Echiyaanwa cha okusoosya obhuragi na echa okwayika jinyaayika jingenyi
14
1 Mwikomeesyega okubha na eryenda na mwisigomberega okubhona ebhiyaanwa bhya Mwoyo Mweru, chimwichimwi echiyaanwa cha okusoosya obhuragi. 2 Omuunu unu kaayika inyaayika ingenyi, atakwayika na abhaanu, tari kaayika na Nyamuwanga, kwa okubha jinu kaayika atari‑wo unu kaajisombookerwa. Omwene oyo kaabha ˆnaayika emisango ja imbisike ku‑managa ga Mwoyo Mweru.a 3 Nawe unu kaasoosya obhuragi, kaayika na abhaanu emisango ja okubhakomeesya mu‑riikirisya, ja okubhasimbiisya na ja okubhafungʼamya. 4 Unu kaayika inyaayika ingenyi, keekomeesya omwene mu‑riikirisya, nawe unu kaasoosya obhuragi kaakomeesya abheekirisya abheejaabho.5 Anye eneenda emwe bhoone mubhega nimwayika jinyaayika jingenyi, nawe eneenda muno mubhega nimusoosya obhuragi. Enaayika kutyo, kwa okubha okusoosya obhuragi okusakira abheekirisya abhandi muno okukira okwayika jinyaayika jingenyi, araabha akabha atari‑wo unu kaagajura jinyaayika ejo. Kurwa ejo, unu kaayika jinyaayika jingenyi agajure korereki asakire abheekirisya abheejaabho bheekomeesye mu‑riikirisya. 6 Woori, abhayiri bhaani mu‑riikirisya, nikaaja kw‑imwe na okwayika jinyaayika jingenyi, omubhona omuriiro ki? Mutakubhona omuriiro gwonegwone. Nawe nikabhabhwira jinu Nyamuwanga answeruriiye, amwi nikabhayaana obhusombookerwa, nikasoosya obhuragi amwi nikeeyigisya, awo niwo omubhona omuriiro. 7 Nikwo kutyo jiri noorwo ku‑bhiinu bhinu bhitari bhiwanga, omwanya gunu ebhisoosya obhuraka, rubhe orukuri, amwi indono. Araabha bhikasoosya obhuraka bhuyagayaga, omuunu kaatura kutiki okumenya orwimbo orwo? 8 Ka wone, araabha rinyawegoona rikasoosya obhuraka bhunu bhutakumenyekana ku‑bhaanu, niga unu ariiraabha inguru ya riremo? 9 Nikwo kutyo jiri na kw‑imwe. Araabha omwayika emisango jinu jitakumenyekana, niga unu kaatura okusombookerwa jinu omwayika? Awo jinu omwayika ejigegwa na omuyaga.
10 Ku‑chaaro kunu jiri‑ko jinyaayika ja mbaga nyafu, nawe itari‑wo noorwo inyaayika imwi inu itari na obhugajuro bhwayo. 11 Woori, araabha nitakusombookerwa inyaayika inu owundi kaayika, enibha rwa omugenyi ku‑muunu oyo, omwene wone kaabha rwa omugenyi kw‑anye. 12 Nikwo kutyo jiri na kw‑imwe. Woori, kwa okubha omwenda muno okubha na ebhiyaanwa bhya Mwoyo Mweru, muyenje muno okubha na ebhiyaanwa bhinu ebhisakira abheekirisya abheejaanyu okukomeera mu‑riikirisya. 13 Kurwa ejo, omuunu unu kaayika inyaayika ingenyi, asabhwe Nyamuwanga korereki amuyaane obhuturo bhwa okugajura inyaayika eyo. 14 Enaayika kutyo, kwa okubha nikasabhwa mu‑nyaayika ingenyi, omwoyo gwani nigwo ogubha nigusabhwa, nawe obhwenge bhwani bhutakubhona‑mo omuriiro gwonegwone. 15 Woori neenderwe nikore ki? Enija okusabhwa mu‑mwoyo mu‑nyaayika ingenyi, ka wone enija okusabhwa mu‑bhwengeeso, enija okwimba mu‑mwoyo mu‑nyaayika ingenyi, ka wone enija okwimba mu‑bhwengeeso. 16 Ukakuuya Nyamuwanga mu‑mwoyo era, omuunu owundi unu atari na obhuturo obhwo bhwa okusombookerwa inyaayika ingenyi, kaja okutura kutiki okwitabhirwa risiima ryawo ku‑Nyamuwanga mu‑kwayika ati, “Jibhe kutyo”? Atakusombookerwa wuri jinu owaayika! 17 Ni chimari ati risiima ryawo eryo ku‑Nyamuwanga eritura okubha rya ekisi, nawe owundi okusiima kwawo kutakumusakira okukomeera mu‑riikirisya.
