Okusuuruka kwa Kirisito
15
1 Woori, abhayiri bhaani mu‑riikirisya, enibheechukya Emisango ja Ekisi jinu ꞉naaraasiisye kw‑imwe, na emwe nimujiramira. Ejo nijo ejibhareterera okwimereeguru murumateene. 2 Araabha omugenderera okuruubha emisango jinu ꞉naabharaasisiisye, awo niwo omubhona obhuchungusi. Nawe araabha mutakujiruubha, eriikirisya ryemwe eribha ritari na omuriiro.3 Ameeyigisyo ga bhusibhusi ganu anye ꞉naaramiiye, nigo ꞉naabheeyigisiisye ati, Kirisito ꞉aafuuwe inguru ya ebhibhiibhi bhyeswe, rwa kutyo jikaamirwe mu‑Bhikaame Ebhyeru.a 4 Ka wone ˆnaasiikwa, ˆnaasuuruka ku‑rusuku rwa kasatu, rwa kutyo jikaamirwe mu‑Bhikaame Ebhyeru.b 5 ˆNaasoromokera Keefa, niwo ˆnaasoromokera wone jitumwa jaaye ekumi na bhabhiri. 6 Ejire eeya, ˆnaasoromokera abheekirisya bhanu ꞉bhaambukire magana gataanu (500) ku‑bhumwi bhwebhwe. Abhaafu mu‑bheene noorwo woori bhachaari bhaanga, tari abhandi bhamaamire nyombe.c 7 Niwo ˆnaasoromokera Yakobho, ka wone ˆnaasoromokera jitumwa joone. 8 Ejire aamara ˆnaasoromokera abhaanu bhoone, ˆnaansoromokera anye wone, unu niri rwa omuunu unu eebhuuywe ari ndebhire. 9 Anye niri mutooto okukira jitumwa joone, niteeyire noorwo okubhirikirwa itumwa, kwa okubha ꞉naanyaasiisye abheekirisya bha Nyamuwanga. 10 Nawe obhwitiriranya bhwa Nyamuwanga nibhwo bhukorere anye okubha itumwa. Obhwitiriranya bhwaye kw‑anye bhwariga bhutari bhwa kutyo era, kwa okubha okutura ku‑bhwitiriranya obhwo, nikorere emirimu okukira jitumwa joone. ꞉Nitaakorere ejo ku‑bhuturo bhwani omwene, tari Nyamuwanga ku‑bhwitiriranya bhwaye niwe ꞉aakorere emirimu aamwi na anye. 11 Kutyo mbe, nibhe niri anye, amwi bhabhe bhari jitumwa abhandi bharya, echiraasya emisango jiryajirya, ka wone nijo jinu mwikirisiisye.
Okusuuruka okusooka mu‑bhafuuwe
12 Woori, araabha echiraasya ati Kirisito ꞉aasuurukire okusooka mu‑bhafuuwe, jaabha kutiki abhandi agati yeemwe abhaayika ati abhafuuwe bhatarisuuruka? 13 Araabha abhafuuwe bhatarisuuruka, mbe, Kirisito wone atasuurukire. 14 Araabha Kirisito atasuurukire, okuraasya kweswe ni kwa kutyo era, noorwo eriikirisya ryemwe ni rya kutyo era. 15 Ka wone chikabhonekeene wuti abhabhambaasi bha orubheeyi inguru ya emisango ja Nyamuwanga, kwa okubha echisoosya obhubhambaasi ati Nyamuwanga ꞉aasuuruuye Kirisito okusooka mu‑bhafuuwe. Nawe araabha abhafuuwe bhatakusuururwa, mbe Nyamuwanga ꞉ataasuuruuye Kirisito. 16 Enaayika kutyo, kwa okubha araabha abhafuuwe bhatakusuururwa, Kirisito wone ꞉ataasuuruuywe. 17 Araabha Kirisito ꞉ataasuuruuywe, eriikirisya ryemwe eribha ritari na omuriiro, na omubha muchaari okuchungurwa okusooka mu‑bhibhiibhi bhyemwe. 18 Okukira ejo, bhoone bhanu ꞉bhaafuuwe bheekirisiisye Kirisito, bhasimagiiye chimwi. 19 Araabha obhwiyikanyo bhweswe ku‑Kirisito ni bhwa okubhona obhuwanga bhwa ku‑chaaro kunu era, awo niwo echibha abhaanu bha okufwirwa echigongo okukira abhaanu bhoone.
