1 Abhakoriito 1

Inyarubha ya okwamba ya Pawuro

ku‑Bhakoriito

Obhukeesya

1 Inyarubha inu, niikaamire anye Pawuro, niri aamwi na Sositeene omuyiri weeswe mu‑riikirisya. Anye Pawuro ꞉naabhirikiiywe okubha itumwa ya Kirisito Yeesu mu‑kwenda kwa Nyamuwanga. 2 Echikaamira emwe bhanu muri mw‑ikanisa rya Nyamuwanga mu‑musi gwa Koriito. Nyamuwanga abhasorere okubha na obhumwi na Kirisito Yeesu, na abhabhirikiiye okubha abheeru bhaaye. Echibhakaamira emwe aamwi na abhaanu bhoone bha mbaara joone bhanu abhasabhwa Yeesu Kirisito, unu ari Raatabhugenyi weebhwe na Raatabhugenyi weeswe wone.

3 Obhwitiriranya na omurembe okusooka ku‑Nyamuwanga Raata weeswe, na ku‑Raatabhugenyi Yeesu Kirisito, bhibhe aamwi na emwe.

Risiima rya Pawuro ku‑Nyamuwanga

4 Enisiima Nyamuwanga omwanya gwone inguru yeemwe, ku‑songa ya obhwitiriranya bhunu abhayaaye ku‑njira ya Kirisito Yeesu. 5 Mu‑kubha na obhumwi na Kirisito muniibhire mu‑bhuri musango, chimwichimwi mu‑kwayika kwemwe na mu‑bhumenyi bhwemwe. 6 Ejo ejeeresya ati emisango inguru ya Kirisito jinu ꞉chaabharaasisiisye ni ja chimari. 7 Woori mutagerukiiywe noorwo echiyaanwa choonechoone cha Mwoyo Mweru, mukabha nimurindiriraga kwa obhwiro bhwafu okusubha kwa Raatabhugenyi weeswe Yeesu Kirisito. 8 Nyamuwanga aribhakomeesya okukingira ku‑bhuteero korereki mwasiga okubha na esoro, orusuku runu Raatabhugenyi weeswe Yeesu Kirisito ariija okuramura abhaanu. 9 Nyamuwanga arikora ejo kwa okubha omwene ni mwiyikanyibhwa. Omwene niwe ꞉aabhabhirikiiye, mubhe na obhumwi na Omwana waaye Yeesu Kirisito, Raatabhugenyi weeswe.

Obhumwi agati ya abheekirisya

10 Woori, abhayiri bhaani mu‑riikirisya, enibheerembeeresya kw‑isiina rya Raatabhugenyi weeswe Yeesu Kirisito ati, mwasiga okutaasyanya mu‑nyaayika. Kwasiga okubha‑wo okwawukana agati yeemwe, tari mubhe na obhumwi ku‑jinu omukararira na ku‑jinu omwiganirisya. 11 Abhayiri bhaani, abhaanu abharebhe bha iika wa Koroowe ꞉bhaambwiriiye ati, iri‑wo inyombo agati yeemwe. 12 Woori, jinu eneenda okwayika nijo jinu, ati, bhuri muunu agati yeemwe kaayika jaaye. Owumwi kaayika ati, “Anye niri wa Pawuro.” Owundi kaayika ati, “Anye niri wa Apooro.” Owundi kaayika ati, “Anye niri wa Keefa.” Owundi kaayika ati, “Anye niri wa Kirisito.” 13 Angu, Kirisito aawukeene‑mo? Angu, Pawuro niwe ꞉aafuuwe ku‑musarabha inguru yeemwe? Angu, ꞉mwabhatiijiibhwe kw‑isiina rya Pawuro?

14 Enisiima Nyamuwanga, kwa okubha ꞉nitaabhatiijiisye omuunu woonewoone kw‑imwe, tari Kirisipo na Gaayo. 15 Kurwa ejo, atari‑wo omuunu unu kaatura okwayika ati abhatiijiibhwe kw‑isiina ryani. 16 Eniichuka woori ati ꞉naabhatiijiisye wone abhaanu bha iika wa Sitefwana. Nawe okukira abho, nitakwichuka ati ꞉naabhatiijiisye omuunu owundi woonewoone. 17 Kirisito ꞉ataantumire okubhatiija abhaanu. ꞉Aantumire okuraasya Emisango ja Ekisi, okwiyikanya wuri obhwengeeso bhwani bhwa okwayika kisi, korereki orufu rwa Kirisito ku‑musarabha rwasiga okubhusya amanaga gaarwo.