18 Enisiima Nyamuwanga kwa okubha enaayika mu‑nyaayika ingenyi okukira emwe bhoone, 19 nawe mw‑ikanisa eneenda muno okwayika mu‑bhwengeeso emisango etaanu jinu ejimenyekana korereki niiyigisye abhandi. Ogwo nigwo gwa ekisi muno okukira okwayika emisango ebhiwumbi ekumi mu‑nyaayika ingenyi.
20 Abhayiri bhaani mu‑riikirisya, mwasiga okwiganirisya rwa abhaana abharera, tari mwiganirisyega rwa abhaanu abhakuru. Nawe inguru ya obhubhiibhi, mubhe rwa abhaana abharera. 21 Mu‑Bhikaame Ebhyeru jikaamirwe ati,
“Raatabhugenyi kaayika ati,
‘Niryayika na abhaanu bhanu okutura ku‑bhagenyi bha kura,
bhanu abhaayika jinyaayika jingenyi,
noorwo kutyo bhatarintegeresya.’”b
22 Okwayika jinyaayika jingenyi ni chibharikisyo cha amanaga ga Nyamuwanga inguru ya abhaanu bhanu bhatari bheekirisya, chitari chibharikisyo inguru ya abheekirisya. Nawe obhuragi obhusoosibhwa inguru ya abheekirisya, itari inguru ya abhaanu bhanu bhatari bheekirisya. 23 Woori, araabha abheekirisya bhakeekofyanya aamwi okusabhwa, bhoone nibhaamba okwayika jinyaayika jingenyi, nibheeya nibheengira abhaanu bhanu bhatari na obhuturo bhwa okusombookerwa jinyaayika jingenyi ejo, noorwo bhanu bhatari bheekirisya, bhataryayika ati muri bhasasi? 24 Nawe bhoone bhaakabha nibhasoosya obhuragi, ˆneengira omuunu unu atari na obhuturo bhwa okusombookerwa jinyaayika jingenyi, amwi unu atari mwikirisya, jinu koongwa okusooka ku‑bhoone ejimukora asombookerwe obhujabhi bhwaye. Ka wone jinu koongwa ejimuramura. 25 Jinu jiiserekere mu‑mwoyo gwaye, ejibha abhweru, niwo keefukama na okwinamya obhusu okukinga aasi okuramya Nyamuwanga, ˆnaayika ati, “Chimari Nyamuwanga ari agati yeemwe!”
Obhwisombooro bhwa abheekirisya okusabhwa
26 Woori, abhayiri bhaani mu‑riikirisya, chaayike ki? Omwanya gunu omwikofyanya okusabhwa, umwi keemba orwimbo, owundi keeyigisya, owundi kaayika jinu Nyamuwanga aamuswerurira, owundi kaayika jinyaayika jingenyi, na owundi kaajigajura. Emisango ejo joone jikorekane okukomeesya abheekirisya. 27 Araabha bhari‑wo bhanu abhaayika inyaayika ingenyi, bhaayike bhabhiri amwi bhasatu era, bhaasiga okukira awo, bhabharanywega okwayika umwiumwi, ka wone abhe‑wo omuunu wa okugajura jinu abhaayika. 28 Araabha atari‑wo omuunu wa okugajura jinu ejaayikwa, omuunu unu kaayika inyaayika ingenyi mw‑ikanisa ajibhire, tari mu‑mwoyo gwaye, aayike na Nyamuwanga.
29 Abhaanu bhanu abhasoosya obhuragi, bhaayikega bhabhiri amwi bhasatu, na abhandi bhatatirisye kisi emisango jeebhwe. 30 Nawe araabha owundi mu‑bhanu abhategeresya akaswerurirwa omusango okusooka ku‑Nyamuwanga, unu kaasoosya obhuragi ajibhire. 31 Ku‑njira eyo, bhuri umwi kaabhona omwanya gwa okwayika, korereki abhaanu bhoone bheeyigisibhwe na okusimbiisibhwa. 32 Echiyaanwa cha okusoosya obhuragi, echitangasibhwa na abharagi, 33 kwa okubha Nyamuwanga weeswe atari wa injogere, tari ni wa omurembe.
Rwa kutyo jiri mu‑makanisa goone ga abheeru bha Nyamuwanga, 34 omwanya gunu omwikofyanya, abhagasi bhajibhirega, kwa okubha mw‑ikanisa bhatakwikirisibhwa okwayika. Bhagayukega rwa kutyo ebhiraagiro bhya Muusa ebhyayika. 35 Araabha abheenda okusombookerwa omusango omurebhe, bhabhuusyega abharume bheebhwe iika, kwa okubha ni swaro omugasi okwayika mw‑ikanisa.
36 Angu, omusango gwa Nyamuwanga gusookere kw‑imwe? Amwi gwijire kw‑imwe abheene era? 37 Araabha omuunu keerora ati ari na echiyaanwa cha okusoosya obhuragi, amwi ati ari na echiyaanwa echindi cha Mwoyo Mweru, asombookerwe ati, jinu enibhakaamira, ni maragiriro okusooka ku‑Raatabhugenyi. 38 Nawe omuunu unu kaagaya, wone arigaywa.c