Abharuumi 2

Nyamuwanga ariramura abhaanu bhoone okusoroora wuri

1 Mbe, awe Omuyawudi weejaasu, chimari owuramura abhaanu abhandi bhanu abhakora emisango ejo. Nawe noorwo awe utakutura okwibhagira imbere ya Nyamuwanga! Ringira, omwanya gunu owuramura abhandi, niwo awe wone umenye ati owiramura omwene, kwa okubha emisango emijabhi jinu abhakora nijo awe omwene owukora. 2 Eswe chimenyere ati Nyamuwanga kaaramura kwa obhurengeresi abhaanu bhanu abhakora emisango rwa ejo. 3 Nawe awe unu owuramura abhaanu abhandi keenu awe wone nuukora emisango ejoejo, angu, owitogera ati uriiruka indamu ya Nyamuwanga? 4 Nyamuwanga ni wa kisi muno, kaakufwira echigongo chaafu, na kaakwigumiirisya muno. Nawe awe woori, oweenda okugaya ejo joone? Utakumenya ati kaakweresya bhwa ekisi bhwaye, korereki uture okuta ebhibhiibhi bhyawo? 5 Awe uri na echigundu, ka wone owurema okuta ebhibhiibhi bhyawo. Kurwa ejo mbe, owiibhiikira ebhitiibha ku‑rusuku runu Nyamuwanga arisoosya indamu yaaye ya obhurengeresi.

6 Orusuku orwo, Nyamuwanga aririya bhuri muunu okuruubhana na ebhikorwa bhyaye. 7 Nyamuwanga ariyaana obhuwanga bhwa akajaanende koone abhaanu bhanu abheegumiirisya mu‑kukora ja ekisi okuyigwa wuri, inguru ya okuyenja rikusyo na echibharo na obhuwanga bhunu bhutakunyamuka okusooka ku‑mwene. 8 Nawe aribhiyirwa na okuyaana ebhitiibha abhaanu bhanu okuruubhana na orwango rwebhwe, abharema echimari na abhakora obhujabhi. 9 Abhaanu bhoone bhanu abhakora emisango emijabhi, bharibhona obhwasye bhwafu na ebhinyaasyo, okwambira ku‑Bhayawudi okukingira ku‑bhaanu bhanu bhatari Bhayawudi. 10 Nawe abhaanu bhoone bhanu abhakora emisango ja ekisi, bharibha na jikuma, echibharo na omurembe, okwambira ku‑Bhayawudi okukingira ku‑bhaanu bhanu bhatari Bhayawudi. 11 Nyamuwanga atakusoroora omuunu woonewoone.

12 Abhaanu bhanu bhatari Bhayawudi bhanu abhakora ebhibhiibhi bharisingaarisibhwa, noorwo bhaakabha bhatakumenya ebhiraagiro bhya Muusa. Abhayawudi bhanu abhakora ebhibhiibhi keenu bhamenyerega ebhiraagiro ebhyo, abheene bhariramurwa okuruubhana na ebhiraagiro ebhyo. 13 Bhariramurwa, kwa okubha Nyamuwanga atakubhara omuunu okubha omurengeresi kwa okuungwa ebhiraagiro ebhyo era, tari unu kaakora jinu ebhiraagiro ebhimuragirira akore. 14 Abhaanu bhanu bhatari Bhayawudi, abho bhatakumenya ebhiraagiro ebhyo. Noorwo kutyo, bhaakakora ja ekisi okuruubhana na obhwiganirisya bhwebhwe, na emisango ejo ejibha rwa kutyo ebhiraagiro bhya Muusa ebhyeresya, ejo ejeeresya ati abhamenya okukora jinu jiiyire. 15 Abheeresya kwa ebhikorwa bhyebhwe ati, jinu jeenderwe mu‑bhiraagiro, jikaamirwe mu‑myoyo jeebhwe. Noorwo emitima jeebhwe ejibheeresya eryo, na obhwiganirisya bhwebhwe omwanya ogundi obhubharamura, na omwanya ogundi obhubheeresya ati abhakora jinu jiiyire. 16 Nikwo kutyo jiribha ku‑rusuku rwa indamu. Nyamuwanga ariramura abhaanu okutura ku‑Kirisito Yeesu, noorwo emisango jeebhwe ja imbisike, rwa kutyo ejaayika Emisango ja Ekisi jinu eniraasya.

