Abharuumi 4

Bhurayimu ꞉aabharirwe okubha omurengeresi ku‑riikirisya

1 Mbe, chaayike ki woori inguru ya saaja weeswe Bhurayimu? Nyamuwanga ꞉aamubharire kutiki okubha omuunu omurengeresi imbere yaaye? 2 Araabha chikaayika ati Bhurayimu ꞉aabharirwe okubha omuunu omurengeresi okuruubhana na ebhikorwa bhyaye bhya ekisi, akabheeye na echiinu cha okwikuuyisya. Nawe echimari ni ati, atari na choonechoone cha okwikuuyisya imbere ya Nyamuwanga. 3 Ebhikaame Ebhyeru ebhyayika ati, “Bhurayimu ꞉eekirisiisye Nyamuwanga, kurwa ejo Nyamuwanga ˆnaamubhara okubha omuunu omurengeresi imbere yaaye.”

4 Mbe, omwanya gunu omuunu kaakora emirimu, omuyeero gwaye gutari chiyaanwa, tari ni chiinu chinu eeyire ariywe. 5 Nawe omuunu unu atakwiyikanya ebhikorwa bhyaye, aakeekirisya Nyamuwanga unu kaabhara omuunu omujabhi okubha omuunu omurengeresi, oyo niwe Nyamuwanga kaabhara okubha omuunu omurengeresi okuruubhana na eriikirisya ryaye. 6 Rwa kutyo omukama Dawudi wone ꞉aayikire, inguru ya amabhando ga omuunu unu Nyamuwanga kaabhara okubha omurengeresi okuringira ebhikorwa bhyaye wuri. Dawudi ꞉aayikire ati,

7 “Bhari na amabhando abhaanu

bhanu Nyamuwanga afwiriiye echigongo ebhibhiibhi bhyebhwe

na okubhasoosisya‑wo ebhibhiibhi bhyebhwe.

8 Ari na amabhando omuunu

unu Raatabhugenyi atakumubharira ebhibhiibhi.”

9 Angu woori, amabhando ago ni inguru ya abhaanu bhanu ꞉bhaatenderwe era, amwi noorwo ku‑bhaanu bhanu bhatakutendwa? Enibheechukya jinu Ebhikaame Ebhyeru ebhyayika ati, Bhurayimu ꞉eekirisiisye Nyamuwanga, kurwa ejo Nyamuwanga ˆnaamubhara okubha omuunu omurengeresi okuruubhana na eriikirisya ryaye. 10 Nawe ꞉jaakorekeene ri? Nyamuwanga ꞉aabharire Bhurayimu okubha omuunu omurengeresi omwanya gunu aariga atenderwe, amwi achaari okutendwa? ꞉Jaakorekeene achaari okutendwa! 11 Okutendwa kwaye ꞉kwabheeye echibharikisyo, ka wone ꞉kwabheeye orunabho runu ꞉rweresiisye ati Nyamuwanga ꞉aamubharire okubha omurengeresi okuruubhana na eriikirisya ryaye rinu aariga ari naryo achaari okutendwa. Ku‑njira eyo, Bhurayimu ꞉aakorerwe okubha esemwene abheekirisya bhanu bhachaari okutendwa, korereki noorwo abheene bhabharwe okubha abharengeresi imbere ya Nyamuwanga. 12 Nyabhuriko, Bhurayimu ꞉aakorerwe okubha esemwene abhaanu bhanu bhatenderwe, na bhari na eriikirisya. Abhaanu abho abharuubha orugere rwa Bhurayimu saaja weebhwe, unu ꞉eekirisiisye Nyamuwanga noorwo achaari okutendwa.

