Pawuro keebhagira imbere ya Agiriipa
26
1 Feesito ejire aamara, niwo Agiriipa ˆnaabhwira Pawuro ati, “Owikirisibhwa okwibhagira.” Pawuro ˆneenamusya okubhoko okwibhagira, ˆnaayikaga ati, 2 “Mukama Agiriipa awe, reero eniiyungwa ati, niri na ribhando okwimereeguru imbere yaawo okwibhagira inguru ya joone jinu Abhayawudi abhansitaakira. 3 Enaayika kutyo, kwa okubha awe umenyere kisikisi jitungwa na jimamba joone ja Abhayawudi. Kurwa ejo, enikwirembeeresya untegeresye kwa obhwigumiirisya.4 “Abhayawudi bhoone abhamenya kisi obhurame bhwani, kutyo ꞉neekaaye okwambira ku‑bhurera bhwani mu‑chaaro chaani na Yerusareemu erya. 5 Abheene bhaammenyere kisi kwa emiguuga myafu. Bhaakeenda abhatura okusoosya obhubhambaasi ati anye naariga niri Omufarisaayo. Abhafarisaayo nibho abharuubha obhutinge okukira obhumwi bhwone bhwa idiini yeeswe. 6 Woori niri anu okuramurwa kwa ebhiraagiro, inguru ya obhwiyikanyo bhwani ku‑murago gunu Nyamuwanga ꞉aaragire bhasaaja weeswe. 7 Omurago ogwo, noorwo abhaanu bha jingʼanda jeeswe ekumi na ebhiri abheeyikanya ati Nyamuwanga aribhakuumisisya. Niyo isonga abhamuramya mu‑ngeta na mu‑mwisi. Mukama awe, obhwo nibhwo obhwiyikanyo bhwani bhunu obhukora Abhayawudi bhansitaake reero! 8 Mbawo emwe mutakwikirisya ati Nyamuwanga kaasuurura abhafuuwe?
9 “Chimari, anye omwene naaroraga mu‑mutima gwani ati yaariga iri bhusibhusi nikore emisango myafu, korereki okuyaajana na risiina rya Yeesu Omunajareeti. 10 Ejo nijo naakoraga Yerusareemu eyo. Naatuuraga abheeru bhaafu mu‑mabhoyero kwa obhuturo bhwa abhakuru bha abhagabhisi. Omwanya gunu bheetwaga, neekirisyaga ati bheetwe. 11 Omwanya omwafu, naaragiriraga ati, bhabhumwe mu‑nju joone ja ameekofyanyo, naabhasinyirisyaga bheefumirisye risiina rya Yeesu. Naabhasokaga muno, okukingira okubhayenja noorwo mu‑misi ja mu‑bhyaro ebhindi korereki nibhanyaasye.
12 “Mbe, orusuku rumwi naariga niri ku‑njira okuja mu‑musi gwa Damaasiko okukora emirimu ejo. Naariga nikirisiibhwe na okuragirirwa na abhakuru bha abhagabhisi. 13 Omukama awe, omwanya gwa mu‑mwisi, awoawo nindora obhweru okusooka mu‑rwire nibhungʼarabhya okukira risuubha, nibhunsingira mbaara joone, anye aamwi na abheejaasu. 14 Eswe bhoone nichigwa aasi, anye ninuungwa obhuraka nibhumbirikira mu‑nyaayika yaasu ya Echiyebhuraniya ˆnaayika ati, ‘Saawuri awe! Saawuri awe! Ni kurwa ki owunnyaasya? Kukomeeye awe okubhara kw‑ichumu na okuguru kwawo!’
