Emirimu ja jitumwa
4
1 Abhaanu bhachibhare ati eswe chiri bhakosi bha Kirisito, chiyaaywe emirimu ja okuraasya obhutinge bhwa imbisike ya Nyamuwanga bhunu bhwariga bhubhisirwe. 2 Woori, omuunu unu ayaaywe emirimu, keendwa abhe omukosi omwiyikanyibhwa. 3 Nawe kw‑anye, chitari chiinu nikaramurwa na emwe, noorwo nikaramurwa na abharamusi bha mw‑iramuriro. Ka wone noorwo anye omwene nitakwiramura, 4 kwa okubha nitakurora echikayo choonechoone mu‑mwoyo gwani. Nawe okwo kutari kwayika ati niri murengeresi. Raatabhugenyi Yeesu niwe kaandamura. 5 Woori, mwasiga okuramura abhaanu omwanya guchaari kukinga, rindirira okukingira orusuku runu Raatabhugenyi Yeesu ariija. Omwene niwe arituura abhweru ebhiinu bhyone bhinu bhibhisirwe mu‑chisuute na okweresya bhinu bhiri mu‑myoyo ja abhaanu. Niwo bhuri muunu aribhona jikuma jinu jimwiyire, okusooka ku‑Nyamuwanga.6 Abhayiri bhaani mu‑riikirisya, naayika emisango ejo joone inguru yaani na Apooro, korereki chibhe echijekekanyo kw‑imwe. Okuruubhana na echijekekanyo echo, musombookerwe jinu ejaayikwa mu‑nyaayika inu ati, “Mwasiga okusaagirisya jinu ꞉jaakaamirwe mu‑Bhikaame Ebhyeru.” Araabha omuruubha inyaayika eyo, ataribha‑wo omuunu woonewoone unu arikuuyisya omuunu umwi na okugaya owundi. 7 Woori, niga unu aakukora ubhe omukuru muno okukira owundi? Ni chiinu ki chinu uri nacho chinu utayaaywe na Nyamuwanga? Araabha uyaaywe, kurwa ki owikuuya wuti utayaaywe?
8 Woori omwirora ati mwigutire! Omwirora ati muri bhaniibhi! Omwirora ati muri bhakama, noorwo kutyo eswe chitari bhakama! Ni akiri mukabheeye abhakama chimari, korereki eswe chitunge aamwi na emwe! 9 Nawe enirora ati Nyamuwanga achikorere eswe jitumwaa okubha abhaanu bha okugaywa okukira bhoone. Chiri rwa abhaanu bhanu bharamuuywe okwitwa. Chikorerwe rwa abhaanu bha okusekwa ku‑chaaro, ku‑bhamaraayika na ku‑bhaanu. 10 Abhaanu bhaafu abhachirora ati chiri bhamuumu, kwa okubha echikorera emirimu Kirisito, nawe emwe omwirora ati muri abha obhwengeeso kwa okubha omuruubha Kirisito. Eswe echibhonekana ati chiri bhajorobhoke, nawe emwe omwirora ati muri na amanaga. Eswe echigaywa, nawe emwe omwirora ati muri na echibharo. 11 Noorwo woori kutya, chiri na omweko na obhwiro bhwa amanji, echiyenga tuyu, echibhumwa ebhifuufi, ka wone chitari na obhwikaro. 12 Echikora emirimu jeeswe kwa okwikomeesya muno kwa amabhoko geeswe abheene. Omwanya gunu abhaanu abhachifuma, echibhasabhirwa amabhando. Omwanya gunu abhachinyaasya, echiigumiirisya. 13 Omwanya gunu abhachaayika kubhiibhi, eswe echibhaayika kisi. Noorwo woori, echikorwa rwa ifwere ya echaaro, na ku‑bhuri muunu eswe chiri bhujabhi.
14 Nitakubhakaamira emisango jinu okubhaswasya, tari eneenda okubhakengya rwa abhaana bhaani abheendwa, 15 kwa okubha noorwo kutyo muri na abheeyigisya bhaafu muno bhanu abhabhaangarira mu‑Kirisito, esomwana ni umwi. Anye naariga niri esomwana mu‑Kirisito Yeesu, kwa okubharaasisya Emisango ja Ekisi. 16 Woori, enibheerembeeresya ati, mubhe nimuruubha orugere rwani. 17 Ku‑songa eyo, ꞉naatumire Timoteewo, omwana waani omwendwa, unu ari mwiyikanyibhwa ku‑mirimu ja Raatabhugenyi. Omwene kaja okubheechukya kutyo anye eniruubha Kirisito, jiri rwa kutyo eniiyigisya abhaanu bhuri rubhaara mu‑makanisa goone.
18 Woori abhandi agati yeemwe abheekuuya, kwa okubha abheetogera ati nitariija rindi kw‑imwe eyo. 19 Nawe Raatabhugenyi aakeenda, niribhaaja‑ko bhwangu. Awo niwo nirimenya araabha abhaanu bhanu abheekuuya abhaayika era amwi bhari na amanaga. 20 Enaayika kutyo kwa okubha obhukama bhwa Nyamuwanga,b bhutakubhonekana mu‑misango era, tari chimwichimwi mu‑managa. 21 Woori, omwenda nikore kutiki? Angu, nibhaaje‑ko na isimbo, tere niije mu‑ryenda na mu‑bhworooro?