Ebhiyaanwa bhya Mwoyo Mweru
12
1 Woori, abhayiri bhaani mu‑riikirisya, enija okwayika inguru ya ebhiyaanwa bhinu ebhisooka ku‑Mwoyo Mweru, kwa okubha eneenda mubhisombookerwe kisi. 2 Mumenyere ati omwanya gunu mwariga muri bhanyamanga, ꞉mwajigirwe na okutangasibhwa okuramya amasusano, noorwo kutyo amasusano gatari na obhuwanga! 3 Kutyo, enibhabhwira ati omuunu woonewoone unu kaatangasibhwa na Mwoyo wa Nyamuwanga atakutura okwayika ati, “Yeesu eeyiimwe.” Ka wone omuunu woonewoone atakutura okwayika ati, “Yeesu ni Raatabhugenyi,” araabha atakutangasibhwa na Mwoyo Mweru.4 Bhiri‑wo ebhiyaanwa bhya mbaga nyafunyafu, nawe Mwoyo unu kaagabha ebhiyaanwa ebhyo ni uryaurya. 5 Ka wone bhuri‑wo obhukosi bhwa mbaga nyafunyafu, nawe Raatabhugenyi ni uryaurya. 6 Ka wone echikora emirimu ja mbaga nyafunyafu, nawe Nyamuwanga unu kaayaana bhoone obhuturo bhwa okukora emirimu joone ni uryaurya. 7 Mwoyo keeswerura ku‑bhuri muunu, korereki abhaanu bhoone bhabhone omuriiro. 8 Mwoyo kaayaana omuunu owumwi okwayika emisango ja obhwengeeso, owundi Mwoyo oyooyo kaamuyaana okwayika emisango ja obhumenyi. 9 Mwoyo oyooyo kaayaana owundi echiyaanwa cha okubha na eriikirisya enene, owundi echiyaanwa cha okuwosya, 10 owundi echiyaanwa cha okukora ebhiruguusyo, owundi echiyaanwa cha okusoosya obhuragi. Mwoyo oyooyo kaayaana owundi echiyaanwa cha okusombookerwa araabha omusango gusookere ku‑masambwa amwi ku‑Mwoyo Mweru, owundi echiyaanwa cha okwayika jinyaayika jingenyi, owundi echiyaanwa cha okugajura jinyaayika ejo. 11 Mwoyo oyooyo umwi kaakora emirimu ejo joone. Omwene kaayaana bhuri muunu echiyaanwa chaaye, rwa kutyo Mwoyo omwene keenda.
Omubhiri gumwi, ebhiwuga bhyafu
12 Omubhiri gwa omuunu guri na ebhiwuga bhyafu, nawe ebhiwuga ebhyo ni mubhiri gumwi. Nikwo kutyo jiri wone ku‑mubhiri gwa Kirisito. 13 Enaayika kutyo, kwa okubha eswe bhoone, chibhe Abhayawudi amwi abhaanu bhanu bhatari Bhayawudi, chibhe abhagaya amwi abheetaage, ꞉chaabhatiijiibhwe mu‑Mwoyo umwi na okuyaanwa Mwoyo umwi oyo, korereki chibhe omubhiri gumwi.
14 Mbe, omubhiri gutari na echiwuga chimwi era, tari guri na ebhiwuga bhyafu. 15 Araabha okuguru kukayikire ati, “Anye nitari kubhoko, kutyo anye nitari bhaara rya omubhiri,” kutakubha ebhaara rya omubhiri ku‑songa eyo chimari? 16 Okutwi wone kukayikire ati, “Anye nitari riiso, kutyo anye nitari bhaara rya omubhiri,” kutakubha ebhaara rya omubhiri ku‑songa eyo chimari? 17 Araabha omubhiri gwone gwakabheeye riiso, omuunu akaturire kutiki okuungwa? Amwi omubhiri gwone gwakabheeye okutwi, omuunu akaturire kutiki okuwunyirisya? 18 Nawe woori, Nyamuwanga ateeye ku‑mubhiri bhuri chiwuga rwa kutyo ꞉eendere omwene. 19 Omubhiri gutakabheeye omubhiri, araabha gwakabheeye na echiwuga chimwi era. 20 Nawe ebhiwuga ni bhyafu, tari mubhiri ni gumwi.
21 Eriiso ritakutura okubhwira okubhoko ati, “Nitari na obhukene na awe.” Noorwo omutwe gutakutura okubhwira amaguru ati, “Nitari na obhukene na emwe.” 22 Okukira‑wo ejo, ebhiwuga bhya omubhiri bhinu ebhibhonekana ati, ni bhirenga, nibhyo ebhikenwa muno. 23 Ka wone ebhiwuga bhinu ebhibhonekana ati, bhiteeyire okuyaanwa echibharo, nibhyo echiyaana echibharo muno. Ebhiwuga bhya omubhiri gweswe bhinu ebhibhonekana ati, ebhireeta jiswaro, nibhyo echikorera emirimu muno, 24 omwanya ogwo ebhiwuga bhinu bhitakuswasya, bhitakukenwa okwangarirwa rwa ebhindi. Nyamuwanga omwene ayimbanyiisye kisi omubhiri. Ebhiwuga bhinu bhitakuyaanwa echibharo muno, abhikorere bhiyaanwe echibharo, 25 korereki omubhiri gwasiga okwawukana, tari ebhiwuga bhyone bhisakirane. 26 Araabha echiwuga chimwi cha omubhiri chikawutaara, bhyone ebhiwutaara aamwi nacho. Ka wone echiwuga chimwi chikakuuywa, bhyone ebhikonderwa aamwi nacho.
27 Mbe, emwe bhoone muri mubhiri gwa Kirisito, na bhuri umwi weemwe ni chiwuga ku‑mubhiri ogwo. 28 Nyamuwanga ateeye mw‑ikanisa, bha okwamba jitumwa, bha kabhiri abharagi, bha kasatu abheeyigisya. Wone ateeye bhanu abhakora ebhiruguusyo, bhanu bhari na echiyaanwa cha okuwosya abharwaye, bhanu bhari na echiyaanwa cha okusakira abhandi, bhanu bhari na echiyaanwa cha okutangasya, na bhanu bhari na echiyaanwa cha okwayika jinyaayika jingenyi. 29 Woori angu, abhaanu bhoone ni jitumwa? Angu, abhaanu bhoone ni bharagi? Angu, abhaanu bhoone ni bheeyigisya? Angu, abhaanu bhoone abhakora ebhiruguusyo? 30 Ka wone, angu, abhaanu bhoone bhari na echiyaanwa cha okuwosya abharwaye? Angu, abhaanu bhoone abhaayika jinyaayika jingenyi? Angu, abhaanu bhoone bhari na echiyaanwa cha okugajura jinyaayika ejo? 31 Mbe, mwisigombere okubhona ebhiyaanwa ebhinene. Nawe okwamba eneenda okubhabhwira injira inu iri ya ekisi muno.