Pawuro keebhagira imbere ya omusiibha Feesito
25
1 Feesito ejire aamara siku esatu era mu‑mukoowa gwa Yuudeya, ˆnaasooka Kayisaariya, ˆnaariinya okugenda Yerusareemu. 2 Abhakuru bha abhagabhisi na abhakuru abhandi bha Abhayawudi nibhamumenyesya joone jinu jaariga nijikora nibhasitaaka Pawuro. 3 Nibhamwirembeeresya ati abhasakire, abhasubhisye Pawuro Yerusareemu awo, omwanya ogwo bhari na iniku ya okwita Pawuro mu‑njira. 4 Feesito ˆnaabhasubhya ati, “Pawuro ari mw‑ibhoyero Kayisaariya eyo, anye omwene enija‑yo siku jitari nyafu. 5 Abhakuru bheemwe bhaaje chigende aamwi, bhaje okumusitaaka araabha ni chimari guri‑wo omusango omubhiibhi gunu akorere.”6 Mbe, jejire jaatura siku etaanu na esatu amwi ekumi kutya, Feesito ˆnaasubha Kayisaariya. Bhwejire bhwacha, ˆneenyanja ku‑chitebhe chaaye cha indamu mw‑iromero, ˆnaaragirira ati Pawuro areetwe imbere yaaye. 7 Pawuro ejire aakinga awo, Abhayawudi bhanu bhaariga bhasookere Yerusareemu, nibhamwiyinda nibhaamba okumusitaaka inguru ya amabhiibhi maafu ga okuruguusya. Nawe ꞉bhaataamiibhwe okweresya echimari chaago.
8 Niwo Pawuro ˆnaamba okwibhagira ˆnaayikaga ati, “꞉Nitaakorere chiinu choonechoone cha okunyamura ebhiraagiro bhya Abhayawudi, ꞉nitaakayire inguru ya Riyekaru noorwo inguru ya Kayisaari.”
9 Feesito aariga ˆneenda okwikondya ku‑Bhayawudi, kurwa ejo ˆnaabhuusya Pawuro ati, “Angu owikirisya okuriinya Yerusareemu korereki uramurwe eyo imbere yaani inguru ya echiina chinu?”
10 Pawuro ˆnaamusubhya ati, “Anye enimereeguru imbere ya echitebhe cha indamu chinu chiteeywe‑wo na Kayisaari, na niwo anuanu niiyire niramurwe. Awe omwene umenyere ati, gutari‑wo omusango gunu nikayire ku‑Bhayawudi. 11 Araabha nikorere echikayo chinu chiiyire okwitwa, nitakutura okurema okwitwa. Nawe araabha emisango jinu Abhayawudi bhanu abhansitaakira jitari ja echimari, atari‑wo woonewoone unu ari na obhuturo bhwa echiraagiro bhwa okuntuura mu‑mabhoko geebhwe. Anye enikena echiina chaani chiramurwe na Kayisaari!”a
12 Mbe, Feesito ˆnaayikana na abhaanu bha ribharaja ryaye, ejire aamara, ˆnaasubhya Pawuro ati, “Waasabhwa echiina yaawo chiramurwe na Kayisaari, ambe owuja okusirwa ku‑Kayisaari.”
Feesito kaatondera omukama Agiriipa inguru ya Pawuro
13 Jejire jaatura siku nooto, omukama Agiriipab aamwi na Bherinike omuyara waabho nibhaaja Kayisaariya awo okukeesya Feesito. 14 Bhunu ꞉bhaabheeye awo siku ndebhe, Feesito ˆnaatondera omukama Agiriipa emisango ja Pawuro, ˆnaamubhwira ati, “Ari‑wo omuunu umwi anu, Feeriki ꞉aamusigire mw‑ibhoyero. 15 Omwanya gunu naariga niri Yerusareemu, abhakuru bha abhagabhisi aamwi na abhakuru bha Abhayawudi ꞉bhaantondeeye emisango jinu bhaariga nibhamusitaakira na nibhansabhwa ati nimuramure. 16 Nimbasubhya ati, ‘Eswe Abharuumi chitakuramura omuunu achaari okuyaanwa omwanya gwa okwibhagira imbere ya bhanu abhamusitaaka.’
17 “Mbe, bhejire bheekumanya anu, ꞉nitaakoorere wuri. Orusuku rwa kabhiri niniinyanja ku‑chitebhe cha indamu mw‑iromero, nindagirira omuunu oyo areetwe. 18 Bhejire bhaamureeta, bhanu bhaariga nibhamusitaaka nibheemereeguru, nibhaamba okumusitaaka. Nawe emisango jinu ꞉bhaayikire jaariga jitari mibhiibhi rwa kutyo neetogeraga. 19 Tari bhaariga nibhabhambasyanya nage inguru ya amabhuusyo ga idiini yeebhwe era na inguru ya omuunu umwi unu ꞉aafuuwe, risiina ryaye aatogwaga Yeesu. Nawe Pawuro kaayika ati omuunu oyo ni muwanga. 20 ꞉Nitaamenyere ogwa okukora korereki nisoosye indamu ya echimari inguru ya omusango ogwo. Kurwa ejo nimbuusya Pawuro araabha keekirisya okugenda Yerusareemu, korereki agende aramurwe eyo inguru ya emisango jinu. 21 Nawe Pawuro ejire aasabhwa ati echiina chaaye chiramurwe na Kayisaari, nindagirira aangarirwe okukingira omwanya gunu nirimusira ku‑Kayisaari.”
22 Agiriipa ˆnaabhwira Feesito ati, “Anye wone eneenda okutegeresya omuunu oyo.” Feesito ˆnaamusubhya ati, “Mbe, owuja okumutegeresya mutondo.”
Pawuro imbere ya omukama Agiriipa
23 Bhwejire bhwacha, Agiriipa aamwi na Bherinike, nibhaaja na rikonderwa. Nibheengira mw‑ibharaja munu abhaanu bheekumanyisyaga, aamwi na abhakuru bha abhasirikare na abhakuru abhandi bha mu‑musi. Feesito ˆnaaragirira Pawuro areetwe, ˆnaareetwa. 24 Awo Feesito ˆnaayika ati, “Ee omukama Agiriipa na emwe bhoone bhanu chiikumanyiisye aamwi anu omurora omuunu unu. Abhayawudi bhoone bha Yerusareemu eyo na Kayisaariya anu, abheenda nibhasakire okuramura omuunu unu, abhamwaya nibhaayika ati, omuunu unu ateeyire okusigara‑mo omwoyo.
25 “Nawe anye ꞉naarorere ati, atakorere choonechoone cha okwiya indamu ya orufu. ˆNaasabhwa ati Kayisaari niwe ategeresye echiina chaaye, kurwa ejo nindamura okumusira eyo. 26 Aamwi na ejo, nitari na omusango gwa echimari inguru yaaye gwa okukaamira Kayisaari. Niyo isonga naamureeta anu imbere yaawo omukama Agiriipa na emwe bhoone, korereki chikamara okumubhuusirisya, niwo nibhone omusango gwa okukaama inguru yaaye. 27 Okubha echibha chiruguusyo, nikasira omubhoywa nitakaamire kisikisi echiina chinu echikora ˆnaasitaakibhwa.”