Pawuro imbere ya Feeriki
24
1 Jejire jaatura siku etaanu, omugabhisi omukuru Ananiiya, ˆnaatebhera okusooka Yerusareemu okuja mu‑musi gwa Kayisaariya, ari aamwi na abhakuru abharebhe bha Abhayawudi. Aariga ari‑wo na omubhagisi wa ebhiraagiro unu aatogwaga Teerituro. Abho bhoone ꞉bhaagendere okusitaaka Pawuro ku‑musiibha Feeriki. 2 Pawuro ejire aabhirikirwa mw‑iromero, Teerituro ˆnaamba echiina chaaye, ˆnaayikaga ati, “Ee Feeriki wa echibharo, eswe Abhayawudi, echikondererwa omurembe na amagenderero maafu ganu agakorwa mw‑iyanga ryeswe munu. Ejo joone jikorekeene kwa obhuturo bhwawo bhwa okurora emisango jinu jichaari imbere. 3 Ee omusiibha Feeriki, omwanya gwone na bhuri orubhaara, echiikirisya obhutungi bhwawo kwa esiima muno. 4 Nawe, nitakwenda okubhusya omwanya gwawo mwafu, kurwa ejo, enikwirembeeresya kwa obhwigumiirisya bhwawo utegeresye kwa omwanya mufuyi emisango jeeswe jinu chiri najo.5 “Chaarora ati omuunu unu ni murangirangi kwa okubha kaakungirisya Abhayawudi bhasokane abheene kwa abheene mu‑bhyaro bhyone. Omwene wone ni mutangasya wa idiini ya orubheeyi ya Abhanajareeti.a 6 Ka wone ꞉aaregeejere okukora obhunyamuke kwa okwingisya omuunu unu atari Muyawudi mw‑Iyekaru, kurwa ejo nichimugwata. [꞉Cheendere okumuramura okuruubhana na ebhiraagiro bhyeswe. 7 Nawe omukuru wa abhasirikare Riisiya, ˆnaaja ˆnaamugega okusooka kw‑iswe kwa amanaga maafu, 8 na okuragirira bhanu abhamusitaaka bhaaje bhamusitaake kw‑awe.] Woori, awe omwene ukamubhuusirisya, owutura okumenya ati emisango joone jinu ejikora chimusitaake ni ja echimari.” 9 Niwo Abhayawudi bhoone bhanu bhaariga bhari arya, nibheekirisya okweresya ati emisango joone jinu Teerituro aayikaga jaariga jiri ja echimari.
10 Niwo omusiibha Feeriki ˆnaawungisya Pawuro okubhoko korereki eebhagire. Pawuro ˆnaayika ati, “Omusiibha Feeriki, enimenya ati ubheeye omuramusi mw‑iyanga munu kwa emiguuga myafu, kurwa ejo, eniibhagira imbere yaawo kwa rikonderwa. 11 Awe omwene owutura okwikirisya ati, jichaari okusaaga siku ekumi na ebhiri okusookerera bhunu ꞉naagendere okuramya Nyamuwanga Yerusareemu erya. 12 Abhatangasya bha Abhayawudi ꞉bhataansangire nimbambasyanyaga na omuunu woonewoone mw‑Iyekaru, amwi ninkungirisyaga echise cha abhaanu mu‑nju jeebhwe ja ameekofyanyo noorwo orubhaara rwonerwone rwa omusi gurya. 13 Ka wone bhatakutura okweresya abhwerubhweru ati emisango jinu ejikora bhansitaake ni ja echimari.
14 “Nawe, eniikirisya imbere yaawo ati, anye eniramya Nyamuwanga wa bhasaaja weeswe, kwa okuruubhirisya Injira ya Yeesu inu abhatangasya bha Abhayawudi abhayitoga ati, ni idiini ya orubheeyi. Eniikirisya bhuri echiinu chinu chiri mu‑bhiraagiro bhya Muusa na mu‑bhikaame bhya abharagi. 15 Anye niri na obhwiyikanyo ku‑Nyamuwanga ati, arisuurura abhafuuwe bhoone, abha rirenga na bhanu bhatari abha rirenga. Noorwo abheene wone abhagwikirisya ogwo. 16 Kurwa ejo, eniikomeesya siku joone okubha na omutima omweru imbere ya Nyamuwanga na imbere ya abhaanu.
17 “Mbe, emiguuga ꞉jaaturire myafu ꞉niteejire Yerusareemu. Nejire neeya niniija korereki nireete obhusakisi ku‑Bhayawudi bheejaasu abhataka na okusoosya echitambwa ku‑Nyamuwanga. 18 Ejo nijo naakoraga omwanya gunu ꞉bhaansongʼeene mw‑Iyekaru. Naariga naakorere obhutinge bhwa idiini bhwa okwiyesya. Naariga nitari na echise, noorwo yaariga itari‑wo injogere. Nawe bhaariga bhari‑wo na Abhayawudi abharebhe okusooka Asiya. 19 Abho wone bheenderwe bhabhe‑wo anu korereki bhansitaake ku‑musango gwonegwone gunu bhari nagwo kw‑anye. 20 Amwi abhaanu bhanu bhari anu bhaayike, ni bhubhiibhi ki bhunu ꞉bhaabhwene kw‑anye bhejire bhaanyimereegusyu imbere ya ribharaja rikuru ryebhwe. 21 Tari ni inguru ya omusango gumwi era, gunu ꞉naamwayiiye inguru imbere yeebhwe ati, ‘Anye eniramurwa imbere yeemwe reero, kwa okubha eniikirisya ati abhafuuwe bharisuuruka.’”
22 Mbe Feeriki unu aariga ˆnaasombookerwa kisi emisango ja Injira ya Yeesu, ˆnaaraga riromero rirya ˆnaabhabhwira ati, “Omwanya gunu Riisiya omukuru wa abhasirikare ariija enu, niwo nirisoosya indamu inguru ya echiina cheemwe.” 23 Niwo Feeriki ˆnaaragirira omwangarisi wa abhasirikare arinde Pawuro, nawe amuyaane obhwitaage na abhasaani bhaaye, bhabhe nibheekirisibhwa okumusakira mu‑bhukene bhwaye.
Pawuro kaaroma na Feeriki na Durusiira
24 Jejire jaatura siku nooto, Feeriki ˆnaaja na omugasi waaye Durusiira unu aariga ari Omuyawudigasi. Mbe, Feeriki ˆnaatuma abhaanu bhabhirikire Pawuro. Omwanya gunu Pawuro ꞉eejire, Feeriki ˆnaamba okumutegeresya, ˆnaayikiraga inguru ya okwikirisya Kirisito Yeesu. 25 Omwanya gunu Pawuro ꞉aayikire inguru ya obhurengeresi, okwiyingirira na inguru ya orusuku runu Nyamuwanga ariramura bhuri muunu. Feeriki ˆnoobhaya, ˆnaayika ati, “Woori, nuugende. Nikabhona omwanya enija okukubhirikira rindi.” 26 Feeriki eeyikanyaga ati Pawuro akamuyaaye amasooya ga jipirya. Kurwa ejo, aamubhirikiraga okwiya kaafu na okwayika nage.
27 Jejire jaatura emiguuga ebhiri, omuunu umwi unu aatogwaga Porokiiyo Feesito, ˆneengira ku‑chitebhe cha omusiibha Feeriki. Nawe kwa okubha Feeriki aariga ˆneenda okwikondya ku‑Bhayawudi, ˆnaasiga Pawuro ari mw‑ibhoyero.