Inyarubha ya Pawuro
ku‑Bharuumi
Obhutangati
Inyarubha inu, ꞉yaakaamirwe na Pawuro, itumwa ya Kirisito Yeesu. Pawuro ꞉aakaamire inyarubha inu, omwanya gunu aariga achaari kuribhatira omusi gwa Ruumi. Mu‑bheekirisya bha Ruumi, bhaariga bhari‑mo Abhayawudi aamwi na bhanu bhaariga bhatari Bhayawudi. Pawuro ꞉aakaamire inyarubha inu, korereki eeyigisye abheekirisya bha Ruumi kutyo ejeendwa omwikirisya wa Kirisito arame kwa eriikirisya, na okumenya emisango emikomeeye jinu ejitura okumubhona okuruubhana na eriikirisya eryo.
Mu‑nyarubha inu, Pawuro keeyigisya emisango ja obhuchungusi bhunu echitura okubhubhona okutura ku‑Yeesu Kirisito era. Obhwiganirisya obhunene bhwa omukaami wa inyarubha inu bhuri mu‑misango jinu ejaayika ati, “Anye nitakwiswara okuraasya Emisango ja Ekisi ejo, kwa okubha nijo obhuturo bhwa Nyamuwanga bhwa okuchungura abhaanu bhoone bhanu abheekirisya Yeesu, okwambira Abhayawudi okukingira abhaanu bhanu bhatari Bhayawudi. Emisango ja Ekisi ejo, ejeeresya abhwerubhweru kutyo Nyamuwanga kaabhara abhaanu okubha abharengeresi imbere yaaye. Abhaanu abhabharwa okubha abharengeresi imbere ya Nyamuwanga ku‑njira ya eriikirisya era” (1:16-17). Aamwi na ejo, Pawuro keeresya abhwerubhweru ati obhuchungusi bhunu echitura okubhuramira okutura ku‑Yeesu Kirisito, obhuchireetera okurama obhurame bhwa okukondisya Nyamuwanga (omuryango gwa 12‑15).