Inyarubha ya Pawuro
ku‑Bharuumi
Obhukeesya
1
1 Inyarubha inu, niikaamire anye Pawuro, omukosi wa Kirisito Yeesu. Anye ꞉naabhirikiiywe nibhe itumwa yaaye, na okusorwa na Nyamuwanga nibhega nindaasya Emisango jaaye ja Ekisi.a 2 Emisango ja Ekisi ejo, nijo jinu Nyamuwanga ꞉aaragire okwambira kara, okutura ku‑bharagi bhaaye bhanu ꞉bhaakaamire Ebhikaame Ebhyeru. 3 Emisango ja Ekisi ejo, nijo emisango inguru ya Omwana waaye.b Echinyamuunu, ꞉eebhuuywe mu‑ruganda rwa omukama Dawudi, 4 nawe kwa Mwoyo Mweru, Nyamuwanga ꞉aasorere Omwana waaye okubha owa obhuturo bhwone kwa okumusuurura okusooka mu‑bhafuuwe. Yeesu Kirisito oyo, niwe Raatabhugenyi weeswe. 5 Okutura ku‑mwene Nyamuwanga ꞉aanaaye obhwitiriranya bhwa okubha itumwa ya Raatabhugenyi Yeesu, korereki abhaanu bhoone bhanu bhatari Bhayawudi, bhature okwikirisya na okugayuka emisango ja Raatabhugenyi Yeesu, na risiina ryaye riyaanwe rikusyo. 6 Emwe wone muri mu‑abho na mubhirikiiywe okubha abhaanu bha Yeesu Kirisito.7 Enibhakaamira emwe abheekirisya bhoone bhanu muri Ruumi eyo. Nyamuwanga kaabheenda muno, na abhabhirikiiye, korereki mubhe abhaanu bhaaye abheeru.c
Obhwitiriranya na omurembe okusooka ku‑Nyamuwanga Raata weeswe, na ku‑Raatabhugenyi Yeesu Kirisito, bhibhe aamwi na emwe.
Pawuro keesigomba okugosorera abheekirisya bha Ruumi
8 Nyabharinyabhari, enisiima Nyamuwanga okutura ku‑Yeesu Kirisito, inguru yeemwe bhoone, kwa okubha emisango inguru ya eriikirisya ryemwe ejimenyekana mu‑chaaro choone. 9 Nyamuwanga unu enikorera emirimu kwa mwoyo gwani gwone mu‑kuraasisya abhaanu Emisango ja Ekisi ja Omwana waaye, kaamenya kutyo enibhasabhirwa omwanya gwone. 10 Enimusabhwa bhuri mwanya ati, aakeenda, woori anaane omwanya gwa okubhaaja‑ko. 11 Enisabhwa kutyo, kwa okubha niri na obhwira muno bhwa okubhugana na emwe, korereki nirumatanye eriikirisya ryemwe kwa okubhayaana amabhando ga echinyamwoyo. 12 Chinu eneenda ni ati, eriikirisya ryemwe rindumatanye, na eriikirisya ryani ribharumatanye.
13 Abhayiri bhaani, eneenda musombookerwe ati, kwiya kaafu naariga niikararira okubhakinga‑ko, nawe okukinga woori niyingiriiywe. Eneenda nibhaaje‑ko, korereki nikongye abhaanu mw‑imwe bharuubhe Raatabhugenyi Yeesu, rwa kutyo ꞉naakongiisye abhaanu abhandi bhanu bhatari Bhayawudi. 14 Nyamuwanga andagirira nibhe nindaasya Emisango ja Ekisi ku‑bhaanu bhoone, ku‑Bhayunaani na ku‑bhanu bhatari Bhayunaani,d ku‑bha obhwengeeso na ku‑bhanu bhatari bha obhwengeeso. 15 Kurwa ejo, eniisigomba muno niije okuraasya Emisango ja Ekisi noorwo kw‑imwe Ruumi eyo.