20 Nawe woori, chimari enibhabhwira ati, Kirisito ˆnaasuuruka okusooka mu‑bhafuuwe, na omwene niwe wa okwamba okusuuruka ku‑bhanu bhafuuwe. 21 Rwa kutyo orufu ꞉rwareeterwe na omuunu umwi mu‑chaaro, nyabhuriko obhusuuruko bhwa abhafuuwe ꞉bhwareeterwe na omuunu umwi. 22 Rwa kutyo abhaanu bhoone abhafwa ku‑songa ya okugwatana kwebhwe na Adaamu, nyabhuriko abhaanu bhoone bharisuururwa ku‑songa ya okugwatana kwebhwe na Kirisito. 23 Nawe bhuri muunu arisuururwa ku‑mwanya gwaye, Kirisito aariga ari wa okwamba okusuururwa, omwanya gunu omwene ariija, niwo abhaanu bhaaye bharisuururwa. 24 Awo niwo bhuriija obhuteero bhwa bhyone, omwanya gunu Kirisito ariyaana Raata Nyamuwanga obhukama, aribha aamara okusingaarisya abhatungi bhoone, abha obhuturo bhoone na abha amanaga bhoone. 25 Enaayika kutyo, kwa okubha Kirisito ni bhusibhusi atunge okukingira ayige abhasoko bhaaye bhoone na okubhatuura emwaro ya obhutungi bhwaye.d 26 Omusoko wa obhuteero okusingaarisibhwa ni rufu. 27 Jikaamirwe mu‑Bhikaame Ebhyeru ati, “Nyamuwanga ateeye ebhiinu bhyone emwaro ya obhutungi bhwaye.”e Emisango ejo “ebhiinu bhyone,” jitari na obhugajuro ati Nyamuwanga wone ateeywe emwaro ya obhutungi obhwo. Wuri, kwa okubha omwene niwe ateeye ebhiinu ebhyo emwaro ya obhutungi bhwa Kirisito. 28 Omwanya gunu ebhiinu bhyone bhiribha bhiteeywe emwaro ya obhutungi bhwa Omwana waaye,f niwo wone Omwana ariituura emwaro ya obhutungi bhwa Nyamuwanga, unu ateeye ebhiinu bhyone emwaro ya obhutungi bhwa Omwana waaye, korereki Nyamuwanga abhe omutungi wa bhyone.
29 Woori, abhaanu bhanu abhabhatiijibhwa inguru ya abhafuuwe, abheeyikanya okubhona echiinu ki? Araabha abhafuuwe bhatakusuururwa noorwo na akatyari, kurwa ki abhaanu abhabhatiijibhwa inguru ya abhafuuwe? 30 Kurwa ki eswe echiituura mu‑ngʼanga bhuri rusuku? 31 Abhayiri bhaani mu‑riikirisya, bhuri rusuku anye niri mu‑ngʼanga ya okufwa. Omusango gunu ni gwa chimari, rwa kutyo ni chimari ati eniikuuya inguru yeemwe kwa okubha muri na obhumwi na Kirisito Yeesu Raatabhugenyi weeswe. 32 Araabha obhwiyikanyo bhwani bhukabheeye bhwa ku‑chaaro kunu era, okurwana kwani na jityanyi jinduru mu‑musi gwa Yefeeso nikabhwene‑mo ki? Araabha abhafuuwe bhatakusuururwa, mbe,
“Chirye na chinywe,
kwa okubha mutondo echifwa.”g
33 Mwasiga okujigwa na abhaanu bhanu abhaayika kutyo, okubha, “Abhasaani abha jitungwa jimbiibhi, abhanyamura jitungwa ja ekisi.” 34 Mupaapuke mubhe na obhwenge rwa kutyo mukenerwe, musige okukora ebhibhiibhi. Abhandi agati yeemwe bhatakumenya Nyamuwanga. Enaayika ejo, korereki nibhaswasye.
Kutyo omubhiri guribha orusuku rwa obhusuuruko
35 Omuunu kaatura okubhuusya ati, “Abhafuuwe abhasuururwa kutiki? Bharibhaga na omubhiri gwa mbaga ki?” 36 Ago nigo amabhuusyo ga echimuumu! Ukayamba imbibho, itakutura okumera itafuuwe wuri. 37 Imbibho inu owuyamba, ibhe ya ingano amwi imbibho eyindi, jitakususana na echiimesya chaayo. 38 Nyamuwanga niwe kaayaana imbibho omubhiri rwa kutyo keenda, bhuri mbibho na omubhiri gwayo.
39 Ebhibhumbwa bhyone bhiri na emibhiri, nawe emibhiri ejo jitaasyanyiisye. Emibhiri ja abhaanu ni ja mbaga imwi, ja jityanyi ni ja mbaga eyindi, ja jinyonyi ni ja mbaga eyindi, ja jiiswi wone ni ja mbaga eyindi. 40 Ka wone jiri‑wo emibhiri ja mu‑rwire na emibhiri ja ku‑chaaro. Rikusyo rya emibhiri ja mu‑rwire ni rindi, na rikusyo rya emibhiri ja ku‑chaaro anu wone ni rindi. 41 Rikusyo rya risuubha riri kundi, rikusyo rya okwesi riri kundi na rikusyo rya jinjota riri kundi. Jinjota wone bhuri imwi iri na rikusyo ryayo.
