Pawuro kaasirwa mu‑musi gwa Ruumi
27
1 Feesito ejire aaragirira ati chigende na ingarabha mu‑chaaro cha Yitaariya, Pawuro na abhabhoywa abhandi nibhatuurwa mu‑mabhoko ga omwangarisi wa abhasirikare. Omwangarisi oyo, aatogwaga Yuriyo, omwene aariga ari wa echise chinu chaatogwaga ati “Echise cha Awuguusito.” 2 Nichiriinya mu‑ngarabha imwi ya mu‑musi gwa Adiraamiti inu yaariga niigenda na okugobha ku‑bhigobhero bhya omukoowa gwa Asiya. Chejire chaamba orugendo rweswe, chaariga chiri aamwi na Arisitaariko, wa mu‑musi gwa Tesaroonike mu‑mukoowa gwa Makedooniya. 3 Mwejo yende‑ko, nichigobha ku‑njekekera ya omusi gwa Sidooni. Awo, Yuriyo ˆnaakorera Pawuro eja ekisi kwa okumwikirisisya abhugane na abhasaani bhaaye, korereki bhamusakire ku‑bhukene bhwaye. 4 Chejire chaasooka awo, nichigenderera na orugendo rweswe, nawe nichiyinda risinga rya Kiipuro, kwa okubha omuyaga gwariga guri gwa ebhutwe. 5 Nichitura mu‑nyanja ya omukoowa gwa Kiriikiya na ogwa Pamufiriya, nichikinga mu‑musi gwa Miira mu‑mukoowa gwa Riikiya. 6 Omwangarisi wa abhasirikare, ˆnaasongʼana awo ingarabha ya mu‑musi gwa Arekijandiriya inu yaariga niigenda mu‑chaaro cha Yitaariya, ˆnaachiriinyya omwo.
7 Nichigenderera na orugendo rweswe bhwombobhwombo kwa siku nyafu na kwa nyaako muno. Ku‑bhuteero, nichirebherera omusi gwa Niido, ku‑mbarimbari ya omukoowa gwa Asiya. Omwanya gunu omuyaga gwa ebhutwe ꞉gwachiyingiriiye, nichiyinda orubhaara rwa ebhurimbe rwa risinga rya Kireete nichituraga ayeeyi na omusi gwa Sarimoone. 8 Nichikekera ku‑mbarimbari ya Kireete kwa nyaako, nichikinga anu kaatogwa ati Rikonda rya Ekisi, ayeeyi na omusi gwa Raseeya.
9 ꞉Chaamarire siku nyafu chiri mu‑rugendo rwa mu‑nyanja. Ku‑mwanya ogwo, orugendo rwariga ruri rwa itambara, kwa okubha gwariga guri omwanya gwa omuyaga omururu na imbewo.a Niikora Pawuro akengye abhatangasya bha ingarabha abho ati, 10 “Bhamura, anye enirora ati chikagenderera na orugendo rweswe runu, oruja okuchireetera inyaako na okufwirwa‑mo. Ingarabha, emigugu, noorwo eswe abheene wone echija okusingaarika.”
11 Nawe omwangarisi wa abhasirikare oyo ꞉ateekirisiisye eja Pawuro ejo, tari ˆneekirisya emisango ja omugofi wa ingarabha na omwene ingarabha eyo. 12 Aamwi na ejo, echigobho echo chaariga chiri‑ko chaariga chiteeyire okubha‑ko omwanya gwa imbewo. Kurwa ejo, abhaanu bhaafu mu‑ngarabha nibhatema echiina ati, bhasooke awo, jikaturikana bhagende ku‑chigobho echindi kw‑isinga rya Kireete rinu eritogwa Fiinekisi. Bhabhe awo omwanya gwa imbewo ogwo, kwa okubha echigobho cha Fiinekisi echiroreerera ebhurimbe ya ebhugwa esuubha na ebhuwanga ya ebhugwa esuubha.