15 “Niwo, nimubhuusya ati, ‘Raatabhugenyi awe, naawe ga?’ ˆNaansubhya ati, ‘Anye naanye Yeesu, unu awe owunnyaasya. 16 Woori iimuka, wimereeguru! Okubha naakusoromokera korereki ubhe omukosi waani, usoosye obhubhambaasi ku‑jinu waarora reero na jirya nirikweresya. 17 Enija okukuwonʼya okusooka mu‑mabhoko ga Abhayawudi bheejaanyu na mu‑mabhoko ga abhaanu bhanu bhatari Bhayawudi bhanu enikutuma‑ko. 18 Ubheegure ameeso, bhasooke mu‑chisuute bheengire mu‑bhweru. Ka wone bhasooke mu‑mabhoko ga Syetaani,a bhayindukire Nyamuwanga, korereki kwa okwikirisya, bhafwirwe echigongo ebhibhiibhi bhyebhwe, bhabhe aamwi na abheeru abhandi bhoone.’
19 “Kurwa ejo, omukama Agiriipa awe, yaariga iri bhusibhusi kw‑anye okugayuka amaragiriro ga ebhiroro bhinu bhisookere mu‑rwire. 20 ꞉Naaraasisiisye okwamba abhaanu bha Damaasiko eyo na Yerusareemu na echaaro choone cha Yuudeya, ka wone ꞉naakingiiye abhaanu bhanu bhatari Bhayawudi. Naabhakomeeresyaga ati, bhate ebhibhiibhi bhyebhwe, bhayindukire Nyamuwanga. Ka wone okuta kwebhwe kweresibhwe na ebhikorwa bhyebhwe. 21 Ejo nijo ꞉jaakorere Abhayawudi nibhangwata omwanya gunu ꞉bhaansongʼeene mw‑Iyekaru, nibharegeeja okunyita. 22 Nawe, Nyamuwanga ꞉aansakiiye okukingira orusuku rwa reero. Akorere niniimereeguru anu imbere ya abhaanu bhoone, abhakuru na abharera, korereki okusoosya obhubhambaasi. Emisango jinu enaayika, nijo jirya era Muusa na abharagi abhandi ꞉bhaayikire ati jirikorekana. 23 Bhoone abho ꞉bhaayikire ati, Kirisito jeenderwe anyaasibhwe na aribha wa okwamba okusuuruka okusooka mu‑bhafuuwe, korereki areete obhweru bhwa omweruro ku‑Bhayawudi na ku‑bhanu bhatari Bhayawudi wone.”
24 Omwanya gunu Pawuro aagendereraga okwibhagira, Feesito ˆnaayika kwa obhuraka obhunene ati, “Pawuro awe! Kasi uri musasi! Okusoma kwawo kwafu nikwo kukuyaaye orusaro!”
25 Pawuro ˆnaamusubhya ati, “Ee Feesito wa echibharo, anye nitasarire. Emisango jinu enaayika ni ja echimari na ni ja obhwengeeso. 26 Omukama wone kaajimenya kisi. Niyo isonga enitura okwiyeresya kwa ribhaasi imbere yaaye. Gutari‑wo noorwo omusango gumwi gunu atamenyere, kwa okubha jaariga jitakukorekana mu‑mbisike. 27 Mukama Agiriipa awe, owujiikirisya jinu ꞉jaayikirwe na abharagi? Anye enimenya ati owujiikirisya.”
28 Neeya Agiriipa ˆnaasubhya Pawuro ati, “Owitogera ati kwa emisango jaawo emityari jinu, owutura okunkora nibhe Omukirisito?” 29 Pawuro ˆnaamusubhya ati, “Jikabha emisango emityari, amwi emyafu, enisabhwa Nyamuwanga inguru yaawo na inguru ya abhaanu bhoone bhanu abhantegeresya reero ati mubhe rwa kutyo niri, nawe musige okubhoywa na amaseega ganu.”
30 Awo omukama ˆneemereeguru, aamwi na omusiibha Feesito na Bherinike, na abhandi bhanu bhaariga bheenyanjire aamwi nabho. 31 Bhejire bhaasooka awo, nibhaayikana ati, “Omuunu unu, atakukora gwonegwone gunu gwiyire eetwe, noorwo okubhoywa.” 32 Agiriipa ˆnaabhwira Feesito ati, “Omuunu unu akaturire okwigurirwa, nawe itakuturikana, kwa okubha akenere echiina chaaye chiramurwe na Kayisaari.”