42 Nikwo kutyo jiribha, omwanya gwa okusuururwa kwa abhafuuwe. Jiri rwa imbibho, omubhiri gunu ogusiikwa ogunyamuka, nawe gunu ogusuururwa gutakunyamuka. 43 Ogusiikwa omubhiri gunu gugayirwe, nawe gunu ogusuuruka guri na rikusyo. Ogusiikwa omubhiri omujorobhoke, nawe ogusuuruka gunu guri na amanaga. 44 Ogusiikwa omubhiri gwa obhusimukwa, nawe ogusuuruka omubhiri muyaaya gunu chiriyaanwa na Mwoyo Mweru. Okubha guri‑wo omubhiri gwa obhusimukwa, ka wone guri‑wo omubhiri omuyaaya gunu chiriyaanwa na Mwoyo Mweru.
45 Mu‑Bhikaame Ebhyeru jikaamirwe ati, “Omuunu wa okwamba, Adaamu, ꞉aabhumbirwe ˆnaabha omuunu omuwanga,”h nawe Adaamu wa obhuteero, Kirisito, niwe Mwoyo unu kaayaana abhaanu obhuwanga. 46 Nawe omubhiri gunu ogutangata ni gunu gutari gwa obhuwanga, ni gurya gwa obhusimukwa, gukamara niguuja omubhiri omuyaaya gunu chiriyaanwa na Mwoyo Mweru. 47 Omuunu wa okwamba, ꞉aamogerwe. Omuunu wa kabhiri, ꞉aasookereeye mu‑rwire. 48 Kutyo, abhaanu bhoone ku‑chaaro bhari na omubhiri gwa ku‑chaaro rwa omubhiri gwa Adaamu. Ka abhaanu bhoone mu‑rwire bharibha na omubhiri gwa mu‑rwire rwa omubhiri gwa Kirisito. 49 Rwa kutyo echisusana na Adaamu, unu ꞉aamogerwe, nyabhuriko chirisusana na Kirisito, unu ꞉aasookereeye mu‑rwire.
50 Abhayiri bhaani mu‑riikirisya, chinu eneenda okwayika ni ati, emibhiri jeeswe jinu ja jinyama na isagama bhitakutura okwanjura obhukama bhwa Nyamuwanga, amwi emibhiri jinu ejinyamuka okwanjura obhurame bhunu bhutakunyamuka.
51 Mutegeresye, enibhabhwira imbisike ati, eswe chitarimaama nyombe bhoone, nawe bhoone chiriyindurwa. 52 Ogwo gurikorekana bhwangu muno, rwa okutematema ameeso, omwanya gunu rinyawegoona rya obhuteero riririra. Omwanya ogwo abhafuuwe bharisuururwa na bharibha na emibhiri jinu jitakunyamuka rindi, na eswe bhanu chichaari bhaanga, chiriyindurwa wone. 53 Jiribha kutyo, kwa okubha omubhiri gunu ogunyamuka gwenderwe guyindurwe gubhe omubhiri gunu gutakunyamuka, omubhiri gunu ogufwa guyindurwe gubhe omubhiri gunu gutakufwa. 54 Mbe, omubhiri gunu ogunyamuka, aribha gwafwara omubhiri gunu gutakunyamuka, na omubhiri gunu ogufwa aribha gwafwara omubhiri gunu gutakufwa, awo niwo guribhaga gukumiiye omusango gunu ꞉gwakaamirwe mu‑Bhikaame Ebhyeru gunu ogwayika ati,
“Orufu rwasingaarisibhwa, obhuyigi bhwakuumira!”i
55 “Awe rufu, obhuyigi bhwawo bhuri aaki?
Bhuri aaki obhuturo bhwawo bhwa okureeta obhusungu?”j
56 Obhuturo bhwa orufu obhusookana na ebhibhiibhi, na obhuturo bhwa ebhibhiibhi obhusookana na ebhiraagiro. 57 Nawe chisiime Nyamuwanga. Omwene kaachiyaana obhuyigi okutura ku‑Raatabhugenyi weeswe Yeesu Kirisito.
58 Kutyo, abhayiri bhaani abheendwa mu‑riikirisya, murumatane mu‑riikirisya eryo, okufwa omwoyo wuri. Mugenderere okukora emirimu ja Raatabhugenyi nimukomeeraga bhuri rusuku, kwa okubha mumenyere ati emirimu jinu omukora inguru ya Raatabhugenyi, jitari ja okufwirwa‑mo wuri.