Kirisito niwe amanaga na obhwengeeso bhwa Nyamuwanga

18 Abhaanu bhanu abhabhura abharora ati emisango ja Kirisito okufwa ku‑musarabha ni ja echimuumu, nawe kw‑iswe bhanu echichunguka, emisango ejo nigo amanaga ga Nyamuwanga. 19 Jiri rwa kutyo jikaamirwe mu‑Bhikaame Ebhyeru ati,

“Abhaanu abha obhwengeeso nirinyamura obhwengeeso bhwebhwe.

Abhamenyi nirirema obhumenyi bhwebhwe.”

20 Woori bhari aaki bhanu echaayika ati bhari na obhwengeeso? Bhari aaki bhanu echaayika ati ni bheeyigisya bha ebhiraagiro bhya Muusa, noorwo abhamenyi bha okwayika kisi mu‑siku jinu? Nyamuwanga eeresya abhwerubhweru ati obhwengeeso bhwa echaaro chinu ni bhumuumu. 21 Enaayika kutyo, kwa okubha Nyamuwanga, ku‑bhwengeeso bhwaye, ꞉aaramuuye ati abhaanu bhatakutura okumusombookerwa okutura ku‑bhwengeeso bhwebhwe abheene. Tari Nyamuwanga ꞉eendere okuchungura bhanu abhamwikirisya okutura ku‑misango jinu echiraasya. Emisango ejo, abhaanu bhanu bhatakumenya Nyamuwanga, abhaayika ati ni ja echimuumu. 22 Abhayawudi abheenda ebhibharikisyo korereki bheekirisye, Abhayunaani abhayenja obhwengeeso. 23 Nawe eswe, echiraasya emisango inguru ya Kirisito unu ꞉aafuuwe ku‑musarabha. Emisango ejo ejikora Abhayawudi bheekuujure, na ku‑bhanu bhatari Bhayawudi ni misango ja echimuumu. 24 Nawe ku‑bhaanu bhanu Nyamuwanga ꞉aabhirikiiye okubha abhaanu bhaaye, bhabhe Abhayawudi amwi bhabhe Abhayunaani, Kirisito niwe amanaga ga Nyamuwanga na obhwengeeso bhwa Nyamuwanga. 25 Emisango jinu abhaanu abharora ati ni bhumuumu bhwa Nyamuwanga, ejikira obhwengeeso bhwa abhaanu. Ka emisango jinu abharora ati ni bhujorobhoke bhwa Nyamuwanga, jiri na amanaga okukira amanaga ga abhaanu.

26 Woori abhayiri bhaani mu‑riikirisya, mwichuke kutyo mwariga muri mwanya gunu ꞉mwabhirikiiywe na Nyamuwanga. Mu‑bhwiganirisya bhwa abhaanu, abhaafu agati yeemwe bhaariga bhatari na obhwengeeso. Ka wone abhaafu agati yeemwe mwariga mutakumenyekana muno, noorwo ꞉muteebhuriiywe mu‑misi ja abhaanu abha echibharo. 27 Nawe Nyamuwanga ꞉aawuuwe emisango jinu abhaanu abharora ati ni bhumuumu, korereki aswasye abha obhwengeeso. Ka wone Nyamuwanga ꞉aawuuwe emisango jinu abhaanu abharora ati ni bhujorobhoke, korereki aswasye abha amanaga. 28 Ka wone Nyamuwanga ꞉aawuuwe emisango jinu abhaanu abharora ati jitari na echibharo na jinu abhagaya, ka wone jinu abharora ati jitari na obhugajuro, korereki anyamure emisango jinu abhaanu abharora ati jiri na obhugajuro. 29 ꞉Aakorere kutyo korereki omuunu woonewoone aasiga okwikuuya imbere ya Nyamuwanga. 30 Nyamuwanga niwe abhagwatanyiisye emwe na Kirisito Yeesu. Omwene akorere Kirisito okubha obhwengeeso bhweswe. Nikwo okwayika ati okutura ku‑Yeesu chaabha abharengeresi imbere ya Nyamuwanga, chaabha abheeru, ka wone cheeruuywe. 31 Jiri rwa kutyo jikaamirwe mu‑Bhikaame Ebhyeru ati, “Omuunu woonewoone unu keekuuya, eekuuye inguru ya Raatabhugenyi.”