Abharuumi 3

Nyamuwanga ni mwiyikanyibhwa ku‑Bhayawudi

1 Mbe woori, guri‑mo omuriiro ki okubha Omuyawudi? Okutendwa wone kuri‑mo omuriiro ki? 2 Ni chimari ati, okubha Omuyawudi kuri‑mo omuriiro mwafu. Omusango gwa okwamba ni ati, Nyamuwanga ꞉aayaaye Abhayawudi emisango jaaye. 3 Nawe Abhayawudi abhandi bhaariga bhatari bheeyikanyibhwa mu‑kuruubha emisango jaaye. Mbe, chaayike ati kutyo Abhayawudi abho bhaariga bhari ꞉bhaakorere Nyamuwanga wone asige okubha omwiyikanyibhwa okukora emisango jinu ꞉aayikire? 4 Wuri, noorwo na akatyari! Noorwo kutyo abhaanu bhoone ni bhabheeyi, Nyamuwanga keeresya ati kaakora chinu kaayika. Rwa kutyo Ebhikaame Ebhyeru ebhyayika inguru yaaye ati,

“Waakabhuura abhaanu ku‑bhibhiibhi bhyebhwe,

emisango jaawo ni ja echimari.

Waakabharamura,

indamu yaawo ni ya obhurengeresi.”

5 Nawe, abhaanu abhandi abhatura okwayika ati, “Ebhibhiibhi bhyeswe, eswe Abhayawudi, nibhyo ebhyeresya ati Nyamuwanga ni murengeresi ku‑ndamu yaaye. Kurwa ejo, araabha kaachiyaana ebhitiibha, chaayike ati atari murengeresi chimwi?” 6 Wuri, noorwo na akatyari! Jikabheeye jiri kutyo, Nyamuwanga akabheeye na obhurengeresi ki bhwa okuramura abhaanu bha ku‑chaaro? 7 Ka wone abhatura okwayika ati, “Eswe chikakora ebhibhiibhi, abhaanu abhandi abhatura okurora abhwerubhweru ati Nyamuwanga ni mwiyikanyibhwa, na bharigenderera okumukusya. Woori, kurwa ki chichaaramurwa ati chiri bhakosi bha ebhibhiibhi?” 8 Ejo jiri rwa okwayika ati, “Chibhega nichikora ebhibhiibhi, korereki Nyamuwanga areete ja ekisi.” Abhaanu abhandi abhabheeyeresya ati, “Noorwo Pawuro keeyigisya kutyo!” Nawe anye enaayika ati, abhaanu abho bhoone bhariyaanwa ebhitiibha okuruubhana na ebhibhiibhi bhyebhwe.

Atari‑wo omuunu omurengeresi imbere ya Nyamuwanga

9 Mbe, chaayike ki? Angu, chaayike ati eswe Abhayawudi chiri na omuriiro okukira abhaanu abhandi bhanu bhatari Bhayawudi? Wuri! Rwa kutyo ndamarire okweresya, Abhayawudi na bhanu bhatari Bhayawudi, bhoone bhatungirwe na ebhibhiibhi. 10 Rwa kutyo Ebhikaame Ebhyeru ebhyayika ati,

“Atari‑wo omuunu omurengeresi imbere ya Nyamuwanga, noorwo umwi.

11 Atari‑wo omuunu unu kaasombookerwa emisango ja Nyamuwanga,

ka wone atari‑wo unu kaayenja okumumenya.

12 Abhaanu bhoone bhasigire okugayuka Nyamuwanga,

bhoone bhateeyire rindi imbere yaaye.

Atari‑wo omuunu unu kaakora ja ekisi,

atari‑wo noorwo umwi.”

13 “Ebhimiro bhyebhwe bhiri rwa jiifwa jinu jitasiikiiywe,

jindimi jeebhwe ejaayika orubheeyi.”

“Mu‑kanwa keebhwe,

ejisooka‑mo emisango eja obhusungu rwa obhwa ifwira.”

14 “Mu‑minwa jeebhwe jiijuuye‑mo emisango ja echiyiimo,

na emisango jinu ejiwutaasya.”

15 “Amaguru geebhwe ni maangu okuja okwita.

16 Woonewoone anu abhaja,

abhanyamura na okusingaarisya.

17 Bhatakumenya okwikara kwa omurembe aamwi na abhaanu abhandi.”

18 “Bhatakwigana kata okuramya Nyamuwanga.”