Obhuturo bhwa Emisango ja Ekisi ja Nyamuwanga
16 Anye nitakwiswara okuraasya Emisango ja Ekisi ejo, kwa okubha nijo obhuturo bhwa Nyamuwanga bhwa okuchungura abhaanu bhoone bhanu abheekirisya Yeesu, okwambira Abhayawudi okukingira abhaanu bhanu bhatari Bhayawudi. 17 Emisango ja Ekisi ejo, ejeeresya abhwerubhweru kutyo Nyamuwanga kaabhara abhaanu okubha abharengeresi imbere yaaye. Abhaanu abhabharwa okubha abharengeresi imbere ya Nyamuwanga ku‑njira ya eriikirisya era. Rwa kutyo Ebhikaame Ebhyeru ebhyayika ati, “Omuunu unu aribha na obhuwanga, ni unu Nyamuwanga kaabhara ati ni murengeresi ku‑njira ya eriikirisya ryaye.”e
Nyamuwanga kaayaana ebhitiibha abhaanu ku‑songa ya ebhibhiibhi bhyebhwe
18 Nyamuwanga omwene keeresya abhwerubhweru okusooka mu‑rwire ati, kaayaana ebhitiibha abhaanu bhanu abhamurema na abhakora obhujabhi. Abhaanu abho abhayingirira echimari chaaye, okuruubhana na obhujabhi bhwebhwe, 19 nawe jitari ati bhatakumenya emisango ja Nyamuwanga. Nyamuwanga omwene ꞉aabheeresiisye abhwerubhweru emisango jaaye, kurwa ejo, ejimenyekana ku‑bhaanu. 20 Ku‑bhwambiro awo, Nyamuwanga ꞉aabhumbire ebhiinu bhyone. Okwambira omwanya ogwo, abhaanu abhatura okumenya kutyo Nyamuwanga ari, noorwo kutyo bhatakumurora. Ebhiinu bhinu ꞉aabhumbire ebhyeresya obhuturo bhwaye bhwa akajaanende, ka wone omwene niwe Nyamuwanga era, atari‑wo owundi wuri. Kurwa ejo, abhaanu bhatakutura okwayika ati bhatakumenya Nyamuwanga. 21 Abhamenya kutyo Nyamuwanga ari, nawe bhatakumukuuya noorwo okumusiima rwa kutyo eeyire. Nibhabha na obhwiganirisya obhubhiibhi, na obhwenge bhwebhwe nibhubha‑mo echisuute kata. 22 Abheekuuya ati nibho abha obhwengeeso, nawe ni bhamuumu. 23 Bhasigire okuramya Nyamuwanga wa akajaanende koone, abharamya amasusano ga abhaanu bhanu abhafwa, amwi jityanyi, jinyonyi amwi jityanyi ejindi jinu ejiikurura.
24 Ku‑songa eyo, Nyamuwanga abhasindikire bhabhega nibharuubha okurigira kwebhwe okubhiibhi, nibhakoranira emisango emijabhi ja jiswaro ku‑mibhiri jeebhwe. 25 Bhasigire okwikirisya echimari cha Nyamuwanga, nibharuubha orubheeyi. Abharamya ebhibhumbwa na okubhikorera emirimu, nawe bhasigire okukora ejo ku‑Nyamuwanga Omubhumbi unu eeyire okukusibhwa akajaanende koone. Jibhe kutyo.
26 Ku‑songa eyo, Nyamuwanga abhasindikire bharuubhe okurigira kwebhwe kwa jiswaro rwa kutyo abheenda. Abhagasi bhasigire okukorera emirimu emibhiri jeebhwe rwa kutyo ꞉jaabhumbirwe, na abhajikorera emirimu rwa kutyo ꞉jitaakarariiywe, abheene kwa abheene. 27 Nyabhuriko abharume wone, bhasigire okukorera emirimu emibhiri jeebhwe rwa kutyo ꞉jaabhumbirwe, omurume na omugasi. Abharume abharigirana abheene kwa abheene, abhakora emisango ja jiswaro. Kwa okukora kutyo, bheeyaawuriiye abheene ebhitiibha bhinu ebhiingana na ebhikorwa bhyebhwe ebhijabhi.
28 Mbe, abhaanu bharemere okusombookerwa Nyamuwanga, kurwa ejo Nyamuwanga wone abhasindikire bhabhega nibharuubha obhwiganirisya bhwebhwe bhwa okwiyabhya. Woori abhakora emisango jinu jiteeyire okukorwa. 29 Bheejuuywe ebhibhiibhi bhyafubhyafu, abhakora obhujabhi bhwafubhwafu, ka wone abheesigombera ebhiinu bhyone na abheenda inyombo. Bheejuuywe orwiso, obhwiti na obhukungirisi. Abhaayika orubheeyi, bhari na obhwira obhubhiibhi, ni bharomi bha abhaanu, 30 abha amafumo, na bhasokere Nyamuwanga. Bhatakwigana emisango ja abheejaabho, ka wone ni bhaanu bha okwikumangya na okwikuuya. Bhuri mwanya abhayenja injira inyaaya ya okukora ebhibhiibhi. Bhatakugayuka abheebhusi bheebhwe, 31 ni bhamuumu, bhatakukuumisya emirago jeebhwe, bhatari na eryenda noorwo echigongo. 32 Abhaanu abho bhamenyere kisi ati, omuunu unu kaakora ebhikorwa ebhijabhi rwa ebhyo, kaabha eeyire okusingaarisibhwa na Nyamuwanga. Noorwo kutyo, jitakubhasaasa! Abhagenderera okukora ebhikorwa ebhijabhi ebhyo, ka wone abheekirisyanya na abhaanu bhanu abhabhikora.