Okubhuurana agati ya abheekirisya
6
1 Araabha owumwi agati yeemwe ari na risitaaka inguru ya omwikirisya oweejaabho, kaayaara kutiki okusira risitaaka ryaye ku‑bhaanu bhanu bhatari bheekirisya, ˆnaasiga okurisira ku‑bhaanu bha Nyamuwanga? 2 Mutakumenya ati emwe abhaanu bha Nyamuwanga neemwe muriramura echaaro chinu? Woori, araabha emwe muriramura echaaro chinu, kurwa ki mutaamiibhwe okuramura echiina echaangu agati yeemwe? 3 Mutakumenya ati chiriramura noorwo bhamaraayika? Araabha nikwo kutyo jiri, mbe, omukenwa mumare emisango ja obhurame bhwa bhuri rusuku. 4 Woori, omwanya gunu omuyomba inguru ya emisango ja bhuri rusuku, mbawo omugenda okusitaaka ku‑bhaanu bhanu bhateeyire mw‑ikanisa korereki nibho bhabharamure? 5 Enaayika kutyo korereki murore jiswaro. Angu, agati yeemwe atari‑wo noorwo omuunu umwi owa obhwengeeso, unu kaatura okutema echiina agati ya abheekirisya? 6 Nawe emwe, muri na itungwa ya omuunu okusitaaka omwikirisya oweejaanyu mw‑iramuriro, ka wone ku‑bhaanu bhanu bhatari bheekirisya!7 Okusitaakana okwo okweresya ati mwataamibhwa chimwi. Ni akiri, okwikirisisya omuunu abhateesye amwi abhasaakure ribhona ryemwe. 8 Nawe woori emwe, neemwe omuteesya abhaanu na okubhasaakura ribhona ryebhwe, ka wone omukora ejo ku‑bheekirisya abheejaanyu! 9 Mutakumenya ati abhajabhi bhatariingira mu‑bhukama bhwa Nyamuwanga? Mwasiga okwijiga! Abhasengani, abhaanu bhanu abharamya amasusano, abharomesi, noorwo abhasambukani, 10 abheefi, bha omuruuru, abhakorwa, abhasokanya, abhasaakusi, abho bhoone bhatariingira mu‑bhukama bhwa Nyamuwanga. 11 Abhandi agati yeemwe bhaariga bhari kutyo. Nawe woori, kwa okutura ku‑Raatabhugenyi weeswe Yeesu Kirisito, na ku‑managa ga Mwoyo wa Nyamuwanga weeswe, mwosibhwa obhujabhi bhwemwe, mwesibhwa, na okubharwa ati muri bharengeresi imbere ya Nyamuwanga.
Abheekirisya bhakusye Nyamuwanga mu‑mibhiri jeebhwe
12 Abhaanu abhandi agati yeemwe abhaayika ati, “Chiikirisiibhwe okukora bhuri chiinu chinu echeenda.” Nawe anye enaayika ati, jitari ati emisango joone jiri na omuriiro. Ka wone abhaayika ati, “Chiikirisiibhwe okukora bhuri chiinu chinu echeenda.” Nawe anye nitakuja okubha omugaya wa omusango gwonegwone. 13 Abhandi agati yeemwe abhaayika ati, “Ebhiryo ni inguru ya inda, na inda ni inguru ya ebhiryo.” Nikwo kutyo jiri, nawe Nyamuwanga arinyamura bhyone bhibhiri. Omubhiri ꞉gutaabhumbirwe inguru ya okukora obhuromesi, tari inguru ya okukorera Raatabhugenyi emirimu, Raatabhugenyi omwene niwe kaangarira omubhiri. 14 Ka wone, Nyamuwanga arichisuurura kwa amanaga gaaye, rwa kutyo ꞉aasuuruuye Raatabhugenyi okusooka mu‑bhafuuwe.
15 Mutakumenya ati emibhiri jeemwe, ni bhiwuga bhya omubhiri gwa Kirisito? Woori, nigege omubhiri gwani, gunu guri chiwuga cha omubhiri gwa Kirisito, na okugugwatanya na omubhiri gwa omugasi unu keegusya okwibhonera ribhona? Wuri, noorwo na akatyari! 16 Mutakumenya ati omuunu woonewoone unu kaagwatana na omugasi unu keegusya okwibhonera ribhona, oyo kaabha omubhiri gumwi nage? Jiri rwa kutyo jikaamirwe mu‑Bhikaame Ebhyeru ati, “Abho ku‑bhubhiri bhwebhwe bharibha omubhiri gumwi.”a 17 Nawe omuunu woonewoone unu kaagwatana na Raatabhugenyi, kaabha mwoyo gumwi nage.
18 Kurwa ejo mwiyangarire mwasiga okukora obhuromesi. Ebhibhiibhi ebhindi bhyone, omuunu kaabhikora anja ya omubhiri gwaye, nawe omuunu unu kaaromera, oyo kaakora ebhibhiibhi inguru ya omubhiri gwaye omwene. 19 Mutakumenya ati, emibhiri jeemwe nijo riyekaru rya Mwoyo Mweru unu Nyamuwanga ꞉aabhayaaye, ka wone Mwoyo Mweru eekaaye mu‑myoyo jeemwe? Kutyo, emibhiri ejo jitari jeemwe, tari ni ja Nyamuwanga, 20 kwa okubha ꞉mwagurirwe kwa obhugusi obhurambu. Kutyo mukusyega Nyamuwanga mu‑mibhiri jeemwe.