Abhayawudi na echiraagiro cha okutendwa

17 Woori awe uri muunu unu owitoga ati chimari uri Muyawudi, owiyikanya okubha omurengeresi imbere ya Nyamuwanga kwa okuruubha ebhiraagiro bhya Muusa, na owikuuya ati awe uri muunu wa Nyamuwanga. 18 Owirora ati owumenya emisango jinu Nyamuwanga keenda ukore, na owusombookerwa jinu jiri ja ekisi, kwa okubha owiyigisiibhwaga ebhiraagiro bhya Muusa. 19 Owirora ati owukenwa okutangasya abhaanu bhanu bhatari Bhayawudi, rwa omuunu unu kaatangasya abhawofu, amwi rwa idara inu eyimirikira abhaanu bhanu bhari mu‑chisuute. 20 Owirora ati awe uri mwiyigisya wa abhaana na abhaanu bhanu bhatakusombookerwa echimari cha Nyamuwanga, kwa okubha ebhiraagiro ebhikubhwira emisango joone ja obhwengeeso na obhumenyi bhwa echimari. 21 Awe owiyigisya abhaanu abhandi, nawe ni kurwa ki utakukora jinu owiyigisya? Owuraasisya abhandi ati bhasige okwibha, nawe ni kurwa ki awe omwene owiibha? 22 Awe owiyigisya abhaanu ati bhasige okukora obhuromesi, nawe ni kurwa ki awe omwene owukora obhuromesi? Awe owusoka amasusano ga amasambwa, nawe ni kurwa ki awe omwene owiibha ebhiinu okusooka mu‑nju ja okuramya amasusano ago? 23 Awe owikuuya ati owumenya ebhiraagiro bhya Nyamuwanga, nawe owugaya Nyamuwanga kwa okunyamura ebhiraagiro bhyaye. 24 Kurwa ejo, jiri rwa kutyo Ebhikaame Ebhyeru ebhyayika ati, “Risiina rya Nyamuwanga erifumwa na abhaanu bha amaanga agandi, ku‑songa ya ebhikorwa ebhijabhi bhinu omukora.”

25 Okutendwa kwawo kuri na omuriiro, araabha owukora rwa kutyo ebhiraagiro ebhiragirira. Nawe ukabha nuubhinyamura, owubha rwa omuunu unu atatenderwe. 26 Kurwa ejo, omuunu unu atatenderwe, araabha kaakora rwa kutyo ebhiraagiro ebhiragirira, Nyamuwanga kaamwikirisya rwa omuunu unu atenderwe. 27 Abhaanu bhanu bhatari Bhayawudi ꞉bhataatenderwe, nawe araabha abhakora rwa kutyo ebhiraagiro ebhiragirira, ebhikorwa bhyebhwe nibhyo ebhikusoosisya obhubhambaasi ati, awe Omuyawudi uri mukosi wa ebhibhiibhi. Uriramurwa, kwa okubha awe Omuyawudi utenderwe, ka wone owumenya ebhiraagiro bhya Nyamuwanga, nawe owubhinyamura. 28 Mbe, mumenye ati, jitari ati bhuri muunu unu kaabhonekana ati ni Muyawudi, aribha Muyawudi wa echimari. Omuunu atakutura okubha Omuyawudi wa echimari kwa okubha ati omubhiri gwaye gutenderwe era. 29 Wuri! Omuyawudi wa echimari ni unu kaagayuka Nyamuwanga kwa omwoyo gwaye gwone. Okutendwa kwa echimari okukorwa mu‑mwoyo na Mwoyo Mweru, kutari kwa okuruubha ebhiraagiro bhya Muusa. Omuunu rwa oyo, atakuramira jikuma okusooka ku‑bhaanu, tari arikuuywa na Nyamuwanga omwene.