Pawuro na abheejaabho mu‑nyanja
13 Mbe, omuyaga gwa ekisi nigwamba okuyemba okusooka orubhaara rwa ebhurimbe. Nigukora abha ingarabha eyo okwiganirisya ati bhaabhona injira ya okugenderera na orugendo rwebhwe, rwa kutyo bhaariga bheendere. Kurwa ejo, nibheeya inanga, nibhasooka‑wo, nibhatura ku‑njekekera ya risinga rya Kireete. 14 Nawe katungu katooto okutura, niguyemba omuyaga gwa echiiwure gunu ogutogwa ati omurungu. 15 Omuyaga ogwo gwariga nigubhumabhuma ingarabha eyo. ꞉Chitaaturire okuyaajana na omuyaga omururu ogwo, kurwa ejo, nichitaatirira ingarabha nichiyeywa okuja ebhusibha. 16 Nichiyinda inyuma ya akasinga akatooto kanu kaatogwaga ati Kawuda, korereki kachisiriigisye kutooto na omuyaga omururu ogwo. Awo, nichitura kwa nyaako muno okukisya obhwato bhunu bhwariga nibhukururwa na ingarabha eyo. 17 Bhunu abhawugi abho bhaamarire okukurura obhwato obhwo na okubhutuura mu‑ngarabha, nibheeyindya ingarabha eyo jingoye, korereki isige okubhaaruka. ꞉Bhoobhayire ati ingarabha eyitura okwiroyera mu‑musenyi gwa mu‑nyanja ya echaaro cha Riibhiya, kurwa ejo, nibheesya amatanga ga ingarabha eyo, nibhayisiga iyeywe na omuyaga.
18 Mbe amakonjo nigayibhumabhuma muno ingarabha eyo. Bhwejire bhwacha abhawugi abho nibhaamba okwesa emigugu mu‑nyanja. 19 Orusuku rwa kasatu bhwejire bhwacha, nibhasoosya‑mo ebhiinu bhya okukorera emirimu mu‑ngarabha, nibhabhyesa mu‑nyanja kwa amabhoko geebhwe abheene. 20 Nijitura siku nyafu risuubha na jinjota ꞉bhitaabhonekeene, inyanja niigenderera okusaruuma muno. Niikora chiiganirisye ati ni bhusibhusi chitakwiwura omurembe.
21 Gwejire gwatura omwanya omureera bhachaari okurya ebhiryo, Pawuro ˆneemereeguru agati yeebhwe, ˆnaabhabhwira ati, “Bhamura, ku‑mwanya gurya chiri Kireete ꞉naabhabhwiriiye ati chisige okusooka‑wo, jaariga jiiyire muntegeresye. Mukantegeresiisye, ebhiinu bhyemwe bhitakasingaarikire noorwo okufwirwa‑mo kutya. 22 Woori enibheerembeeresya ati, mwikomeesye mu‑myoyo jeemwe, okubha atari‑wo noorwo umwi kw‑imwe unu kaja okufwa. Nawe ingarabha inu era niyo eyija okusingaarika. 23 Okubha anye niri muunu wa Nyamuwanga ka niwe eniramya. Reero mu‑ngeta maraayika waaye aansoromokera, ˆneemereeguru ayeeyi na anye, 24 ˆnaambwira ati, ‘Pawuro awe, waasiga okuubhaya. Okubha ni bhusibhusi wimereeguru imbere ya Kayisaari. Ka wone, abhaanu bhanu muri aamwi nabho mu‑rugendo, Nyamuwanga kaja okubhawonʼya okutura ku‑bhwitiriranya bhwaye kw‑awe.’ 25 Mbe, mwikomeesye mu‑myoyo jeemwe, kwa okubha eniikirisya ati, Nyamuwanga kaja okukora joone rwa kutyo ambwiriiye. 26 Nawe, ni bhusibhusi ingarabha isirwe kw‑isinga rirebhe.”