19 Mbe, eswe chimenyere ati, omwanya gunu Ebhikaame Ebhyeru ebhisimura inguru ya echiinu choonechoone, ebhisimura inguru ya abhaanu bhanu ꞉bhaayaaywe Ebhikaame ebhyo. Ebhikaame ebhyo, ꞉bhyakaamirwe korereki abhaanu bhoone, Abhayawudi na abhaanu bhanu bhatari Bhayawudi bhasige okubha na isonga ya okwibhagira omwanya gunu Nyamuwanga ariramura echaaro. Jiribha abhwerubhweru ati abhaanu bhoone bheeyire okuramurwa na Nyamuwanga. 20 Emisango ejo jiri kutyo, kwa okubha atari‑wo omuunu woonewoone unu aribharwa okubha omurengeresi imbere ya Nyamuwanga kwa okuruubha ebhiraagiro bhya Muusa. Emirimu ja ebhiraagiro ebhyo, ni kumenyesya abhaanu bhoone inguru ya ebhibhiibhi bhyebhwe.

Omuunu kaabharwa okubha omurengeresi kwa okwikirisya Yeesu

21 Nawe woori, Nyamuwanga eeresya injira ya abhaanu okubharwa ati ni bharengeresi imbere yaaye, kutari ku‑njira ya ebhiraagiro. Noorwo ebhikaame bhya ebhiraagiro bhya Muusa na ebhikaame bhya abharagi ebhyayika abhwerubhweru emisango ejo. 22 Abhaanu bhoone bhanu abheekirisya Yeesu Kirisito, Nyamuwanga kaabhabhara ati ni bharengeresi imbere yaaye, okutura ku‑bhwiyikanyibhwa bhwa Yeesu oyo. Nyamuwanga atakusoroora omuunu woonewoone, 23 kwa okubha abhaanu bhoone bhakorere ebhibhiibhi na abhagerukirwa rikusyo rya Nyamuwanga. 24 Nawe ku‑bhwitiriranya bhwa Nyamuwanga, abhabharwa ati ni bharengeresi imbere yaaye, bhatasoosiisye echiinu choonechoone wuri. Bheeruuywe okusooka mu‑bhibhiibhi bhyebhwe okutura ku‑Kirisito Yeesu. 25 Nyamuwanga ꞉aamuteeye‑wo abhe echoogo cha okugwatanya abhaanu na Nyamuwanga, korereki bhafwirwe echigongo ebhibhiibhi bhyebhwe, kwa okwikirisya ati Yeesu ꞉aafuuwe inguru yeebhwe. Nyamuwanga ꞉aakorere kutyo, korereki eeresye ati ni murengeresi, kwa okubha ꞉eegumiirisiisye, ꞉ataayaaye abhaanu ebhitiibha ku‑bhibhiibhi bhinu ꞉bhaakorere omwanya gwa inyuma. 26 Ka wone ꞉aakorere kutyo, korereki eeresye obhurengeresi bhwaye ku‑mwanya gunu. Omwene ni murengeresi kwa okubha ꞉aayaaye Yeesu ebhitiibha inguru ya ebhibhiibhi bhya bhanu abhamwikirisya, ka wone kaabhabhara ati ni bharengeresi imbere yaaye inguru ya Yeesu.

27 Kurwa ejo, angu, omusango ogwo oguchiyingirira okwikumangya? Yee, kwa okubha noorwo eswe chitakubharwa okubha abharengeresi imbere ya Nyamuwanga kwa okuruubha ebhiraagiro, tari kwa okwikirisya Yeesu era. 28 Chimenyere ati Nyamuwanga niwe kaabhara omuunu okubha omurengeresi kwa okwikirisya Yeesu era, kutari kwa okuruubha ebhiraagiro bhya Muusa. 29 Angu, Nyamuwanga ni Nyamuwanga wa Abhayawudi era, amwi noorwo wa abhaanu bhanu bhatari Bhayawudi? Yee, Nyamuwanga ni Nyamuwanga wa abhaanu bhoone! 30 Ari‑wo Nyamuwanga umwi era, kurwa ejo iri‑wo injira imwi era ya okubhara abhaanu okubha abharengeresi imbere yaaye. Abhayawudi na abhaanu bhanu bhatari Bhayawudi, bhoone abheekirisibhwa na Nyamuwanga okubha abharengeresi kwa okwikirisya Yeesu era. 31 Angu woori, omwanya gunu echikomeeresya okwikirisya Yeesu, okwingana na okwayika ati ebhiraagiro bhya Muusa bhitari na omuriiro? Wuri, noorwo na akatyari! Nawe chikeekirisya Yeesu, niwo echibha chikuumisiisye joone jinu ebhiraagiro bhya Muusa bhiragiriiye.