Injoka eyiibhoyerera ku‑kubhoko kwa Pawuro
28
1 Chejire chaakinga ku‑chaaro chiri bhaanga, niwo nichimenya ati risinga rinu eritogwa ati, Meerita. 2 Abheenengo nibhachikorera eja ekisi muno. Okubha ꞉bhaachikumire kisi na okuchikumira omuriro, kwa okubha ingʼubha yaariga iguuye na chaariga nichuungwa imbewo muno. 3 Pawuro ˆnaakumanya jingʼwi. Omwanya gunu aariga ˆnaajituura mu‑muriro, injoka niisoromoka okusooka mu‑ngʼwi omwo inguru ya ribhirabhira rya omuriro. Niyiibhoyerera ku‑kubhoko kwaye. 4 Abhaanu abho bhejire bhaarora ati injoka yiineenere ku‑kubhoko kwa Pawuro, nibhabhwirana ati, “Jiri ku‑bhweru ati omuunu unu ni mwiti. Noorwo kutyo aawona mu‑nyanja, Rirenga, risambwa ryeswea rinu eriramura abhakayi, ritakumusiga agenderere okubha omuwanga.” 5 Nawe Pawuro ˆnaakuukumurira injoka eyo mu‑muriro na ꞉yitaamuwutasiisye noorwo kutooto. 6 Abhaanu bheeyikanyaga ati, Pawuro kaja okufwimba, amwi kaja okwibhuma aasi na okufwa awoawo. Nibhamara omwanya mureera nibharindiriraga okurora kutyo kaja okubha. Nawe bhejire bhaarora ati gutari‑wo gwonegwone gunu gwamubhona, nibhayindura obhwiganirisya bhwebhwe, nibhaayika ati Pawuro atari omuunu, tari ni risambwa.Pawuro kaawosya abharwaye Meerita
7 Ayeeyi na anu ꞉chaasikiriiye ryariga riri‑wo risambu rya omukuru wa risinga eryo, unu aatogwaga ati Pubhuriiyo. Omuunu oyo ˆnaachikuma kisi ewaaye, nichimara siku esatu awo. 8 Omwanya ogwo, esemwene Pubhuriiyo aariga amaamire ku‑bhuriri, ari na omuswija na ˆnaasayaga isagama. Pawuro ˆneengira okumurooja, ˆnaamusabhirwa ku‑Nyamuwanga, ˆnaatuura amabhoko gaaye ku‑murwaye, ˆnaamuwosya. 9 Okuruubhana na echikorwa echo, abharwaye abhandi bhoone kw‑isinga okwo, nibhaaja ku‑Pawuro, ˆnaabhawosya wone. 10 Abheenengo nibhachiyaana echibharo echinene muno. Bhunu chaariga chiri yeeyi okwimuka, nibhachituurira mu‑ngarabha bhuri echiinu chinu chaariga nichikena mu‑rugendo rweswe.
Pawuro kaakinga mu‑musi gwa Ruumi
11 Chejire chaamara ameesi gasatu chiri kw‑isinga okwo, nichiimuka na ingarabha imwi inu yaariga iri awo niirindaga omwanya gwa imbewo guture. Ingarabha eyo, yaariga iri ya mu‑musi gwa Arekijandiriya, ka wone yaariga iri na amasusano ga amasambwa amarongo Kaasita na Poorukusi. 12 Nichigobha mu‑musi gwa Sirakuusi, nichibha awo siku esatu. 13 Nichaambuka nichikinga mu‑musi gwa Reejiyo mu‑chaaro cha Yitaariya. Bhwejire bhwacha, omurimbe niguyemba, niguchikuura. Orusuku rwa kabhiri nichikinga mu‑musi gwa Putewoori. 14 Awo nichibhugana na abheekirisya abharebhe, nibhachiirembeeresya chibhe nabho kwa omwanya gwa siku etaanu na ebhiri, nichiikirisya. Nikwo kutyo ꞉chaakingire mu‑musi gwa Ruumi. 15 Abheekirisya abheejaasu Ruumi eyo, bhejire bhoongwa ati echigenda eyo, nibhaaja okuchiramirira mw‑iguriro rya Apiiyo na abhandi anu aatogwaga ati Woteeri Esatu. Pawuro ejire aabharora, ˆnaasiima Nyamuwanga, omutima gwaye nigusandabha.
