramurwe. Amaragiriro agandi ganu gasigaaye, niribhayaana omwanya gunu niriija.