Eryenda
13
1 Noorwo nikaayika mu‑nyaayika ja abhaanu na mu‑nyaayika ja bhamaraayika, nawe araabha nitari na eryenda, enibha rwa omuunu unu kaamwaya era, inyaayika yaani eyo, ni ya kutyo era. 2 Ka wone noorwo nikasoosya obhuragi na okusombookerwa jimbisike joone na okumenya joone kisi, noorwo nikabha na eriikirisya enene rya okutura okufurusya ebhiima, nawe araabha nitari na eryenda, anye nitari chiinu. 3 Ka wone nikasoosya ribhona ryani ryone okuyaana abhataka, na noorwo nikeesoosya noochibhwe mu‑muriro,a nawe araabha nitari na eryenda, nitakubhona omuriiro gwonegwone.4 Eryenda erikora omuunu eegumiirisye, abhe owa ekisi, atakubha na orwiso, atakwikuuya, ka wone atakubha na echigundu. 5 Eryenda erikora omuunu ayaanega abhandi echibharo, ritakureterera okwiganirisya emisango jaaye era, noorwo okubhiyirwa bhwangu, noorwo okubha na ingwatira mu‑mwoyo. 6 Eryenda erikora omuunu asige okukondererwa ebhibhiibhi, tari akondererwe echimari. 7 Eryenda erikora eegumiirisye mu‑joone, abhe na eriikirisya omwanya gwone, abhe na obhwiyikanyo omwanya gwone, ka wone eekomeesyega mu‑joone.
8 Eryenda ritari na obhuteero. Nawe okusoosya obhuragi, okwayika jinyaayika jingenyi na obhumenyi, ebhiyaanwa ebhyo bhyone bhiri na obhuteero. 9 Enaayika kutyo kwa okubha chimenyere emisango emitooto era, ka wone okusoosya obhuragi kweswe, kutakuumiiye. 10 Nawe omwanya gunu obhukuumiiye bhuriija, jinu jichaari okukuumira jiritemekera. 11 Omwanya gunu naariga nichaari mwana, naariga ninaayika rwa omwana, neeganirisyaga rwa omwana, na okwitogera ja echaana. Nawe woori, bhya echaana nibhisigire, kwa okubha naakurire. 12 Ebhiinu bhinu echirora woori, echibhirora mw‑irore wuti bhiri mu‑rukoowa,b nawe omwanya gunu oguuja chiribhirora bhyone abhwerubhweru. Woori enimenya kutooto era, nawe omwanya gunu oguuja nirimenya kisi rwa kutyo anye nimenyerwe na Nyamuwanga. 13 Mbe woori, ebhiinu bhisatu bhinu bhitariwaa‑wo, ni riikirisya, obhwiyikanyo na eryenda. Kw‑ijo, gunu guri gwa bhusibhusi ni ryenda.