Pawuro kaaraasisya Abharuumi
16 Chejire chaakinga mu‑musi gwa Ruumi, Pawuro ꞉eekirisiibhwe okubha mu‑nju yaaye omwene na omusirikare wa okumwangarira.
17 Ejire aamara awo siku esatu, ˆnaabhirikira abhakuru bha Abhayawudi bheenda‑wo. Bhejire bheekumanya, ˆnaabhabhwira ati, “Emwe abhayiri bhaani, ꞉naagwatirwe Yerusareemu, nintuurwa mu‑mabhoko ga Abharuumi, noorwo kutyo ꞉nitaakorere omusango gwonegwone omubhiibhi ku‑bhaanu bheeswe amwi okuyabhya obhusimukwa bhwa bhasaaja weeswe. 18 Abharuumi nibhambuusirisya mw‑iromero. Bhejire bhaamara nibheenda okunyiigurira, kwa okubha ꞉bhataabhwene choonechoone cha okukora niitwe. 19 Nawe Abhayawudi nibharema ati nisige okwigurirwa. Awo nindora ati ni bhusibhusi okusabhwa echiina chaani chiije chiramurwe enu ku‑Kayisaari. Nawe, ejo jitari na obhugajuro ati eneenda okusitaaka riyanga ryani. 20 Ejo nijo jaakora nibhabhirikire korereki chijaayike aamwi. Anye anu nibhoyerwe amaseega, inguru ya Kirisito unu ari bhwiyikanyo bhwa Abhayisirayeeri bhoone.”
21 Abhakuru bha Abhayawudi nibhamusubhya nibhaayikaga ati, “Eswe, chichaari okuramira inyarubha yooneyoone okusooka Yuudeya inguru yaawo. Ka wone atari‑wo woonewoone unu ꞉eejire anu okuchibhwira noorwo okwayika omusango omubhiibhi inguru yaawo. 22 Nawe eswe chaakeendere okuungwa jinu uri najo, kwa okubha chimenyere ati obhumwi bhwawo bhwa idiini obhwayikwa kubhiibhi bhuri rubhaara.”
23 Mbe, nibhaayikana na Pawuro orusuku rwa okubhugana rindi. Orusuku orwo rwejire rwakinga, Abhayawudi ꞉bheekumanyiisye bhaafu muno mu‑nju yaaye. Pawuro ˆnaabhamenyesya bhwa kisikisi inguru ya obhukama bhwa Nyamuwanga, okwambira katondo okukingira keegoro. Aariga ˆnaaregeeja okubhakora bheekirisye emisango ja Yeesu, kwa okukorera Ebhikaame Ebhyeru, ebhiraagiro bhya Muusa na ebhitabho bhya abharagi abhandi. 24 Abhayawudi abharebhe nibheekirisya emisango jaaye nawe abhandi nibhajirema. 25 Kurwa ejo, Abhayawudi abho nibhaamba okusooka‑wo bhateekirisyanyisye wuri abheene kwa abheene. Bhunu bhaariga nibhasooka‑wo, Pawuro ꞉aabhabhwiriiye ati, “Mwoyo Mweru ꞉aayikire echimari ˆnaabhwiraga bhasaaja weeswe, ku‑njira ya omuragi Iisaya ati,
26 ‘Ugende ku‑bhaanu bhanu, ubhabhwire ati,
okuungwa muryungwa, nawe mutarisombookerwa.
Okuringira muriringira, nawe mutarisombookerwa.
27 Jiribha kutyo, kwa okubha emyoyo ja abhaanu bhanu jikomeeye,
amatwi geebhwe gari na jisibhirira,
ameeso geebhwe bhagawongeresiisye.
Bhatakwenda ameeso geebhwe garore,
noorwo amatwi geebhwe goongwe,
amwi ati, emyoyo jeebhwe jisombookerwe,
bhaasiga okunyindukira nimbachungura.’b”
28 ˆNaagenderera okwayika ati, “Mbe mumenye woori ati obhuchungusi bhunu bhusookere ku‑Nyamuwanga, obhusirwa ku‑bhaanu bhanu bhatari Bhayawudi. Abheene abhaja okugenderera okubhuramira!”