Pawuro na abheejaabho abheewonʼya mu‑nyanja
27 Yejire yaakinga ingeta ya orusuku rwa ekumi rimwi na ena, omuyaga omururu niguchikuura enu na erya mu‑nyanja ya Adiriiya. Mu‑ngeta eyoeyo, abhawugi abho nibheeyungwa ati bhaafogeeye ku‑chaaro. 28 Nibheesya echirengero mu‑manji, nibharora ati okukinga emwaro ni bhita makumi gabhiri. Katungu katooto okutura, nibheesya echirengero echo rindi mu‑manji, nibhabhona ebhita ekumi rimwi na bhitaanu. 29 Nibhoobhaya ati ingarabha ikeekumuuye ku‑mabhuyi, kurwa ejo nibheesa jinanga ena mu‑manji inyuma yaayo. Bhaasabhwaga ati bhuche bhwangu.
30 Awo abhawugi nibharegeeja okwiruka okusooka mu‑ngarabha. Nibheesya obhwato mu‑manji, nibheekoraga wuti abheenda okusikya jinanga orubhaara rwa imbere ya ingarabha. 31 Awoawo Pawuro ˆnaabhwira omwangarisi wa abhasirikare, aamwi na abhasirikare bhaaye ati, “Abhawugi bhanu, araabha bhatakuja okusigara aamwi na eswe mu‑ngarabha munu, mbe mutakuwona.” 32 Niwo abhasirikare abho nibhatema jingoye jinu jaariga jibhoyeeye obhwato obhwo, nibhabhusiga bhuyeywe mu‑nyanja.
33 Oruguru rwejire rwatema, Pawuro ˆnaabhakomeeresya bhoone bharye ebhiryo, ˆnaayikaga ati, “Reero mwamara siku ekumi rimwi na ena muyayire, chitari‑wo echiinu choonechoone chinu mwariiye. 34 Kurwa ejo enibheerembeeresya ati, murye korereki mugenderere okubha bhaanga. Okubha atari‑wo umwi weemwe unu kaja okubhusya noorwo orufwiri rumwi rwa ku‑mutwe gwaye.” 35 Ejire aamara okwayika kutyo, ˆnaagega omukaate, ˆnaasoosya risiima ku‑Nyamuwanga imbere yeebhwe bhoone, ˆnaagubheganya, ˆnaamba okurya. 36 Awoawo abho bhoone nibheekomeesya, nibharya. 37 Bhoone bhanu chaariga chiri mu‑ngarabha, chaariga chiri abhaanu magana gabhiri, makumi gataanu na gabhiri na bhataanu na umwi (276). 38 Bhejire bhaarya nibhabha‑mo kisi, nibheesa emigugu ja obhuro mu‑nyanja.
39 Risuubha ryejire ryawuruka, abhawugi ꞉bhataamenyere echaaro chirya, nawe ꞉bhaarorere rikonda rya isenyi. Nibharamura ati, bhasige ingarabha igobhe ku‑njekekera eyo, araabha jikaturikana. 40 Nibhateejurira jidemaani ja jinanga, nibhajisiga mu‑manji, na omwanya ogwoogwo nibhasuruumura ingobhero. Nibhayeema ritanga rya imbere korereki omuyaga guyisembesye ku‑njekekera. 41 Nawe ingarabha eyo yejire yaafogera imbere kutooto, orurimi rwayo nirwiroyera kwa amanaga ku‑mukungu isige okusingisibhwa. Iseji yaayo niibhumwabhumwa na amakonjo kwa amanaga, niyamba okubhaaruka bhibhaarabhaara.
42 Abhasirikare nibhakora echiina okwita abhabhoywa bhoone, korereki bhaasiga okuwuga okuja ku‑chaaro na okwiruka. 43 Nawe omwangarisi weebhwe aariga atakwenda Pawuro eetwe, ˆnaabhagaanya. ˆNaaragirira ati bhanu abhamenya okuwuga bheeyese mu‑manji, korereki bhaje ku‑chaaro. 44 Abhandi bhanu ꞉bhaasigaaye bhataamenya okuwuga, nibhaambukira ku‑mbawu, amwi ku‑bhibhaara bhya ingarabha. Kutyo nikwo bhoone ꞉bhaambukire bhari bhaanga.