13 Nyamuwanga ꞉aaragire Bhurayimu na abhaanu bha orwibhuro rwaye ati, aribhayaana echaaro choone okubha omwandu gwebhwe. Nyamuwanga ꞉ataabharagire kutyo kwa okubha Bhurayimu aariga ˆnaakuumisya ebhiraagiro, tari kwa okubha aariga ˆneekirisya Nyamuwanga na omurago gwaye. Niwo ˆnaabharwa okubha omurengeresi imbere ya Nyamuwanga. 14 Araabha abhaanu abha ebhiraagiro bhaakaramiiye jinu Nyamuwanga ꞉aaragire, kwa okubha ꞉bhaakuumisiisye ebhiraagiro, niwo eriikirisya ku‑Nyamuwanga ritaakabheeye na omuriiro. Ka wone, noorwo omurago gwa Nyamuwanga gutaakakuumisiibhwe, 15 kwa okubha okunyamura ebhiraagiro, okureterera okuyaanwa ebhitiibha. Nawe araabha bhitari‑wo ebhiraagiro, niwo kutari‑wo okunyamura ebhiraagiro.

16 Echo nicho echireterera omurago gwa Nyamuwanga gwiyikanye eriikirisya era, kwa okubha ogusookana na obhwitiriranya bhwaye. Ku‑njira eyo, joone jinu ꞉bhaaragirwe abhaanu bhoone bha orwibhuro rwa Bhurayimu, jibhe ja echimari, jitari ku‑Bhayawudi era bhanu bhari na ebhiraagiro, tari noorwo ku‑bhanu abheekirisya Nyamuwanga rwa kutyo Bhurayimu ꞉aakorere. Bhurayimu niwe raata weeswe bhoone bhanu echiikirisya Nyamuwanga. 17 Ni rwa kutyo Nyamuwanga ꞉aabhwiriiye Bhurayimu mu‑Bhikaame Ebhyeru ati, “Nikuteeye‑wo ubhe raata wa amaanga amaafu.” Bhurayimu ꞉oonguuwe emisango ejo ari imbere ya Nyamuwanga, ˆneekirisya Nyamuwanga unu kaayaana abhafuuwe obhuwanga, na unu kaaragirira ebhiinu bhinu bhichaariga okubha‑wo bhibhe‑wo.

18 Omwanya gunu Bhurayimu ꞉aabhwiriiywe emisango ejo, jaariga jiri bhikomeeye muno okujiikirisya. Nawe ˆnaagenderera okwikirisya na okwiyikanya ati Nyamuwanga arimukora abhe raata wa amaanga amaafu, kwa okubha Nyamuwanga aariga amubhwiriiye ati, “Abhaanu bha orwibhuro rwawo bharibha bhaafu rwa jinjota.” 19 Omwanya ogwo, Bhurayimu aariga ari na emiguuga egana rimwi kutya. ꞉Aamenyere ati, omubhiri gwaye gwariga guri wuti gufuuwe, na Saara omugasi waaye aariga ari mugumba. Nawe, eriikirisya rya Bhurayimu ꞉ritaagerukire. 20 Ka wone, aariga atari na echiitimaato choonechoone inguru ya omurago gunu Nyamuwanga ꞉aamuragire. Tari ˆnaagenderera okurumatana mu‑kwikirisya na mu‑kukusya Nyamuwanga, 21 kwa okubha ꞉aamenyere chimari ati Nyamuwanga kaatura okukora jinu ꞉aamuragire. 22 Okuruubhana na eriikirisya eryo, Nyamuwanga ˆnaamubhara okubha omurengeresi imbere yaaye.

23 Woori, emisango jinu ejaayika ati, “Nyamuwanga ꞉aamubharire okubha omuunu omurengeresi imbere yaaye,” ꞉jitaakaamirwe inguru ya Bhurayimu era, 24 tari ꞉jaakaamirwe noorwo inguru ya eswe bhoone. Emisango ejo, ejichibhwira ati chikeekirisya Nyamuwanga unu ꞉aasuuruuye Yeesu Raatabhugenyi weeswe okusooka mu‑bhafuuwe, niwo eswe wone echibharwa okubha abharengeresi imbere ya Nyamuwanga. 25 Nyamuwanga ꞉aasoosiisye Yeesu, korereki afwe inguru ya ebhibhiibhi bhyeswe, ˆnaamusuurura okusooka mu‑bhafuuwe, korereki eswe chibharwe okubha abharengeresi imbere yaaye.