Pawuro kaatuma obhukeesya ku‑bhaanu bhaafubhaafu
16
1 Eneenda okumenyesya omuyara waasu Fiibhi. Omwene ni mukosi wa rikanisaa rinu riri mu‑musi gwa Keekereya. 2 Enisabhwa mumukume kisi, kwa okubha omwene wone ni mwikirisya wa Raatabhugenyi Yeesu. Mumukume rwa kutyo jikenerwe agati ya abheekirisya bha Yeesu Kirisito. Ka wone, enisabhwa ati, mumusakire na choonechoone chinu kaakena, kwa okubha omwene wone ꞉aasakiiye abhaanu bhaafu, niri‑mo naanye.3 Mukeesye Pirisikab aamwi na omurume waaye Akiira. Abho ni bhakosi bheejaasu mu‑mirimu ja Kirisito Yeesu, 4 na bhaariga bhari yeeyi okusingaarisya obhurame bhwebhwe inguru yaani. Nitari anye era unu enibhasiima, tari noorwo abheekirisya bhanu bhatari Bhayawudi mu‑makanisa goone, abhabhasiima muno. Ka wone, mukeesye abheekirisya bhanu abheekumanyaga mu‑nju yeebhwe.
5 Mukeesye omwendwa waani Payineeto. Omwene niwe wa okwamba okwikirisya Kirisito mu‑mukoowa gwa Asiya.
6 Mukeesye Maryamu unu ꞉eekomeesiisye muno okukora emirimu inguru yeemwe. 7 Mukeesye Adurooniko na Yuuniya. Abho ni Bhayawudi bheejaasu bhanu ꞉chaabhoyerwe aamwi mw‑ibhoyero. ꞉Bhaantangatiiye okwikirisya Kirisito, ka wone abhayaanwa echibharo muno agati ya jitumwa.c
8 Mukeesye Amupuraasi, omwikirisya omwendwa waani mu‑Raatabhugenyi Yeesu Kirisito. 9 Mukeesye Wuribhano, omukosi weejaasu ku‑mirimu ja Kirisito, noorwo omwendwa waani Sitaaku.
10 Mukeesye Apere. Omwene aariga ari mwiyikanyibhwa mu‑maregeejo maafu inguru ya Kirisito. Ka wone mukeesye abhaanu bha mu‑nju ya Arisitaabhuro. 11 Mukeesye Erodiwooni, Omuyawudi weejaasu. Mukeesye abhaanu bha mu‑nju ya Naakiso bhanu abheekirisya Raatabhugenyi Yeesu Kirisito. 12 Mukeesye Turufina na Turufoosa. Abhagasi abho abheekomeesya muno okukora emirimu ja Raatabhugenyi Yeesu Kirisito. Ka wone, mukeesye omwendwa waani Perisisi. Omwene wone ni mugasi unu ꞉eekomeesiisye muno okukora emirimu ja Raatabhugenyi Yeesu Kirisito.
13 Mukeesye Ruufo, omusorwa wa Raatabhugenyi Yeesu Kirisito, aamwi na nyiramwene. Nyiramwene oyo ꞉aansakiiye rwa maayi omwibhusi. 14 Ka wone, mukeesye Asikirito, Feregoni, Eremeesi, Paturoobha, Eremaasi, na abheekirisya bhoone bhanu bhari aamwi nabho.
15 Ku‑bhuteero, mukeesye Feroroogo na Yuuriya, Neeriya na omuyara waabho, na Woripaasi aamwi na abheekirisya bhoone bhanu bhari aamwi nabho. 16 Mukeesyanye mu‑ryenda rya Kirisito. Abheekirisya bha mu‑makanisa goone ga Kirisito, abhabhakeesya.
Pawuro kaakengya abheekirisya
17 Woori, abhayiri bhaani, enibhakomeeresya ati, mwikengega abhaanu bhanu ameeyigisyo geebhwe agakora abheekirisya bhaawukane makijumakiju, ka wone aganyamura eriikirisya na akatungiiywe keebhwe. Mubhe kura nabho, kwa okubha ameeyigisyo geebhwe agataasyanya na ganu ꞉mweeyigisiibhwe. 18 Abhaanu bha imbaga eyo bhatakukorera emirimu Kirisito, Raatabhugenyi weeswe, tari wubha nibharuubha okurigira kwebhwe abheene. Abhaayika emisango ja ekisi ja okukondisya, nawe abhajiga abheekirisya bhanu bhatakwiyikanya okukorerwa obhubhiibhi bhwonebhwone.
19 Abhaanu bhoone bhoongwa kutyo omugayuka Raatabhugenyi Yeesu. Omusango ogwo ogunkondisya muno. Noorwo kutyo, eneenda mubhe na obhwengeeso muno mu‑kukora ja ekisi, na mwasiga okubha na esoro ryoneryone ati omukora ebhibhiibhi.
20 Nyamuwanga unu kaabhayaana omurembe, arifwonyorera aasi Syetaanid bhwangu, na okubhayaana obhuyigi inguru yaaye. Obhwitiriranya bhwa Raatabhugenyi weeswe Yeesu Kirisito bhubhe aamwi na emwe. [Jibhe kutyo.]
21 Timoteewo, omukosi weejaasu, kaabhakeesya. Ka wone, Abhayawudi bheejaasu Ruukiyo, Yasooni na Sosipiita, abhabhakeesya. 22 Noorwo anye Teeritiyo, omukaami wa emisango ja inyarubha ya Pawuro inu, enibhakeesya rwa omwikirisya oweejaanyu wa Raatabhugenyi Yeesu. 23 Gaayo unu anye Pawuro niikaaye ewaaye, wone kaabhakeesya. Iika ewaaye niwo abheekirisya bhoone bha rikanisa rya endanu abheekofyanya. Ka wone, Erasito unu ari mubhiiki wa jipirya ja omusi gunu,e kaabhakeesya. Ku‑bhuteero, omuyiri weeswe Kwarito kaabhakeesya.
[ 24 Obhwitiriranya bhwa Raatabhugenyi weeswe Yeesu Kirisito bhubhe aamwi na emwe bhoone. Jibhe kutyo.]
Pawuro kaakusya Nyamuwanga
25 Woori, chikusye Nyamuwanga! Omwene kaatura okukora mubhe nimurumatana mu‑riikirisya ryemwe, okutura ku‑Misango ja Ekisi inguru ya Yeesu Kirisito jinu naariga nindaasya kw‑imwe. Emisango ejo nijo obhutinge bhwa imbisike bhunu bhwariga bhubhisirwe kara, 26 nawe woori, bhwatuurwa abhweru. Okutura mu‑Bhikaame Ebhyeru bhya abharagi, obhutinge obhwo, obhumenyekana ku‑bhaanu bha amaanga goone ku‑chaaro. Nyamuwanga wa akajaanende koone, niwe aaragirira ati obhutinge obhwo bhuraasibhwe ku‑bhaanu bhoone, korereki abho wone bheekirisye na okugayuka Raatabhugenyi Yeesu.
27 Nyamuwanga wenyere niwe owa obhwengeeso bhwone. Omwene niwe akusibhwega akajaanende koone, ku‑njira ya Yeesu Kirisito! Jibhe kutyo.