Okuraasya emisango inguru ya Yeesu Kirisito
2
1 Abhayiri bhaani mu‑riikirisya, omwanya gunu ꞉neejire kw‑imwe okubharaasisya inguru ya obhutinge bhwa imbisike ya Nyamuwanga bhunu bhwariga bhubhisirwe,a ꞉nitaabhuraasiisye mu‑bhwa ekisi bhwa emisango noorwo mu‑bhwengeeso. 2 Omwanya gunu naariga niri kw‑imwe, ꞉naaramuuye ati naayike era emisango inguru ya Yeesu Kirisito, chimwichimwi okufwa kwaye ku‑musarabha, okwayika omusango gundi wuri. 3 Omwanya ogwo naariga nijorobhokere, naariga ninuubhaya, okukingira okuyarara muno. 4 Omwanya gunu naariga niniiyigisya na okuraasya, ꞉nitaakorere kutyo mu‑bhwengeeso bhwani, korereki nikongye abhaanu ku‑songa ya obhwengeeso. Tari amanaga ga Mwoyo Mweru nigo gaariga nigeeresya echimari. 5 ꞉Naakorere kutyo, korereki eriikirisya ryemwe ryasiga okwiyikanya obhwengeeso bhwa abhaanu, tari riyikanye amanaga ga Nyamuwanga.Obhwengeeso okusooka ku‑Mwoyo Mweru
6 Woori eswe, echaayika emisango ja obhwengeeso ku‑bhaanu bhanu bharumateene mu‑riikirisya, nawe obhwengeeso obhwo bhutari bhwa echaaro chinu, ka wone bhutari bhwa abhatungi bha echaaro chinu bhanu bhariyitingʼana. 7 Obhwengeeso bhunu echiraasya ni mbisike ya Nyamuwanga, inu yaariga ichaari okuswerurwa ku‑bhaanu. Omwanya gunu Nyamuwanga aariga achaari okubhumba echaaro, ꞉aaramuuye okukorera emirimu obhwengeeso obhwo, inguru ya rikusyo ryeswe. 8 Atari‑wo noorwo umwi mu‑bhatungi bha echaaro chinu unu ꞉aasombookeeywe obhwengeeso obhwo, kwa okubha bhakabheeye bhasombookeeywe, ꞉bhataakabhumiiriiye ku‑musarabha Raatabhugenyi wa okukuuyibhwa. 9 Nawe jiri rwa kutyo jikaamirwe mu‑Bhikaame Ebhyeru ati,
“Atari‑wo omuunu unu areraabhire okujirora noorwo okujuungwa,
atari‑wo omuunu unu areraabhire okujituura mu‑mwoyo gwaye,
emisango jinu Nyamuwanga ꞉eeraabhiiye bhanu abhamwenda.”b
10 Nawe eswe, Nyamuwanga ꞉aacheeresiisye ejo okutura ku‑Mwoyo Mweru, kwa okubha Mwoyo Mweru kaatatirisya joone, noorwo obhutinge bhwa Nyamuwanga bhunu bhubhisirwe. 11 Atari‑wo omuunu unu kaatura okumenya jinu omuunu owundi keeganirisya. Omwoyo gwaye omwene era nigwo ogujimenya. Nyabhuriko na jinu Nyamuwanga keeganirisya, atari‑wo unu kaatura okujimenya. Mwoyo wa Nyamuwanga era niwe kaajimenya. 12 Nyamuwanga ꞉ataachiyaaye obhwiganirisya bhwa ku‑chaaro kunu, tari ꞉aachiyaaye Mwoyo waaye, korereki chimenye jinu chiyaaywe ku‑bhwitiriranya bhwa Nyamuwanga.
13 Ka wone chitakwayika emisango jinu chiiyigisiibhwe na obhwengeeso bhwa abhaanu, tari misango jinu chiiyigisiibhwe na Mwoyo wa Nyamuwanga. Echiyobhoora emisango ja Mwoyo wa Nyamuwanga ku‑bhanu bhari na Mwoyo oyo.c 14 Nawe omuunu unu atari na Mwoyo wa Nyamuwanga, atakuramira jinu ejisooka ku‑Mwoyo wa Nyamuwanga, isonga iri ati ku‑muunu oyo ejo ni ja chimuumu. Ka wone atakutura okujisombookerwa, kwa okubha ejimenyekana era ku‑bhusakisi bhwa Mwoyo wa Nyamuwanga. 15 Omuunu unu kaatangasibhwa na Mwoyo wa Nyamuwanga kaatatirisya joone, nawe omwene, atakutura okutatirisibhwa na omuunu woonewoone. 16 Jiri rwa kutyo jikaamirwe mu‑Bhikaame Ebhyeru ati,
“Niga unu kaatura okumenya obhwiganirisya bhwa Raatabhugenyi?
Ka wone niga unu kaatura okumutongera?”d
Nawe, eswe abheekirisya echiiganirisya jinu ejisooka ku‑Kirisito.