Abharuumi 5

Amabhando ga okwikirisya Nyamuwanga

1 Mbe, Nyamuwanga achibharire okubha abharengeresi imbere yaaye, okuruubhana na eriikirisya ryeswe. Kurwa ejo, chiri na omurembe na Nyamuwanga okutura ku‑Raatabhugenyi weeswe Yeesu Kirisito. 2 Ku‑njira ya okwikirisya Yeesu, Nyamuwanga achiyaaye obhwitiriranya bhwaye. Noorwo woori echigenderera okuramira obhwitiriranya obhwo. Echikonderwa muno, kwa okubha echiiyikanya ati chirisangira aamwi na Nyamuwanga mw‑ikusyo ryaye. 3 Noorwo ebhinyaasyo bhyonebhyone bhikabha nibhichiija‑ko, eswe chirigenderera okukonderwa, kwa okubha echimenya ati ebhinyaasyo ebhichireetera obhwigumiirisya. 4 Obhwigumiirisya nibhwo obhuchireetera ribhaasi, ribhaasi wone erichireetera obhwiyikanyo. 5 Obhwiyikanyo obhwo, bhutakutura okuchiswasya, kwa okubha Nyamuwanga eeturuuye eryenda ryaye ryafu mu‑myoyo jeeswe, okutura Mwoyo waaye Mweru unu achiyaaye.

6 Mbe, omwanya gunu eswe chaariga chitari na amanaga, Kirisito ꞉eejire ˆnaachifwira eswe abhajabhi, ku‑mwanya gunu ꞉gwateeywe‑wo. 7 Chimari, ni kukomeeye ku‑muunu woonewoone okwikirisya okwitwa inguru ya omuunu omurengeresi. Amwi omuunu kaatura okwisoosya, okufwa inguru ya omuunu wa ekisi era. 8 Nawe Nyamuwanga ꞉aacheeresiisye ati kaacheenda muno, kwa okusoosya Kirisito afwe inguru yeeswe, omwanya gunu chaariga chichaari abhakosi bha ebhibhiibhi.

9 Woori, kwa okubha chibharirwe okubha abharengeresi imbere ya Nyamuwanga ku‑njira ya isagama ya Yeesu Kirisito, chimari chirichungurwa nage okusooka mu‑kuyaanwa ebhitiibha na Nyamuwanga. 10 Omwanya gunu chaariga chichaari abhasoko bhaaye, ꞉chaagwatanyiibhwe na Nyamuwanga okutura ku‑rufu rwa Omwana waaye. Woori, kwa okubha chigwatanyiibhwe okutura ku‑rufu rwaye, chimari chirichungurwa okutura obhuwanga bhwaye. 11 Mbe, okukira ejo joone, Nyamuwanga achikorere chikonderwe muno okutura ku‑Raatabhugenyi weeswe Yeesu Kirisito, kwa okubha omwene niwe achigwatanyiisye na Nyamuwanga.

Adaamu ꞉aachireeteeye orufu, nawe Yeesu achiyaaye obhuwanga

12 Mbe, echibhiibhi ꞉cheengiiye mu‑chaaro okutura ku‑muunu umwi, niwo nichireterera orufu. Okuruubhana na ejo, abhaanu bhoone abhafwa, kwa okubha bhoone ni bhakosi bha ebhibhiibhi. 13 Noorwo okwambira omwanya gunu Adaamu ꞉aakorere echibhiibhi okukingira anu Muusa ꞉aayaaywe ebhiraagiro, echibhiibhi chaariga chaamarire okubha‑wo ku‑chaaro. Nawe Nyamuwanga ꞉ataabharire abhaanu okubha abhanyamusi bha ebhiraagiro, kwa okubha ebhiraagiro bhyariga bhichaari okubha‑wo. 14 Woori, abhaanu bhoone bha omwanya ogwo, bhaariga nibhafwa. Orufu ꞉rwabhatungire, noorwo kutyo ꞉bhataakorere echibhiibhi cha okunyamura echiraagiro rwa chinu Adaamu ꞉aakorere.

Mbe, Adaamu aariga ari chijekekanyo cha Yeesu Kirisito unu aakeejire omwanya gundi. 15 Nawe echibhiibhi cha Adaamu chitakwingana na echiyaanwa cha obhwitiriranya bhwa Nyamuwanga. Adaamu ni muunu umwi unu ꞉aakorere abhaanu bhoone bhafwe okuruubhana na echibhiibhi chaaye. Nawe ari‑wo umwi owundi, Yeesu Kirisito, unu kaayaana abhaanu bhaafu echiyaanwa cha obhwitiriranya bhwa Nyamuwanga. Obhwitiriranya bhwa Nyamuwanga obhwo bhutari na indengo, obhukira muno echibhiibhi cha Adaamu! 16 Ka wone bhuri‑wo obhutaasyanya bhunene agati ya echiyaanwa cha obhwitiriranya bhwa Nyamuwanga na jinu ꞉jaasookeene na echibhiibhi cha Adaamu. Omwanya gunu echibhiibhi chimwi chirya ꞉chaakorerwe na Adaamu, Nyamuwanga ꞉aaramuuye abhaanu na okubhayaana ebhitiibha. Nawe omwanya gunu ebhibhiibhi bhyafu bhikorerwe na abhaanu, Nyamuwanga kaabhabhara okubha abharengeresi imbere yaaye, ku‑songa ya obhwitiriranya bhwaye. 17 Echibhiibhi cha omuunu umwi, ꞉chaakorere orufu rutunge abhaanu bhoone okutura omuunu umwi oyo. Nawe chimari woori, abhaanu bhoone bhanu abharamira echiyaanwa cha obhwitiriranya bhwa Nyamuwanga bhunu bhutari na indengo, abhabharwa okubha abharengeresi imbere ya Nyamuwanga. Abho bharitunga mu‑bhuwanga bhwa akajaanende koone, okutura ku‑umwi owundi urya, Yeesu Kirisito.

18 Kurwa ejo, rwa kutyo abhaanu bhoone ꞉bhaaramuuywe okuruubhana na echibhiibhi chimwi cha omuunu umwi, kutyokutyo abhaanu bhoone abhabharwa okubha abharengeresi imbere ya Nyamuwanga okutura ku‑bhurengeresi bhunu bhukorerwe na omuunu umwi. Mu‑kukora kutyo, abhaanu bhoone nibhayaanwa obhuwanga bhwa akajaanende koone. 19 Omuunu umwi ejire aarema okugayuka Nyamuwanga, ꞉aaretereeye abhaanu bhoone bhabhe abhakosi bha ebhibhiibhi. Kutyokutyo, omuunu umwi ejire aagayuka Nyamuwanga, ꞉aaretereeye abhaanu bhaafu bhabhe abharengeresi imbere ya Nyamuwanga.

20 Ebhiraagiro bhya Muusa ꞉bhyejire, nibhireterera ebhibhiibhi okwiyongesya. Noorwo kutyo, omwanya gunu ebhibhiibhi ꞉bhyeyongesiisye, obhwitiriranya bhwa Nyamuwanga wone nibhugenderera okwiyongesya muno. 21 Mbe, echibhiibhi chaariga chiri na amanaga ga okutunga abhaanu na okubhareetera orufu. Kutyokutyo, obhwitiriranya bhwa Nyamuwanga wone obhutunga abhaanu, kwa okubhabhara ati ni bharengeresi. Obhwitiriranya obhwo, obhubhayaana obhuwanga bhwa akajaanende koone, okutura ku‑Raatabhugenyi weeswe Yeesu Kirisito.