Obhusoroosya bhwa okusakira abheekirisya
16
1 Woori enija okwayika inguru ya obhusoroosya bhwa okusakira abheekirisya bha mu‑musi gwa Yerusareemu. Emwe wone mukore rwa kutyo ꞉naabhwiriiye abhaanu bha mu‑makanisa ga mu‑mukoowa gwa Garaatiya. 2 Ku‑bhuri rusuku rwa obhwoyo, bhuri muunu agati yeemwe abhiikega echibhiikwa okuruubhana na ribhona ryaye, korereki obhusoroosya bhwasiga okukorekana, omwanya gunu niribhaaja‑ko eyo. 3 Omwanya gunu nirikinga eyo, nirituma na jinyarubha ja okumenyesya abhaanu bhanu muryawura korereki bhasire obhusoroosya obhwo mw‑ikanisa rya Yerusareemu. 4 Araabha iribhonekana ati anye wone neenderwe nigende, mbe, nirigenda aamwi nabho.Obhutinge bhwa Pawuro okukinga Koriito
5 Niribhaaja‑ko eyo, omwanya gunu nirisooka mu‑mukoowa gwa Makedooniya, kwa okubha eneenda niture Makedooniya okwamba. 6 Omwanya gunu niriija, amwi niriikara na emwe kwa omwanya omurebhe, amwi noorwo kwa omwanya gwone gwa imbewo, korereki murinsakira nirigenderera na orugendo rwani, woonewoone anu nirigenda omwanya gunu nirisooka awo. 7 Nitakwenda okubhugana na emwe woori kwa okuyitingʼana era. Eniiyikanya okwikara eweemwe omwanya omurebhe, araabha Raatabhugenyi akanyiikirisisya. 8 Nawe woori enisigara mu‑musi gwa Yefeeso anu, okukingira orusuku rwa Pendekoositea rukinge. 9 Enikora kutyo, kwa okubha Nyamuwanga aanyigurira orwigi, korereki nikore emirimu myafu mu‑musi gunu, noorwo kutyo bhari‑wo abhaanu bhaafu bhanu abhanyingirira.
10 Timoteewo akabhaaja‑ko eyo, mumuramire bhwa kisi, korereki eekare kuyaya wuri, kwa okubha omwene kaakora emirimu ja Raatabhugenyi rwa anye. 11 Omuunu woonewoone aasiga okumugaya. Tari mumusakire asooke eyo kwa omurembe, korereki asubhe kw‑anye, okubha anye enimurindirira aamwi na abheekirisya abheejaasu.
12 Woori, inguru ya omwikirisya oweejaasu Apooro, naamwirembeeresya muno ati aaje kw‑imwe aamwi na abheekirisya abhandi. Nawe omwene atakwenda okuuja woori. Nawe aribha aabhona omwanya ariija.
Emisango ja okuraga
13 Mutengeeje, murumatane mu‑riikirisya, ka wone mubhe abhayaari na abha amanaga. 14 Emisango jeemwe joone mujikorega mu‑ryenda.
15 Abhayiri bhaani mu‑riikirisya, mumenyere ati Sitefwana aamwi na abhaanu bha iika ewaaye, nibho bhaariga bhari bha okwamba okwikirisya Yeesu Kirisito mu‑mukoowa gwa Akaaya, bheesoosya wone okusakira abheekirisya. Kutyo, enibheerembeeresya, 16 mugayukega abhaanu rwa abho, na abhandi bhoone bhanu abhakora emirimu ejo aamwi nabho mu‑bhwikomeesya.
17 ꞉Naakondeeywe muno Sitefwana, Foritunaato na Akayiko, bhunu ꞉bhaakingire anu. Abheene bhaangosorera, bhaakuumisya jinu naari nigerukiiywe kwa okurema okubha‑wo emwe. 18 Bhaakondisya omwoyo gwani, ka wone bhaakondisya emyoyo jeemwe. Kurwa ejo, mubhamenye kisi abhaanu rwa abho.
19 Abhaanu bha mu‑makanisa ga mu‑mukoowa gwa Asiya, abhabhakeesya. Akiira na omugasi waaye Pirisika,b aamwi na abheekirisya bhanu abheekumanya mu‑nju yeebhwe, abhabhakeesya muno mu‑kubha na obhumwi na Raatabhugenyi Yeesu. 20 Abheekirisya bhoone bhanu bhari anu, abhabhakeesya. Mukeesyanye mu‑ryenda rya Kirisito.
21 Anye Pawuro enikaama obhukeesya bhunu kwa okubhoko kwani omwene. 22 Omuunu woonewoone unu atakwenda Raatabhugenyi Yeesu, eeyiimwe. Raatabhugenyi weeswe iija!