Obhumwi ku‑mirimu ja Nyamuwanga
3
1 Abhayiri bhaani mu‑riikirisya, omwanya gunu naariga niri kw‑imwe ꞉nitaaturire okwayika na emwe rwa abhaanu bhanu abhatangasibhwa na Mwoyo Mweru. Tari naariga ninaayika na emwe rwa abhaanu bhanu abhatangasibhwa na emisango ja echaaro, ka wone rwa abhaana abharera mu‑kwikirisya Kirisito. 2 ꞉Naabhanywesiisye amata, ꞉nitabhariisiisye ebhiryo wuri, kwa okubha mwariga muchaari okukomeera okurya ebhiryo. Noorwo woori muchaari okukomeera, 3 kwa okubha muchaatangasibhwa na emisango ja echaaro. Angu, araabha agati yeemwe ruri‑wo orwiso na inyombo, ebhyo bhitakweresya ati muchaatangasibhwa na emisango ja echaaro na okwikara rwa abhaanu bha echaaro? 4 Enaayika kutyo kwa okubha bhuri muunu kaayika jaaye, owumwi kaayika ati, “Anye niri wa Pawuro,” owundi kaayika ati, “Anye niri wa Apooro.” Woori ejo ejeeresya ati, muchaakora rwa abhaanu bha echaaro.5 Mbe woori, Apooro niga? Ka Pawuro niga? Eswe chiri bhakosi bhanu Nyamuwanga ꞉aachitumire okubhasakira korereki mumwikirisye. Bhuri umwi kaakora emirimu jinu ꞉aayaaywe na Raatabhugenyi. 6 Anye ꞉naayambire jimbibho, Apooro ˆnaajiitirira amanji, nawe Nyamuwanga niwe aariga ˆnaamesya na okukusya. 7 Kutyo, unu kaayamba jimbibho atari chiinu, noorwo unu keetirira, tari Nyamuwanga unu kaakusya niwe wa obhusibhusi. 8 Unu kaayamba na unu keetirira amanji bhoone bheengeene, Nyamuwanga ariyaana bhuri umwi weebhwe omuyeero gwaye, okuruubhana na kutyo ꞉aakorere emirimu jaaye. 9 Enaayika kutyo kwa okubha emirimu jinu anye na Apooro echikora ni ja Nyamuwanga, keemwe muri sambu ryaye, ka wone muri inju yaaye.
10 Nyamuwanga ku‑bhwitiriranya bhwaye aansakira okuumbaka orufuka rwa omuumbaki wa ekisi na owa obhwengeeso, na omuunu owundi koombaka inguru ya orufuka orwo. Nawe woori, bhuri muunu aangarire kisi, kutyo koombaka inguru yaarwo, 11 kwa okubha orufuka runu rwamarirwe okuumbakwa ni Yeesu Kirisito omwene. Atari‑wo omuunu unu kaatura okuumbaka orufuka orundi. 12 Inguru ya orufuka orwo, omuunu kaatura okuumbaka‑ko kwa inaaryo, kwa ebhyuma bhya obhugusi obhurambu, amwi kwa amabhuyi ga obhugusi obhurambu, kwa amati, kwa amanyaasi, amwi kwa amabhubha, 13 na obhwa ekisi bhwa emirimu ja bhuri muunu bhuribhonekana abhwerubhweru. Orusuku rurya rwa indamu emirimu joone jiribha abhweru, kwa okubha emirimu ja bhuri muunu, jiriregeejwa kwa omuriro. 14 Araabha omurimu gwa omuunu gukawona, omuunu oyo ariramira echiyaanwa. 15 Araabha omurimu gwa omuunu gukarungura, awo niwo aribhusya echiyaanwa, nawe omwene arichungurwa, noorwo kutyo aribha rwa omuunu unu aawonera ku‑ngego okwingira mu‑muriro.
16 Angu, mutakumenya ati, emwe muri riyekaru rya Nyamuwanga, ka wone ati Mwoyo wa Nyamuwanga eekaaye mw‑imwe? 17 Woori, araabha omuunu akanyamura riyekaru rya Nyamuwanga, omuunu oyo, Nyamuwanga arimunyamura, kwa okubha riyekaru rya Nyamuwanga ni ryeru, na riyekaru eryo niwe emwe.
18 Omuunu woonewoone agati yeemwe aasiga okwijiga ati ari na obhwengeeso. Araabha omuunu aakeerora ati ari na obhwengeeso ku‑chaaro chinu, abhe ˆneekora ati ni mumuumu korereki abhone obhwengeeso bhwa echimari. 19 Akore kutyo, kwa okubha obhwengeeso bhwa echaaro chinu, ni bhumuumu imbere ya Nyamuwanga. Jiri rwa kutyo jikaamirwe mu‑Bhikaame Ebhyeru ati, “Nyamuwanga kaakoma abha obhwengeeso mu‑bhurigerige bhwebhwe.”a 20 Ka wone jikaamirwe mu‑Bhikaame Ebhyeru ati, “Raatabhugenyi kaamenya obhwiganirisya bhwa abha obhwengeeso, ati bhutari na omuriiro.”b
21 Woori omuunu woonewoone aasiga okwikuuya isonga iri ati omwene ni muruubhirisya wa omuunu omurebhe, kwa okubha eswe bhoone Nyamuwanga achiteeye‑wo okubhasakira emwe, 22 abhe Pawuro, abhe Apooro, amwi abhe Keefa. Ka wone Nyamuwanga abhayaaye ebhiinu bhyone okubhasakira, bhibhe bhya mu‑chaaro, amwi bhuwanga, amwi rufu, bhibhe bhinu bhiri‑wo woori, amwi bhinu bhiribha‑wo, bhyone ni bhyemwe. 23 Nawe emwe, muri bha Kirisito, na Kirisito ni wa Nyamuwanga.