Obhuromesi bhutakwendwa agati ya abheekirisya
5
1 Chimari emisango jiswireene ati, agati yeemwe bhuri‑mo obhusengani. Obhusengani rwa obhwo bhuchaariga okukorekana noorwo ku‑bhanyamanga. Ni muunu okuribhata na mukasemwene. 2 Kurwa ki emwe omwikuuya? Ni akiri mukasurumbaaye na okusoosya agati yeemwe omuunu unu kaakora ejo! 3 Noorwo kutyo anye niri kura na emwe, nawe niri aamwi na emwe echinyamwoyo, na naamarire okuramura omuunu oyo. Ogwo nigwo naakakorere, araabha naakabheeye niri eyo. 4 Omwanya gunu omwikofyanya kw‑isiina rya Raatabhugenyi weeswe Yeesu, anye enibhaga aamwi na emwe echinyamwoyo, na amanaga ga Raatabhugenyi weeswe Yeesu wone agabhaga aamwi na emwe. 5 Musoosye omuunu oyo agati yeemwe na mumusige mu‑bhutungi bhwa Syetaani,a korereki obhusimukwa bhwaye bhwa echibhiibhi bhunyamurwe,b na omwene achungurwe orusuku rwa okusubha Raatabhugenyi Yeesu.6 Orwikuuya rwemwe rutari rwa kisi. Mutakumenya ati echifwimbya chitooto era, echisangʼarasya echirengo choone? 7 Kutyo mwiyesyega, ku‑njira ya okusoosya omuunu omujabhi oyo agati yeemwe, rwa okusoosya‑wo echifwimbya cha kara. Awo niwo muribha abhaanu abhayaaya, rwa echirengo echiyaaya chinu chitari na echifwimbya. Nikwo kutyo mwamarire okubha, kwa okubha Kirisito, omwana wa inaama weeswe wa Okwambuka,c aamarire okusoosibhwa okubha echoogod korereki achichungure. 8 Woori, chaasiga okukora ichikukuru ya Okwambuka kwa echifwimbya cha kara, nikwo okwayika ati kwa obhunyamuke na obhubhiibhi, tari chiikore kwa emikaate jinu jitakutuurwa‑mo echifwimbya,e nikwo okwayika ati mu‑mutima gwa ekisi na mu‑chimari.
9 Ku‑nyarubha inu ꞉naabhakaamiiye, ꞉naabhabhwiriiye ati, mwasiga okusangira aamwi na abharomesi. 10 Obhugajuro bhwani bhwariga bhutari ati, mwasiga okusangira aamwi na abhaanu bhanu bhatari bheekirisya bhanu bhari bharomesi, abha omuruuru, abhasaakusi, noorwo bhanu abharamya amasusano. Naakaayikire kutyo, jikabheeyire okusooka ku‑chaaro kunu. 11 Tari, chinu ꞉neendere okwayika ni ati, mwasiga okusangira aamwi na omuunu unu keetoga omwikirisya, keenu ari muromesi, wa omuruuru, noorwo unu kaaramya amasusano, amwi omusokanya, amwi omukorwa, amwi omusaakusi. Omuunu rwa oyo, mwasiga noorwo okurya aamwi nage.
12-13 Mbe woori, gutari murimu gwani okuramura bhanu bhatari bheekirisya. Abho Nyamuwanga omwene niwe aribharamura. Nawe emwe mwiyire okuramura bhanu bhari mw‑ikanisa, rwa kutyo jikaamirwe mu‑Bhikaame Ebhyeru ati, “Mubhirimye omuunu omubhiibhi asooke mw‑imwe.”f